Akakite Aereia Nei te Ingoa o te Atua!
Akakite Aereia Nei te Ingoa o te Atua!
● Me aere na roto i te ngai manea o te Airani o Orlean vaitata mai ki te Oire o Quebec, i Kanata, ka kitea uaia atu mei te au are e e aronga irinaki akonoanga te aronga mua i noo ana i reira. Te vai ra rai te au are pure taito i te pae mataara takapini i te airani ei akamaara anga i te tuatau i topa, e e are pure to te oire tataki tai.
Te tu ra te are pure taito rava atu i vao ake ia Quebec i roto i te taoni o Saint-Pierre, mei te mataiti 1717. Teianei e ngai akaariari anga ati, e tei roto i te are tetai mea umere tikai. I runga ake i te atarau ko te Tetarakaramatona—te au reta Epera e a o te ingoa uaorai o te Atua o te Pipiria, ko Iehova.
Teia tuatau, e ngata i te akarongo i te ingoa o te Atua i roto i tetai are pure Katorika, e e ngata atu i te kite i te tataanga o te reira. Tika rai, kua tuku te Vatikana i tetai pepa akakite anga i te mataiti 2008 e kua akaue te pope e, “auraka e taangaanga e e tuatua” i te ingoa o te Atua i roto i te au angaanga, te au imene e te au pure a te akonoanga Katorika. Inara, te akataka meitaki maira te Pipiria e te inangaro ra te Atua ko Iehova i tona ingoa ‘kia akakiteia e pini ua ake te ao katoa nei.’—Exodo 9:16.
Kua kite te Au Kite o Iehova e e maata atu te umuumuia ra i te akamareka i te Atua i to te akaari ua anga i tona ingoa i roto i tetai are. Te au mataiti ravarai i te ao katoa, e akapou ana ratou tere atu i te 1.5 pirioni ora, te apiianga i te ingoa o te Atua e tona akakoroanga ki te au tangata. Kua akaoki katoa ratou i te ingoa o te Atua, ko Iehova ki tona ngai tau. Ta ratou Pipiria i nenei—The New World Translation of the Holy Scriptures—kua aru tikai i te tataanga o te reo mua, tei roto i reira te ingoa o Iehova mei tetai 7,000 taime. Tae mai ki teia tuatau, kua neneiia e 165,000,000 tuma kopi o te New World Translation, te katoaanga me kore tetai tuanga ua i roto i te 83 reo. Tika rai, no runga i te ingoa o te Atua ko Iehova, kare te uianga e, Eaa ra te tumu ka taangaanga ai tatou i te reira? mari ra, Eaa ra te tumu kare tatou i taangaanga i te reira?
[Tutu i te kapi 23]
Kua neneiia The New World Translation, te katoaanga me kore tetai tuanga ua i roto i te 83 reo, e tei roto i reira te ingoa o Iehova mei tetai 7,000 taime