E Mea Maaniia Ainei?

Ko Anga Karape a te Kuku Roroa Kokoi

● Akaraanga e kare e ketaketa ana no te ko na roto i te one, e rauka ana i te kuku roroa kokoi i te ko viviki ki roto i te one ketaketa e kua kapikiia e ko “te Ferrari ko i raro i te vai.” Kua umere tikai te aronga kimikimi. “Kua kite matou e te rave ra ratou i tetai mea karape tikai,” i karanga ai a Anette Hosoi, e poropeta i ko i te Massachusetts Institute of Technology. Akapeea ana te kuku roroa kokoi i te ko viviki anga?

Akamanako ana: Ka nekeneke te kuku roroa kokoi i tona vaevae me ko ki roto i te one, te akatupu anga i tetai vaaruarua kia ki viviki i te vai e te one. E nekeneke ana te kuku ki runga e ki raro iaia e akatuera ra e e topiri ra i tona anga. E akatupu ana i te one kia vaivai kia mama ua i te kuku i te ko ki raro. E ko ana te kuku roroa kokoi mei tetai 70 teni mita ki te 1 teni mita te viviki i te tekoni okotai. Me mou ana ki roto i te one, kare e rauka i te uuti mai i te kuku ki vao. Tika rai, te akamanako anga i te ririnui o tona ko anga iaia ki roto i te one, e tai ngauru taime ririnui atu te kuku i te au tutau meitaki rava atu ta te tangata i maani.

Kua akakeuia te au enitinia e te kuku roroa kokoi kia maani i ta ratou e kapiki ra e ko te tutau “karape” mua. “Ka tuera e ka topiri te reira, e ka neke ki runga e ki raro, mei te kuku tika tikai,” i karanga ai a Hosoi. Ka riro taua tutau ketaketa e te ririnui ei mea puapinga i runga i te au pai ruku tai kimikimi, te au pai tari inu, e te au matini ko one e takore ana i te au maina.

Eaa toou manako? E mea tupu ua mai ainei te ko anga karape a te kuku roroa kokoi? Me kore, e mea maaniia ainei?

[Au Tutu i te kapi 18]

Te aru ra teia akatutuanga o te tutau “karape” i te ravenga ko anga a te kuku roroa kokoi

[Au Akameitakianga]

Razor clams: © Philippe Clement/naturepl.com; “smart” anchor: Courtesy of Donna Coveney, Massachusetts Institute of Technology