Eaa ta te Au Kite o Iehova e Irinaki Ra?

Kare te au irinakianga a te Au Kite o Iehova i te mea muna, no te mea ka rauka ta ratou puka i roto i te au anere ua atu reo. I raro ake, ko tetai akakiteanga poto no ta ratou au irinakianga maata.

1. Te Pipiria Te irinaki ra te Au Kite e ko “te au tuatua tapu katoa i tataia ra, e mea akauruia mai e te Atua.” (2 Timoteo 3:16) Kua tata a Jason BeDuhn, e poropeta no te apii akonoanga e: “Kua [akatumu te Au Kite o Iehova] i ta ratou irinakianga e te au angaanga ki runga tikai i te Pipiria e kare i tamanako ua eaa to roto i reira.” Kua akarotai ratou i to ratou irinakianga ki te Pipiria; kare ratou i uri i te reira kia tau ki to ratou uaorai manako. I taua taime rai, te kite ra ratou e kare te au mea ravarai i roto i te Pipiria e tau kia taangaanga tika tikaiia. Ei akaraanga, e mea akatutu ua te itu ra o te anga mai anga, e taiku ra ki tetai au tuatau roa.​—Genese 1:31; 2:4.

2. Tei Anga Kua tapa te Atua mou i tetai ingoa nona uaorai​—ko Iehova (me kore, Yahweh, tei taangaangaia i roto i te Jerusalem Bible a te Akonoanga Katorika Roma e tei arikiia e tetai aronga apii Pipiria o teia tuatau)​—te akatuke anga iaia mei te au atua pikikaa. * (Salamo 83:18) Te tataanga Epera o te ingoa o te Atua ka kiteaia mei tetai 7,000 taime i roto i te tataanga mua o te au Tuatua Tapu. Te akataka anga i te puapinga o taua ingoa ra, kua tuatua a Iesu i roto i tana pure akaraanga e: “Kia tapu toou ingoa.” (Mataio 6:9) Te umuumu tau ra te Atua i te akamorianga kiaia anake ua. No reira, kare te Au Kite e taangaanga ana i te au tiki i roto i ta ratou akamorianga.​—1 Ioane 5:21.

3. Iesu Karaiti Koia te Akaora, ‘te Tamaiti a te Atua,’ e te ‘Tama mua o te au mea ravarai i angaia.’ (Ioane 1:34; Kolosa 1:15; Angaanga 5:31) No te mea kua angaia mai aia, kare aia i tetai tuanga o te Toru Tai. Kua tuatua a Iesu e: “E maata oki toku Metua iaku.” (Ioane 14:28) I noo ana a Iesu i te rangi i mua ake ka aere mai ei aia ki te enua nei, e i muri ake tona mate akaatinga  e te akatuia anga, kua oki aia ki te rangi. “Kare ua e tangata e tae ki te Metua ra, mari ra ei [iaia ra].”​—Ioane 14:6.

4. Patireia o te Atua E kavamani tika tikai teia i te rangi ma tetai Ariki​—ko Iesu Karaiti​—e te 144,000 aronga ka tutara kapiti kiaia, tei “okoia no roto i teianei ao.” (Apokalupo 5:​9, 10; 14:​1, 3, 4; Daniela 2:44; 7:​13, 14) Ka tutara ratou i rungao i te enua, tei takoreia te au kino ravarai e ka nooia e te au tangata mataku Atua e mirioni ua atu.​—Maseli 2:​21, 22.

5. Te enua Te akakite ra a Koheleta 1:4 e: “Te enua nei, te vai ua nei rai ïa.” I muri ake te takore anga o te aronga kino, ka akariroia te enua ei parataito e ka nooia e te au tangata tuatua tika e tuatau ua atu. (Salamo 37:​10, 11, 29) E akatupuia ai ta Iesu tuatua i roto i te pure e “kia akonoia toou anoano i te enua nei.”​—Mataio 6:10.

6. Totou Pipiria ‘Kare te Atua e pikikaa ana.’ (Tito 1:2) No reira, e tupu ua ana tana i totou mai, pera katoa te au totou Pipiria no runga i te openga o teianei ao. (Isaia 55:11; Mataio 24:​3-14) Koai ma ka ora mai i te takoreanga e aere maira? “Ko tei akono ra i to te Atua ra anoano, e tika ïa i te ora anga e tuatau ua atu,” i karanga ai a 1 Ioane 2:17.

7. Au mana akaaere “Ka apai mari i ta Kaisara ra kia Kaisara; e ta te Atua ra, e apai ïa ki te Atua,” i karanga ai a Iesu. (Mareko 12:17) No reira, te akarongo ra te Au Kite o Iehova ki te au ture o te enua me kare teia e patoi ana i te au ture a te Atua.​—Angaanga 5:29; Roma 13:​1-3.

8. Tutuanga Kua totou a Iesu e ka tutu aereia “te evangelia o te basileia nei” i te enua katoa i mua ake ka ope ei teianei ao. (Mataio 24:14) E akangateitei anga tikai ki te Au Kite o Iehova i te piri atu ki roto i taua angaanga akaoraanga. E tika, me ka akarongo mai te tangata me kare, na ratou uaorai ia ikianga. Te karanga ra te Pipiria e: “E tei anoano ua ra, ka rave ua mai aia i te vai ora.”​—Apokalupo 22:17.

9. Papetitoanga E papetito ua ana te Au Kite o Iehova i te aronga anake ua tei apii meitaki tikai i te Pipiria, e te inangaro ra i te tavini i te Atua ei Au Kite nona. (Ebera 12:1) Te akatutu ra teia aronga i ta ratou akatapuanga ki te Atua na te taruku anga ki roto i te vai.​—Mataio 3:​13, 16; 28:19.

10. Te taoonga orometua “E taeake anake oki kotou katoa,” i na Iesu ei ki tana au pipi. (Mataio 23:8) Kare e pupu orometua o te au Kerititiano mua e te aronga tata Pipiria. Ko teia te akaraanga Pipiria ta te Au Kite o Iehova e aru ana.

[Tataanga Rikiriki i Raro]

[Tutu i te kapi 8]

[Tataanga i te kapi 8]

“E maata oki toku Metua iaku.”​—Ioane 14:28

[Tutu i te kapi 9]

[Tataanga i te kapi 9]

“E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.” ​—Mataio 24:14