Au Uianga ui Putuputuia

Eaa tetai au tangata i tuatua akakino ei i te Au Kite o Iehova?

Manganui te tangata kare i kite i te tika no runga i te Au Kite o Iehova. Penei kare tetai ke e reka ana i te angaanga evangeria a te Au Kite. Te tikaanga ra, te rave ra te Au Kite i teia angaanga no to ratou inangaro i te tangata tupu, te kite anga e “ko te kapiki i te ingoa o te Atu [Iehova] ra, e ora ïa.”​—Roma 10:13.

E Porotetani ainei te Au Kite o Iehova, me e Akonoanga Maro Tangata, me kore e pupu aru tangata ua?

E au Kerititiano te Au Kite o Iehova, inara kare ratou i te Porotetani e kare katoa i te Katorika​—te kite ra ratou i tetai au apiianga o taua nga akonoanga e kare no roto mai i te Pipiria. Ei akaraanga, kare te Pipiria e apii ana e te tamamae ra te Atua​—te tu tikai o te aroa​—i te tangata e tuatau ua atu i roto i te ai era. Kare katoa te reira e apii ana e e meta mate kore to te tangata me kore kia piri te au Kerititiano ki roto i te au angaanga porotiki.​—Ezekiela 18:4; Ioane 15:19; 17:14; Roma 6:23. *

“E akaaereanga mamaata te Akonoanga Maro Tangata i roto i te Akonoanga Porotetani i Marike,” i karanga ai The World Book Encyclopedia. Ko tetai au akaaerenga Akonoanga Maro Tangata, “kua taangaanga tika tikai i te ikianga i te taoonga tangata e te taoonga porotiki i roto i te au irava Pipiria.” Kare te reira akatakaanga e tau ana ki te Au Kite o Iehova. Mei tei taikuia, kua patoi ratou i te porotiki e kare e maro atu i to ratou manako ki runga i tetai ke na roto i te angaanga porotiki me kore na tetai au ravenga ke. Mari ra, e pukapuka ana ratou ki te tangata, tei matauia tetai ki tetai, te uriuri manako anga e te oronga anga i te akapapuanga, te aru anga i te au Kerititiano mua.​—Angaanga 19:8.

Te pupu aru tangata ua, e pupu kare e aru ana i te akonoanga a te katoatoa, me kore e pupu tei akaatea mai i te akatupu i tetai akonoanga ou. Kare te Au Kite o Iehova i akaatea mai mei roto i tetai akonoanga. Kare ratou i te pupu aru tangata ua.

Eaa te raveia ra i ko i te au uipaanga a te Au Kite?

Ta ratou au uipaanga, e akatueraia ra ki te katoatoa, no runga tikai i te au apii anga Pipiria, e ka rauka ua i te katoatoa i te paupau mai. Tetai uipaanga a ratou i te epetoma, e Apii Orometua Teokaratiki, te tauturu ra i te au mema o te putuputuanga kia akatupu i te tu karape no te apii anga, te tatau anga, e te kimikimi anga. Tetai uipaanga, e akoanga Pipiria e 30 miniti, no runga i tetai tumu manako te ka inangaro tikai mai te aronga kare i te Au Kite.  Aru mai, te apii anga i te Pipiria na roto i te makatini Te Punanga Tiaki. E akamata ana e e akamutu ana te au uipaanga ki te imene e te pure, e kare e patipati moni ana me kore e pati aereia ana te mereki koi moni.​—2 Korinetia 8:⁠12.

Akapeea te angaanga a te Au Kite o Iehova me tutakiia?

E tutakiia ana ta ratou angaanga na roto i te au tauturu oronga ua. Kare te Au Kite e tiati ana i te au angaanga papetito, akaipoipo, tanu mate, me kore tetai atu angaanga akonoanga. Kare katoa ratou e tutaki ana i te tuanga ngauru. Ko tetai ua atu e inangaro ra i te oronga i tetai moni ka tuku muna ua i te reira ki roto i te pia akaputuanga i roto i te Are Uipaanga Patireia. E nenei ana te Au Kite o Iehova i te puka Pipiria e taangaanga ana ratou, kia iti mai te moni ka pou, e to ratou Are Uipaanga Patireia e te au opati manga tau ua, te maataanga na te aronga tauturu e akatu ana.

Te ariki ra ainei te Au Kite o Iehova i te vairakau rapakauanga?

Ae. Te tikaanga, e kimi ana ratou i te rapakau anga meitaki atu no ratou uaorai e to ratou au akaperepere. Pera katoa, maata te Au Kite e angaanga ra i roto i te ngai rapakauanga ei au neti, aronga tauturu i te aronga maki, au taote, e te au taote vavai. Inara, e patoi ana te Au Kite o Iehova i te pamu toto. Kua akakite mai te Pipiria e ‘auraka e kai i te toto.’ (Angaanga 15:​28, 29) Te mea umere, e maata ua atu te au taote te irinaki ra i te rapakauanga kare e toto e ko te “rapakauanga meitaki rava atu,” e na roto i te reira e kopaeia ai te au tu kino no te taangaanga anga i te au mea e toto to roto.

[Tataanga Rikiriki i Raro]

[Pia/​Tutu i te kapi 7]

MAATA TE TI AKANGATEITEI

Tuke rai te taoni o Bejucal de Ocampo i te tua tonga o Meiko. “Maataanga o te tangata e Au Kite no Iehova,” i na tetai ripoti ei i roto i te nutipepa Excélsior, te akakite katoa anga e: “Maata te tu akangateitei a te au akonoanga e te kavamani. . . . Kare te au tangata e kai kava e e kai avaava akaou ana, teianei te imene ra ratou e te tatau ra i te Pipiria. E akangateitei katoa ana ratou i te au mana akaaere.”

Noatu te au akonoanga tukeke i roto i te taoni, “kare e tupu ana te manamanata e te pekapeka i roto i te au akonoanga,” i akakite ei te ripoti. Kua akakite katoa te reira e: “Kare e ngai no te makitakita, e kare te au akonoanga tukeke e arairai ana i te au tangata tupu i te aravei i tetai e tetai . . . E tuatua ua ana te pamiri tataki tai i ta ratou akonoanga, e kare teia e arairai ana i te au tangata i te noo kapiti ma te au. Kare i te mea umere ki tetai ua atu tangata e e maata tikai te Au Kite o Iehova i Bejucal.” Tei maata atu, ‘mako tikai te kakau, meitaki tikai te maka, e e meitaki tikai te tu o ta ratou tamariki i te apii,’ i akakite ei tetai puapii o te apii tua rua i reira, kare aia i te Kite.

[Tutu i te kapi 6]

[Tutu i te kapi 7]

[Tutu i te kapi 7]