Te Tumu i Akaruke ei Au i Tetai Angaanga Puapinga

Akakiteia e Martha Teresa Márquez

TOKU tamarikianga e reka ua ana au i te imene, e te imene katoa i runga i te ratio. Kare roa au i aere ana ki te apii a te tamariki rikiriki, i muri mai kua apii au i te tereni i toku reo i roto i te Oire Meiko i raro ake i te tangata akaaere o te pupu akatangi imene o te enua.

I te mataiti 1969, e 24 oku mataiti, kua patiia mai au e toku oa, e tangata ura, ki tetai imene anga poto i te ngai kaikaianga rongonui ko te La Rampa Azul. Kua imene au i te imene rongonui Cucurrucucú Paloma tei atuia e tetai tangata Meiko ko Tomás Méndez, e kua reka tikai te katoatoa i te reira. Ko te akamataanga tikai ia o taku angaanga rongonui. Kua imene au ko au anake ua i raro ake i te ingoa Romelia Romel.

Kua angaanga kapiti matou ko Tomás Méndez, e tetai aronga atu imene kite karape e te aronga imene no Meiko mai, kapiti mai ia Cuco Sánchez raua ko Juan Gabriel. Mataora tikai au i te kite anga i toku ingoa e purapura maira i runga i te papaanga ingoa e i roto i te au nutipepa e te au makatini. E imene ana au i te ngai tamataoraanga i te po, i runga i te ratio, e te imene anga i te ngai tukeke i Meiko e i Perite. Kua angaanga kapiti katoa au ki tetai vaine rongonui takatakata tangata o Meiko, ko Leonorilda Ochoa, te ou ra rai tana akaariari anga i runga i te tivi i Meiko.

Kare i roa ana, kua maata mai toku tu rongonui e taku moni​—kua rava meitaki kia mataora au i te au apinga nui mei te au apinga akamanea, te au pereue uruuru oko maata, e tetai apatimani oko maata i runga roa i tetai are. I te akaraanga kua rauka iaku te au apinga ravarai, inara kare au e mataora ana. Kua manako puapinga kore ua au. Noatu e kua utuutuia au i roto i te Akonoanga Katorika Roma, akama au i te aere ki te pure. Kua manako mai au e e tu viivii toku no toku oraanga tau kore.

Toku Kite Mai Anga i te Inangaro ia Iehova

Iaku e apiipii ra i te imene no taku rekotianga mua, kua akakite au i toku manako ki tetai oa, ko Lorena Wong tona ingoa, e vaine e imene ana i te imene taito (ranchera). Kua akakite au kiaia e, inangaro au kia riro mai au ei paretenia e te tauturu i te aronga putaua. “Ka inangaro koe kia riro mai ei paretenia? E auouo paa koe!” i tuatua mai ei aia.

Kua ui mai aia e: “Kua kite koe i te ingoa o te Atua?”

“Ko te Atu ko Iesu Mesia,” i pau atu ei au.

“Kare, ko Iehova tona ingoa,” i tuatua mai ei aia. “Ko Iesu tana Tamaiti.”

“Ko Iehova tona ingoa?” i ui atu ei au. Kare rava au i rongo ana i tera ingoa. Kua oronga mai a Lorena i tetai Pipiria e kua akakite mai e ka tono mai aia i tona puapii, koia tetai Kite o Iehova, kia atoro mai iaku. *

I te au taime ravarai e kite ana au ia Lorena, e  ui ana au e, “Aea koe e tono mai ei i toou puapii?” Inangaro tikai au i te kite maata atu i te Atua.

I taua taime rai, kua akamata au i te tatau i te Pipiria e kua kite mai au e ko Iehova tikai te ingoa o te Atua. (Salamo 83:18) Kua poitirere tikai au. Kua tatau katoa au i te Ture Ngauru e kua poitirere tikai au e karanga ra te akauenga e: “Auraka rava koe e akaturi.” (Exodo 20:14) I te reira taime, te noo kapiti ra maua ko tetai tangata akaipoipo, e metua tane no taku pepe tamaroa e varu marama. Ko te rua ia o taku tamaiti. E tamaiti katoa taku na tetai tangata ke, kare katoa au i akaipoipo kiaia.

I tetai ra iaku e apiipii ra i tetai imene, kua topapaia mai te ngutupa o toku apatimani. Ko te puapii o Lorena, ko Mauricio Linares e tana vaine. Kua akaari mai raua eaa to te Atua akakoroanga no te au tangata ravarai e kua akaruke mai kiaku i te puka Te Tuatua-Mou te Ka Arataki ki te Ora Mutukore. * Kua tatau au i te reira e tai po, noatu e e ngata i te tatau i te au tuatua ngata. Ko te taime ia i akamata mai ei au i te inangaro ia Iehova.

Taui Anga i Toku Oraanga

E tauturu maira te Au Kite iaku i te apii i te Pipiria e te akameitaki atu i taku tatauanga, kua kite mai au e ka anoanoia te au taui anga i roto i toku oraanga ei akamareka anga ia Iehova. Kua akamata au i te takore i taku au tiki, te au metera, e te au ei kura manuia, noatu e kua maaniia te reira ki te auro.

E ngata tikai iaku i te akamutu i te kai avaava e te inu maata i te kava. Me aere au na te pae i tetai toa oko kava, e kaki ua ana au i te kava. Kua akamutu au i te kapiti atu ki toku au oa, no te mea e oronga mai ana ratou i te kava kiaku e kua pati mai iaku kia kaikai e kia inu i te ngai kaikaianga oko maata. Kua kite au e ka taki atu teia ki te inu maataanga i te kava.

E ngata katoa iaku i te akamutu i te aere ki te au ngai tamataoraanga a te aronga apinga nui e te rongonui. Te patiia mai anga au ki tetai tamataora akamaaraanga no te ra anauanga o tetai tangata moto rongonui o Kupa, kua pure au e: “E tai ua taime toe, e Iehova. Kare rava au e aere akaou ki teia angaanga me kore e rave i tetai peu kare koe e mareka ana.” E kare rava au i rave akaou ana i te reira.

Kua akamutu au i toku pirianga ki te metua tane o te rua o taku tamaiti. Kua rave au i teia noatu e maata tana apinga nui e tana i taputou mai e ka oronga mai aia me kare au e akaruke iaia. E ngata tikai iaku i te rave i teia no te mea inangaro tikai au iaia, e kua kite aia i te reira. Ma te ngakau parau, kua akakite mai aia e: “Ko au toou Atua! Ko au toou Mesia!”

“Ae tano paa taau,” i pau atu ei au, “inara i teianei ko Iehova toku Atua.” Kua tamataku mai aia i te apai i taku tamaiti no te mea koia te metua tane e ka takinokino mai aia iaku.

I taua taime rai, kua akakite mai tetai aronga kiaku e e angaanga ua te imene mei tetai atu au angaanga rai​—e ka riro mai au ei Kite e ka rauka rai i te imene. Inara kua akamaara mai tetai pae kiaku e, “Kare e rauka i tetai aua takapini ia koe i te paruru ia koe mei te kai avaava, te inu kava, e te au peu tau kore a te aronga e reka ana ia koe.” Kua kite mai au i te puapinga o teia tuatua openga.

I te tuatau i rongonui ana au ei vaine imene, e tauta ana te au tangata i te akavare iaku. Kua tauta au kia kore rava au e o atu ki roto i taua au timataanga ra. No reira, i te mataiti 1975, kua akamutu au i taku koreromotu i te aere i te imene i Tinito, e e ono marama i muri mai kua papetitoia au ei Kite no Iehova.

 Te au Akaaoanga e te Mataora

Akapeea au me akono iaku e toku ngutuare tangata? Kare au i apiiia ana i te apii e kare au i kite tikai i te rave i tetai angaanga ke atu, mari ra ko te imene ua. E irinaki ua mai ana toku tuakana, ko Irma, e tana tamariki e toru, e taku nga tamaroa ki runga iaku. Kua neke atu matou mei toku apatimani ki roto i tetai nga rumu meangiti mai. E ngata tikai i te taui mei tetai oraanga apinga nui ki tetai oraanga kare e apinga. No tetai tuatau kua riri toku tuakana e te tamariki iaku e kua maro mai kia imene ua rai au, inara kua rave rai au i taku e inangaro ra i te rave i te tavini ia Iehova.

Kua akamata au i te oko i taku au apinga nui​—te au apinga akamanea, au pereue uruuru, e te motoka—​e kua riro te reira moni i te akono mai ia matou. I muri mai, kua pou taua moni ra. E rauka ai i te kopae atu i te tamanamanata anga a te metua tane o te rua o taku tamaiti, i te mataiti 1981 kua neke atu matou ki tetai oire i tetai tua mai o te enua, kare e rauka iaia i te kimi mai ia matou.

I teia ngai kua apii mai te Au Kite iaku e akapeea i te maani anga i te varaoa popo koni, te tonati, e tetai au kai ei oko. I muri mai, kua rauka mai taku angaanga i roto i tetai vakatori i te po. Inara te tamanamanata maira teia angaanga i toku aere anga ki te au uipaanga Kerititiano e taku tavini anga i te Atua. I muri mai kua akaruke au i te angaanga e kua akamata i te maani i te au varaoa popo koni i te kainga. Ka tari au i te reira i roto i te kete e kua oko atu i te pae mataara. Na roto i teia ravenga kua rauka iaku i te turuturu iaku uaorai i roto i te angaanga orometua tamou.

Kare Rava Au i Tataraara Ana i Taku Ikianga

Me ui mai te au tangata eaa toku manako te akaruke anga au i taku angaanga meitaki tikai ei vaine imene, kua akakite au kia ratou e kare au e taui i toku kite no Iehova e te marama anga i tona au akakoroanga umere no tetai ua atu apinga. Mataora tikai au i te kite anga i taku nga tamaroa te tere anga ki mua i te kite i te Pipiria, te akatapuanga i to raua oraanga kia Iehova, e te akaipoipo anga ki tetai nga tuaine irinaki. Te utuutu nei taku nga tamaroa, ma te tauturu anga a ta raua vaine, i ta ratou tamariki i te tavini i to tatou Atua, ko Iehova.

E painia au, ta te Au Kite o Iehova e kapiki ana i te aronga te rave tamou ra i te angaanga tutuanga, vaitata rai e e toru ngauru mataiti. Ma te tauturu a te Atua e manganui te au tangata taku i tauturu, kapiti mai ia Irma e tana tamaine, kia kite i te au tuatua mou o te Pipiria e kia akatapu i to ratou oraanga ki te Atua. E mataora tikai te aravei anga i taua “au tamariki na te tuatua-mou,” e te kite anga e tei roto rai ratou i te tuatua mou​—e manganui te tavini katoa ra ei au painia. (3 Ioane 4) I teia taime, e 64 oku mataiti, te apii nei au e 18 apii Pipiria ki tetai ke.

Kua akamerengoia te ngai i ngere ana au i te pae vaerua ei vaine mapu imene, e te inangaro anga i te tauturu i tetai ke na te akarongo anga ki te akauenga a Iesu e kia ‘aere e akariro i to te pa enua katoa ei pipi.’ (Mataio 28:19, 20) Mataora tikai au e kua tauturu mai a Iehova iaku i teia au mataiti nei e te rave nei rai aia i te reira! Kua ‘tongi e kua kite tikai au i tona meitaki.’​—Salamo 34:8.

[Au Tataanga Rikiriki i Raro]

[Tutu i te kapi 11]

Taku nga tamaroa, ta raua nga vaine, e maua ko toku tuakana te painia nei rai

[Tutu i te kapi 12]

Maani varaoa popo koni nei rai au, te oko ra i te pae mataara i te turuturu i taku angaanga orometua