Eaa Taau i Kite no Runga i te Au Kite o Iehova?

“Maata taku i tatau no runga i te Au Kite o Iehova i runga i te Internet, kua rongo au i tetai au tuatua koumuumu, e e maata taku au tuatua akavaavaa i akarongo ana,” i tata ei tetai vaine apiipii ripoti i Tenemaka. “Tei tupu mai, kua manako ekoko tikai au no runga i te Au Kite o Iehova”

KUA uiui taua vaine ripoti ra i tetai pamiri e Au Kite. Eaa tei tupu mai? “Kua taui toku manako no runga ia ratou te tomo anga au ki roto i to ratou kainga!” i tata ei aia. “Penei kare te au tangata i kite meitaki ia ratou, me kore kua viviki ua tatou i te akava ia ratou. Ko au tetai i akapera ana. E kua kite mai au e kua tarevake au.”​—Cecilie Feyling, no te Jydske Vestkysten.

No runga i tana au angaanga ma te Au Kite o Iehova, kua kite mai tetai tangata tauturu no tetai au toa mamaata i Europa e e aronga angaanga tika ratou. Tei tupu mai, kua kimi aia i te Au Kite ei aronga angaanga nana.

E tika rai, kua kite meitakiia te Au Kite o Iehova no ta ratou angaanga tutu aere. Kua kite mai ratou i tetai aronga kare e inangaro i te uriuri i te Pipiria, tetai aronga e mataora ana i tetai uriuri anga. E tika, vaitata rai i roto i te au enua pouroa, tere atu i te itu mirioni tangata e apii putuputu ana i te Pipiria ma te Au Kite, e i muri mai kua riro mai tetai o teia aronga ei au puapii Pipiria. Ei akaraanga, i Marike, kua akakite mai tetai ripoti a tetai au akaaerenga akonoanga e i roto i te 25 akonoanga mamaata, e 4 rai tei tupu maata atu, e ko te Au Kite o Iehova tetai ia ratou.

Eaa ra te au mirioni tangata i apii ei i te Pipiria ma te Au Kite? Akapeea teia au apii me raveia? Te umuumuia ra ainei te aronga apiipii kia riro mai ei Au Kite? Noatu e kare koe e inangaro ana, e tikaanga toou i te kite i te au pauanga tika. No reira auraka e akarongo taringa ua ki te au tuatua akavaavaa, me kore te au tuatua koumuumu, inara e kimi i te tikaanga tikai. Te karanga ra te Pipiria i roto ia Maseli 14:15: “Te akarongo ra te kite kore i te au tuatua katoa ra: te akara meitaki ra te tangata akono ra i tona takainga.”

Te irinaki nei matou e ka tauturu atu teia itiu o te makatini E Ara! ia koe kia marama meitaki tikai no runga i te Au Kite o Iehova. E tika, i te mea e te tatau ra koe i teia makatini te akakite maira i toou manako tau e te maoraora. Eaa ka kore ei e rave i teia: Ia koe e tatau ra i nga atikara e a ka aru mai e te au pia, e akara i te au irava tei taikuia i roto i taau uaorai Pipiria. * Mei ta te Pipiria e karanga ra, ko te rave anga i teia e tu pakari e e “meitaki.”​—Angaanga 17:11.

[Tataanga Rikiriki i Raro]