Akara Meitaki Tetai Roia i te Au Kite o Iehova

“KARE e maata roa taku i kite no runga i te Au Kite o Iehova,” i karanga ai a Les Civin, e roia e e akaaere no tetai opati roia i Aperika Tonga. Eaa aia i akara ai i te irinakianga a te Au Kite? Eaa tana i kite mai no runga i taua au irinakianga ra? Teia tana i akakite ki te E Ara!

Eaa toou turanga akonoanga?

No roto mai au i te akonoanga ngati Iuda, inara i te akamataanga o te mataiti 1970, kua akaipoipo au ia Carol, e akonoanga Anglican tana. Kare ona manako no runga i te akonoanga, e kare e akakeuanga a te akonoanga i roto i to maua oraanga i taua taime ra. Inara, te tae anga ta maua tamaiti ko Andrew ki te varu mataiti, kua manako a Carol e ka rave maua i tetai mea kia rauka iaia tetai tu irinaki anga. Kua akakite mai tetai arataki ngati Iuda kiaku e me ka taui a Carol ki te akonoanga ngati Iuda, ka riro mai a Andrew ei ngati Iuda e ka raveia tetai akamaaraanga Bar Mitzvah me tae tona mataiti ki te 13. No reira kua akamata matou i te aere i te au epetoma ki te au apii tauianga akonoanga i ko i te tunako.

Akapeea koe te aravei anga i te Au Kite o Iehova?

Me aere mai te Au Kite ki to maua ngutupa, e akamutu poto ana au i ta ratou tuatua. E tuatua ana au e, “E akonoanga ngati Iuda taku e kare au e irinaki ana i te Koreromotu Ou.” Kua akakite mai i reira a Carol e ko tetai o tona oa e Kite, kua kite tikai aia i te Pipiria. Kua akakite mai a Carol e kia apii maata atu maua i te Pipiria. Kua ariki ua atu au i te apii ma te Au Kite.

Eaa toou manako no runga i te apii Pipiria?

Kare au i inangaro ana. Kua kitea akaouia mai toku au irinakianga ngati Iuda e kua manako au e ko au tetai o te iti tangata ikiia. Kua manako au e ‘Eaa ra ta teia au tangata ka apii mai kiaku?’ I te tuatau o ta matou uriurianga mua, kua akakite au ki te Kite tei aere mai ki toku kainga e: “Kua anauia mai au ei ngati Iuda. Kua kitea mai e au taku akonoanga, e ka mate au ei ngati Iuda. Kare aau apinga e rauka i te tuatua mai te ka taui iaku.” Kua ariki maru mai aia i toku manako. No reira, i te au po Varaire e te au po Monite, kua aere atu matou ki te apii tauianga akonoanga a te ngati Iuda e i te au popongi Tapati (me kare e rauka iaku i te kopae atu) ka apii matou ma te Au Kite. Kare e tutakiia ana ta ratou apii, kare mei te au apii rai i ko i te tunako.

Kua taangaanga au i taku Pipiria ngati Iuda no te mea kua manako au e te taangaanga ra te Au Kite i tetai urianga te tau ra ki to ratou manako. Inara, kua poitirere au e aiteite ua te manako o te nga Pipiria. Kua tauta pakari atu au i  te akapapu e kare te Au Kite e kite ana eaa ta ratou e tuatua ra.

I muri ake i te aere anga ki tetai au apiianga a te arataki ngati Iuda, kua akakite mai a Carol kiaku e i tona manako kare te arataki ngati Iuda i kite meitaki i tana Pipiria. Kua akakite mai aia kiaku e ka akamutu aia i te aere ki te au apii e kare aia e kopae i te Karaiti. No te taitaia, kua manako au i te akamutu i to maua akaipoipo. Inara, te ngaro atu anga toku taitaia, kua iki au i tetai ravenga ke mai​—ka taangaanga au i toku turanga ei roia i te akapapu kia Carol e e tarevake teia ‘akonoanga auouo e te kino.’

Kua puapingaia ainei koe?

Kua oronga mai tetai arataki ngati Iuda i tetai puka kiaku tei tataia no te patoianga i te au totou no runga i te Mesia. No tetai 18 marama kua apii maua ko Carol i taua puka ra. Kua rave ua atu rai maua i ta maua apii epetoma ma te Au Kite. Inara, ia maua e akara meitaki ra i te au totou tataki tai i roto i te puka a te arataki ngati Iuda, kua mareka kore mai au. Tei tuke ki te taumaroanga i roto i te puka, te tou putuputu ra te au totou o te Mesia i roto i te Pipiria ki te tangata okotai​—kia Iesu Karaiti. Kua marama mai tikai maua i te apiianga o te totou i roto ia Daniela 9:​24-27, tei totou e ka mama mai te Mesia i te mataiti 29 T.N. * Kua oronga mai te Kite i tetai urianga Pipiria Epera tei raro ake te urianga reo Papaa tikai i te tuatua tataki tai. Kua akara meitaki au i te au tuatua, kua rave au i taku uaorai tareanga i te au papaanga mataiti, e kua tuatua e: “Ae, te tou ra te totou ki te mataiti 29 T.N. Eaa atu i reira?”

“Ko te mataiti tera i papetitoia ai a Iesu,” i tuatua mai ei te Kite.

Poitirere tikai au! Kua umere katoa au no te tu tika tikai o te au totou Pipiria e te tu rotai o te reira.

Eaa te manako o toou au oa te tauianga koe i toou manako?

Manamanata tikai tetai pae e kua taputou mai e ka akaaravei ratou ia maua ko taku vaine ki tetai aronga te ka akaari mai e kua maroia maua kia irinaki i tetai apiianga. Inara kua akatumuia to maua irinaki papu ki runga i te au kimikimi meitaki anga e te au akamanako anga tau​—e tuke tikai mei te maroanga kia irinaki i tetai apiianga.

Eaa koe i iki ei kia riro mai ei Kite?

Te akamataanga, kua aru au i taku vaine tei riro mai ei Kite, * ki tetai au uipaanga i te Are Uipaanga Patireia. Umere tikai au te tu oaoa o te Au Kite e to ratou aroa i tetai e tetai, noatu e noea mai ratou. Kare roa au i kite ana i teia tu i roto i taku akonoanga. E toru mataiti i muri ake toku apiianga, kua papetitoia au.

Eaa toou manako no runga i taau ikianga kia riro mai ei Kite?

E akangateitei anga tikai i te karanga e, “Ko au tetai o te Au Kite o Iehova.” Me akamanako au i toku patoi anga i te tuatua mou, manako mai au e kare au e tau ana ki teia au akameitakianga ta Iehova i oronga mai kiaku. Kare rava au e tataraara ana no taku ikianga.

Eaa te au akameitakianga taau i mataora ana?

Maata ua atu. Tetai, te akaperepere nei au i te tikaanga manea i te tavini anga ei tangata pakari, me kore ei tiaki e ei puapii pae vaerua, i roto i ta matou putuputuanga. Pera katoa, kua rauka iaku i te tauturu i te Tipatimani o te Ture i te opati manga o te Au Kite o Iehova i Aperika Tonga. Kare ekokoanga, ko te akameitakianga maata rava atu, te kite mai anga ia Iehova e tana Tamaiti e te marama anga i te puapinga tikai o to tatou tuatau e te au tupuanga puapinga e akangaueue nei i teianei ao.

[Au Tataanga Rikiriki i Raro]

[Tataanga i te kapi 11]

Kua umere . . . au no te tu tika tikai o te au totou Pipiria e te tu rotai o te reira