Ta Tetai ke e Tuatua Ra
Ta Tetai ke e Tuatua Ra
Varani “E au tangata akangateitei te Au Kite o Iehova i te ture a te Repapuriki. . . . Kare ratou e aati ana i te ture. E angaanga ana ratou, e tutaki ana i te tero, e turuturu ana i te turanga pae moni o to matou enua e te oronga i te au apinga tauturu. E mataora tikai te kite atu i te tu rotai o teia au tangata mei roto mai i te au iti tangata e te au enua tukeke, e uipa kapiti ra ma te au. . . . Naringa te katoatoa e Au Kite no Iehova, kare a tatou angaanga ei akava.”—Vaa tuatua o te taokotaianga akava i Varani.
Ukarania “Te apii ra te Au Kite o Iehova i te au kaveinga tau o te Pipiria ki ta ratou tamariki. Te apii ra ratou i ta ratou tamariki kia kopae i te au tu, te au angaanga, te au peu, [e] arikiia ra e teianei ao ei mea tau, te ka takino i te au tamariki e tetai ke. No reira te akamatakite ra ratou i ta ratou tamariki i te au kino no te kai apinga akakona, te kai avaava e te inu maata i te kava. Kua kite ratou i te puapinga no te tu tika e te angaanga pakari. . . . Te apii ra te Au Kite o Iehova i ta ratou tamariki i te au tu akono tau, kia akangateitei i te mana akaaere, e tetai atu au tangata e ta ratou apinga e kia riro ei aronga akono i te ture.”—The History of Religion in Ukraine, tataia e te Poropeta ko Petro Yarotskyi.
Itaria “Toru ngauru tauatini i te Olympic Stadium e noo muteki ra e te akarongo ra . . . Kare e tita, kare e turituri, kare e vaa maata. Ko te tu te reira i nanai i te Olympic Stadium . . . Kare e tu tau kore, kare e avaava, kare e anga poti [kava]. Te tuera ra te au Pipiria, te tata ra te au tangata, e te noo muteki ra te tamariki.”—L’Unità, ripoti anga no runga i tetai uruoaanga a te Au Kite o Iehova i Roma.
Peritane “Kua tuatua te Tiakono Maata o Cheltenham e te anoano ra [te Church of England] i tetai pupu tangata maroiroi tikai kia aere mei tetai ngutupa ki tetai mei te Au Kite rai o Iehova.”—The Gazette, Gloucester Diocese.
Neterani Kua oronga te au tangata i te pae mai i te Are Uipaanga Patireia i roto i te oire o Leeuwarden i tetai reta ki te Au Kite te karanga ra e: “Te inangaro nei matou i te akameitaki ia kotou no to kotou akakeuanga meitaki, kua manea te [Mataara Noorder] Noorderweg. E meitaki ua ana te akamanea o to kotou au mema, e e mako tikai to ratou tu. E mako rai te tamariki, kare te aronga mamaata e aati ana i te ture me paka i to ratou motoka, kare ratou e pepei tita ana i runga i te mataara, e e ma ua ana e te manea te ngai takapini i te Are Uipaanga Patireia. Te irinaki nei matou e ka roa mai kotou, no te mea mataora tikai matou ia kotou.”
Meiko Kua tuatua a Elio Masferrer, e poropeta e e tangata kimikimi i te Apii o te Pa Enua no te Tu o te Tangata e te Tuatua Enua, e kua tauturu te Au Kite i te au tangata tei “rokoia e te tumatetenga i roto i te pamiri, mei te tauati, te takinokino i te pamiri, te inu maata i te kava e te apinga akakona.” Kua akakite aia e ko te au apiianga a te Au Kite “te akangateitei ra i te au tangata tei manako puapinga kore” e te tauturu ra ia ratou “kia kore e maata te au manamanata na te rave anga i te au mea te akamareka ra i te Atua.”—Nutipepa Excélsior.
Paratiri Kua ripoti mai tetai nutipepa e: “Meitaki tikai te akaaerenga a te Au Kite o Iehova. E ma ua ana te au ngai e akaputuputu mai ana ratou. Mako tikai te akaaere anga o te au mea ravarai . . . Me oti ta ratou angaanga, ma rava atu te reira ngai i to mua atu ana. Te tuatau o te au akoanga, muteki tikai te au mea. Kare e tangata e oparapara ana me kore e tukituki atu ana ki runga i tetai. Mako tikai te tu. . . . E akonoanga tau tikai te reira. Kua kite ratou te aiteanga no te akamorianga i te Atua.”—Comércio da Franca.
Irinaki tikai te Au Kite o Iehova e ko Tei Anga mai tei kite meitaki atu i tetai ua atu tangata i te au kaveinga kia aru te au tangata tana i anga. (Isaia 48:17, 18) No reira, te oronga ra te Au Kite i te akameitakianga kiaia me akameitakiia mai to ratou tu e tetai ke. Kua tuatua a Iesu e: “Koia katoa to kotou mārama, kia kakā ïa ki mua i te aroaro o te tangata nei, kia akara ratou i ta kotou angaanga meitaki, e kia akameitaki ratou i to kotou Metua i te ao ra.”—Mataio 5:16.
[Tataanga i te kapi 4]
“Te apii ra te Au Kite o Iehova i ta ratou tamariki i te au tu akono tau . . . e kia riro ei aronga akono i te ture”
[Tutu i te kapi 5]
[Tataanga i te kapi 5]
“ . . . Au tangata mei roto mai i te au iti tangata e te au enua tukeke, e uipa kapiti ra ma te au . . . ”