Te Manako o te Pipiria

Ka Tau Ainei te Vaine Kia Riro ei au Orometua?

“UMERE tikai au e te riri, i te mea kare i taui ake te turanga o te vaine no runga i te akamana anga ia ratou,” i tata ai tetai vaine Katorika ki te nuti pepa USA Today. Maata te tangata mei te reira rai to ratou manako. No te mea i roto i tetai au akonoanga te tavini ra te au vaine ei orometua, kau taunga, epitikopo, e ei au rapi.

Te au akonoanga o nga tua e rua o te taumaroanga​—tei arai eiaa te vaine e akariroia ei orometua e tei akatika ia ratou kia ako mai i runga i te atarau—​karanga ratou e te aru ra ratou i te au Tuatua Tapu. Tera ra kare te Pipiria e turu ana i nga manako e rua. No teaa ra? Ei pau, ka akamanako tatou na mua e akapeea ana te Pipiria me taangaanga i te kupu “orometua.”

Au Orometua i te Anere Mataiti Mua

Eaa te aiteanga o te kupu “orometua” kia koe? Maata te ka manako viviki ua e, e arataki akonoanga, tane me kore vaine, e akaaere ra i te putuputuanga no te akamorianga. Inara e maata atu te au turanga e taangaanga ana te Pipiria i teia kupu. Akamanako ana i te vaine Kerititiano ia Phebe, ta Paulo i akakite mai e ko “to tatou tuaine ia Phebe, . . . e diakono aia no te ekalesia i Kenekerea ra.”​—Roma 16:1.

Te kite ra koe ia Phebe e tu ra i mua i te putuputuanga i Kenekerea, te rave i tetai akoanga? E akamanako meitaki ana e, eaa tikai te angaanga orometua ta Phebe i rave ei? Roto i tana reta ki to Philipi, kua tata a Paulo e ko tetai au vaine kua “angaanga kapiti e au . . .  i te akatotoa aere i te tuatua meitaki.”​—Na matou te tuatua arara; Philipi 4:2, 3, Contemporary English Version.

Te mataara maata e akatotoa aere ana te au Kerititiano i te anere mataiti mua i te tuatua meitaki koia oki “i te ngai tangata, e i tera are i tera are.” (Angaanga 20:20) E au orometua te aronga e piri ana ki taua angaanga ra. Te kapiti maira te reira i te au vaine mei ia Peresila. Koia e tana tane, ‘kua akakite tikai atura i te tuatua a te Atua’ ki tetai tangata mataku Atua kare i papetitoia ake ei Kerititiano. (Angaanga 18:25, 26) Mei ia Phebe, e orometua tukatau rai a Peresila​—mei te au vaine e manganui.

Angaanga Ngateitei

E angaanga iti ainei te angaanga orometua i te ngai tangata, kare e puapinga roa ana no reira i tukuia na te vaine, kareka te angaanga puapinga atu o te akaaere i te putuputuanga na te tane e rave? Kare, e e rua ia tumu. Mea mua, akataka meitaki mai te Pipiria e pouroa te au Kerititiano​—e te au tane atu, e apainga puapinga ta ratou i roto i te putuputuanga—​kia piri ki te angaanga orometua i te ngai tangata. (Luka 9:1, 2) Te rua, ko te angaanga orometua i te ngai tangata te mataara tumu i mua ana e i teianei, e akatupu ana te au Kerititiano tane e te  vaine i te akauenga a Iesu kia aere “e akariro i to te pa enua katoa ei pipi . . . Ma te apii atu ia ratou.”​—Mataio 28:19, 20.

E tuanga puapinga ke mai ta tetai au vaine i roto i te putuputuanga. Kua tata a Paulo e: “Koia katoa te au vaine pakari, . . . ei aronga apii atura i te tuatua memeitaki; Kia ako marie ratou i te au vaine ou ra kia aroa i ta ratou au tane, kia aroa oki i ta ratou au tamariki.” (Tito 2:3, 4) No reira, e tuanga ngateitei ta te au vaine tukatau i roto i te oraanga Kerititiano kia tauturu i te au vaine mapu e te tukatau kore, kia pakari i te pae vaerua. E angaanga ngateitei katoa te reira e te puapinga.

Apii i Roto i te Putuputuanga

Inara kare e ngai i akakiteia i roto i te Pipiria e kia tu te vaine i mua i te putuputuanga i te apii. Mari ra, kua ako a Paulo ia ratou “kia muteki ua i roto i te au uipaanga.” No teaa ra? Tetai tumu, i tata ai aia, koia oki kia raveia te au mea ravarai “ma te meitaki e te tau.” (1 Korinetia 14:34, 40, Today’s English Version) No te putuputuanga kia angaanga meitaki ma te tau, kua tuku te Atua i te angaanga apii ki tetai pupu okotai ua. Akara ana ra e, kare te apainga ei akaaere e orongaia ki tetai tangata i roto i te putuputuanga no te mea e e tane aia; ka oronga uaia te reira ki te au tangata tei tau meitaki tikai. *​—1 Timoteo 3:1-7; Tito 1:5-9.

E tuanga angaanga ngateitei kore ainei ta te Atua i oronga mai na te vaine? Kare. Akamaara e kua iki te Atua ko Iehova ia ratou kia rave i tetai angaanga puapinga​—te akakitekite aere no runga iaia ki te katoatoa. (Salamo 68:11) Rotopu i te Au Kite o Iehova i teia tuatau, e au orometua tane e te vaine te tauturu nei i te mirioni ua atu kia tataraara e kia rauka te ora. (Angaanga 2:21; 2 Petero 3:⁠9) Kare tera i te angaanga iti!

Te akanoonooanga no te au tane e te au vaine te akatupu ra te reira i te au, kareka ra kia akaariia rai te akangateitei kia raua roa ai. Ei akatutu: E angaanga kapiti ana te mata e te taringa i te tauturu i tetai tangata kia aere ki tetai tua i te mataara. Mei koia rai me akatupu te au tane e te au vaine i te anoano o te Atua kia tau ki te tuanga angaanga tei tukuia na ratou, ka akameitaki mai te Atua i te putuputuanga ki te au.​—1 Korinetia 14:33; Philipi 4:9. *

[Au Tataanga Rikiriki i Raro]

I MANAKO ANA AINEI KOE?

● Akapeea te au vaine i roto i te putuputuanga Kerititiano i te anere mataiti, i te apii anga?​—Angaanga 18:⁠26.

● Koai ma tei ikiia ei akaaere i te putuputuanga?​—1 Timoteo 3:1, 2.

● Eaa to te Atua manako i te angaanga orometua a te au vaine Kerititiano i teia tuatau?​—Salamo 68:11.

[Tataanga i te kapi 29]

“Kua tuku maira te Atu ra i te tuatua, e na tetai nuku tamaine maata i akakite.”​—SALAMO 68:11