Tomo Au ki te Oroanga Meitaki Atu o Toku Oraanga

Akakiteia e Karl-Erik Bergman

E mataora ua ana au i te oro viviki. E tu natura ia kiaku, no reira kua riro te oro viviki ei mea puapinga roa atu i roto i toku oraanga.

KUA tomo au ki roto i tetai karapu tipoti i te mataiti 1972, e 17 oku mataiti. Kare i roa ana kua kite au e e maata te angaanga i mua iaku, me ka riro mai au ei tangata oro meitaki tikai. Kare e rava ua te tu natura kia riro ei tiamupeni oro viviki. Inara kua papa au no te reira.

I toku 22 mataiti anga, kua o atu au ki roto i te pupu oro o te pa enua o Vinirani. Tera mai mataiti, noku te ora meitaki rava atu i tetai ua atu tangata oro viviki e 100 mita i Vinirani. Kare ra i rauka iaku i te itae i toku akakoroanga no te mea kua kino toku uaua i muri i te poo vaevae e te au uaua i muri i te turi. Inara, no toku inangaro tikai i te oro kua tereni au i te aronga oro meitaki tikai. I te mataiti 1982, kua parani au i te neke ki California i Marike i te apii i ko i te univetiti e ngai meitaki te reva, i te aruaru i te au angaanga tipoti. Kua oko katoa au i tetai tiketi pairere.

Te Mea i Taui ei Toku Oraanga

I tetai aiai i mua ake i te ra ka rere ei au ki California, kua tangi mai te oe o toku ngutupa. Kua vai au i te ngutupa, kite atu au e rua nga vaine e nga Kite no Iehova. E maru e e meitaki tikai to raua tu, e nga tu ka inangaro koe i te kite i roto i tetai tangata oro. Kua pati atu au ia raua kia tomo mai, e kua noo matou ki raro e kua pukapuka. I muri ake i tetai uriuri akamaroiroi anga, kua akaruke mai raua i tetai puka Ka Rauka ia Koe te Ora Mutukore i Paradaiso i te Enua Nei. * Kua akamata au i te tatau i te reira. Tae anga au ki rotopu, kua kite mai au e te akakite nei teia i te tuatua mou. Kua oki mai te nga vaine, e kua ui au kia raua akapeea au e riro mai ei ei Kite no Iehova. Kua pau mai raua e ka anoanoia au kia apii i te Pipiria.

Kua ariki au i te apii Pipiria e kua aere katoa au ki te au uipaanga ma te Au Kite i te Are Uipaanga Patireia i Vantaa, te ngai i noo ana au. Kua kite mai au e ko te mea e apiiia ra kua akatumuia ki runga i te Pipiria. Tika rai, kua akamata te tuatua mou Pipiria e apii ra au i te taui i toku au manako no runga i te au mea puapinga tikai o te oraanga. No reira kua oki atu au ki te ngai tutakianga patete i te tiki i taku moni no te tiketi. Tetai tuanga o te moni kua oko mai au i tetai pereue e te piripou no te uipaanga e tetai kiri puka no taku Pipiria e te au puka. Kua papetitoia au ei Kite no Iehova i te uruoaanga i Helsinki i te mataiti 1983.

 Piri Mai Tetai Aronga Oro Kiaku

Iaku e apii ra i te tuatua mou Pipiria, kua akakite maoraora au i te reira ki toku au oa. Kua poitirere ratou. E tika rai, kare i roa ana kua tuatua aereia e kua nenevaia au. Kua akamata tataki tai toku au oa i te kopae iaku. I muri ake toku papetitoanga, kua aravei au i toku au oa oro i te ngai oroanga, no te mea e tereni putuputu ana au kia meitaki ua toku kopapa. Kua tauturu ta matou uriuri anga kia kite mai ratou e noatu e kua taui au, kare au i nenevaia.

Kare i roa ana, kua marama mai te maataanga o teia aronga oro e te tau ua ra taku i tuatua e e puapinga no te akamanako anga. Kua kite mai ratou e kua ngaro taku tuatua viivii e toku tu riri. Kua inangaro tetai ia ratou i te kite maata atu no runga i te Pipiria. Mataora ana au i te akaari ki tetai ke e te akaaite ra te Pipiria i te oraanga o te Kerititiano ki te angaanga oro. Tei roto tatou i te oro anga no te korona o te ora mutu kore.​—2 Timoteo 2:5; 4:7, 8.

Ko te tika, tei roto te oraanga puapinga tikai e te mataora i te rave anga i te mea e akamareka ra i Tei Anga mai ia tatou, kare no te re anga i roto i te au angaanga oro. Kua akakeu taku uriurianga i tetai aronga oro kia akara akaou i ta ratou au akakoroanga, e e maata tei ariki mai i te tuatua mou Pipiria tei taui i toku oraanga. Te mea mataora, manganui tei akaari i taua tu maroiroi ra te tavini anga i te Atua mei ta ratou i rave i roto i te angaanga oro.

Ko Yvonne tetai ia ratou, e vaine meitaki tikai i te oro i te 800 mita. Koia te vaine oro viviki roa atu no taua oro anga i Scandinavia e kua peke iaia te rekoti o te pa enua o Vinirani. Kua puapingaia aia ei mata no Vinirani no te au angaanga oro i Europa. No ta maua uriurianga, kua kite mai a Yvonne i te puapinga kore i te itae anga kia rongonui i roto i te ao o teia tuatau. Kua kite mai aia mei ta te Pipiria e apii ra e ka ngaro ke teianei ao, e ka akatuera mai i te mataara no te ao ou o te Atua.​—1 Ioane 2:⁠17.

Kare i roa ana kua ariki a Yvonne i tetai apii Pipiria. I taua taime ra, te aere kapiti ra raua ko Jouko, e mema meitaki tikai no te pupu oro no te pa enua o Vinirani. Kua riro ana aia ei mata no Vinirani i Europa e no te au oro anga tiamupeini i te ao. Kare i roa ana, kua neke atu a Yvonne raua ko Jouko ki Marike i te rave ua rai i ta raua angaanga oro.

Ia raua i reira, kua apii ua rai a Yvonne i te Pipiria, e kua piri mai a Jouko. Kua akamata aia i te apii kia kimi i tetai tarevake kia taui i to Yvonne manako. Aere ua rai, kua o katoa te tuatua mou Pipiria ki roto i te ngakau o Jouko. Kua akaipoipo a Yvonne raua ko Jouko e i muri mai kua akatapu i to raua oraanga ki te Atua, te akatutuanga i teia na roto i te papetitoanga ki roto i te vai. I teia ra e nga painia raua, e nga orometua tamou no te Au Kite o Iehova.

Kua akamata katoa au i te apii i te Pipiria kia Barbro, e tiamupeini no Vinirani i roto i te pupu oro a te vaine no te 400 mita. Kua riro ana aia ei mata no Vinirani i Europa no te au angaanga oro. Kua neke atu i reira a Barbro raua ko tana tane, ko Jarmo ki Tuitene, e tangata rere teitei na te taangaanga anga i te pou auri. I reira kua rave ua atu a Barbro i tana apii Pipiria, e kua piri mai a Jarmo. Kua kimi ana raua i te akakoroanga o te oraanga, e i muri ake i te kite anga i te tuatua mou Pipiria, kua papetitoia raua i Tuitene. Kare i roa ana, kua riro mai a Jarmo ei tangata maoro uaua, e ei nga tokorua akaipoipo, maroiroi tikai raua i roto i te angaanga orometua. Te tavini nei a Jarmo ei tangata pakari i roto i te putuputuanga Kerititiano.

Aru mai ko Heidi, e tamaine meitaki tikai i te oro, te mapu ua ra. Ei tangata tereni nona, kua kite au i tona inangaro i te Atua. No reira tetai ra kua tuatua atu au kiaia no runga i te au apiianga Pipiria no te Patireia o te Atua e te au akameitakianga ta te reira ka apai mai ki te enua nei. Kua ui atu au, “Te irinaki ra ainei koe e ka tupu tikai teia au akameitakianga tei taputouia no tatou?”​—Salamo 37:11, 29; Mataio 6:9, 10.

“Ae,” i pau mai ei aia. Kua inangaro aia i te apii i te Pipiria. No reira kua pati au i tetai tuaine Kerititiano kia apii kiaia. I tetai au mataiti i muri mai, kua akatutu katoa a Heidi i tona akatapuanga ki te Atua na te papetitoanga ki roto i te vai. Kare i roa ana, kua riro mai aia ei vaine manea i te pae vaerua e kua riro mai ei vaine naku. E tokorua meitaki tikai aia, te tauta maroiroi anga i te tavini i te Atua​—e tautaanga, naringa i akakoroia no te angaanga tipoti ka riro ei tauturu maata iaia kia riro ei vaine oro meitaki tikai.

 Te akamataanga kare toku teina ko Peter, tei o katoa ana ki roto i te au angaanga tipoti, i reka mai ana i te akamata anga au i te apii i te Pipiria. No reira kua oake atu au kiaia tetai kopi o te puka Ora Mutukore. I muri mai kua aere mai aia e kua tuatua mai kiaku e: “Kua akamata au i te tatau i teia puka, inara kare au e marama ana i te au mea ravarai. Ka rauka ainei ia koe te tauturu mai iaku?” Kua pati au i tetai Kite kia apii kiaia, e i muri ake i te apiianga e a marama, kua papetitoia aia. I muri mai kua akaipoipo aia, e te tavini nei tana vaine ei painia.

Te Oro Nei Rai i te Oro Anga

I mua ake ka papetitoia ai au, kua inangaro tikai au kia riro mai ei mitinari. I muri poto ua ake i toku papetitoanga, kua akamata au i te tavini ei painia. Marama au e me tei roto koe i te oro anga no te ora, ka tauta pakari tikai koe. Kua tuku maua ko taku vaine ko Heidi i te pepa patianga kia aere ki Gileada, e apii mitinari na te Au Kite o Iehova i New York, e i te mataiti 1994 kua arikiia mai maua. I muri ake i to maua karatuatianga kua tukunaia atu maua kia tavini i Rativia, e tuatuaia ana te reo Rutia i reira.

Mareka kore tikai te tangata i te akaaere anga poritiki te kore anga te konitara akaaere o Rutia. Kare te Pipiria e akangateiteiia ana e kua arai katoaia, inara kua kite mai matou e e maata te inangaro ra i te kite i ta te reira e tuatua ra. Te apiianga i te reo Rutia ko tetai angaanga ngata tikai taku i aro atu ana. Inara e ono mataiti i muri mai i te angaanga mitinari i Rativia, kua ikiia au ei akaaere tutaka kia atoro e kia akamaroiroi i te au putuputuanga o te Au Kite o Iehova. Ko taku angaanga teia e rave nei, e taku vaine akarongo mou i te aru mai iaku.

I tetai au mataiti, e maata te aronga tei rauka iaku i te tereni kia tere atu ki mua i roto i te oro anga no te ora, “te ora mutu kore” i roto i te ao ou o te Atua. (1 Timoteo 6:19) Te tereni anga i te aronga oro kia itae meitaki tikai i to ratou akakoroanga te umuumuia ra kia kite meitaki i to ratou tu. Ka tauturu te tangata tereni ia ratou kia akamaata atu i to ratou maroiroi e kia akaiti mai i to ratou tu paruparu. Ka anoanoia aia kia akakeu ia ratou kia akakoromaki e kia itae meitaki tikai i to ratou akakoroanga.

Poitirere au te kite e aiteite ua te turanga o te Kerititiano ki te tangata oro, mei ta te apotetoro ko Paulo i akataka mai i roto i tana reta mua ki to Korinetia. Ka akamou te tangata oro meitaki i tona manako ki runga i tana tereni anga e kare e moemoea no te re anga. Ka akanoo aia i te au akakoroanga tika tikai nona uaorai e ka rave maroiroi aia kia rauka te reira. Me ngaropoina iaia tana akakoroanga e kare e aruaru i te itae i te reira, ka puapinga kore ua tana au angaanga pakari i rave ana. Kia akamou katoa rai te Kerititiano mou i tona manako.

Ka aru tinamou katoa rai te tangata oro meitaki i te au ture no te akonoanga i te ture o tana kai. Me tei reira rai te Kerititiano mou. Kare aia e angai iaia ki te au apiianga tau kore, te kai anga mei “te kaingakai a te au demoni,” mei ta te apotetoro ko Paulo rai i akakite. Mari ra, ka kai aia i te au kai pae vaerua memeitaki tikai tei orongaia mai e te Atua na roto i tana Tuatua, te Pipiria. (1 Korinetia 10:21) Pera katoa, me tupu te au manamanata, ka vai tinamou rai te tangata oro meitaki. Ka akakite aia i tana au tarevake e ka rave i te au akatikatika anga. “Te oro nei au, kare ra mei te mea kare i kitea,” i tata ei a Paulo. “Te moto nei ra au i taku kopapa,” i karanga ai aia, kia kore e akapaeia ki vao.​—1 Korinetia 9:​24-27.

Te mataora nei rai maua ko taku vaine i te akono meitaki i to maua kopapa na te aere  putuputu anga ki te ngai akaketaketa anga kopapa. Inara, kare maua e akatika ana i teia kia arai ia maua i te tavini anga ia Iehova, tei anga i te tangata ma te tu umere. (Salamo 139:14) Te akamou kapiti nei maua i to maua manako i te itae anga i te korona o “te ora mutu kore”​—te ao ou o te Atua “a muri atu.”​—1 Timoteo 4:⁠8.

I muri ake i te akataka anga i te ‘urupu maata kite’ i mua ake i te tuatau o te au Kerititiano, kua raurau te apotetoro ko Paulo e: “E kopae atu tatou i te au mea teiaa ravarai, e te ara e rokoia ngoie ei tatou nei, e oro tamou marie ei i teianei oroanga i tukuia mai ki mua ia tatou nei.” (Ebera 12:⁠1) Kare e mea puapinga maata atu i te rave i to te oro i roto i taua oro anga ra. No te mea me tae meitaki ki te openga e au akameitakianga mutu kore te ka orongaia ki te aronga katoatoa tei oro ana.​—2 Timoteo 4:​7, 8.

[Tataanga Rikiriki i Raro]

[Tutu i te kapi 21]

Te au mataiti o te 1980, matou ko Heidi e Yvonne i runga e ko Jouko e ta raua tamaine i raro

[Tutu i te kapi 22]

Maua ko Heidi i roto i te angaanga orometua i teia tuatau

[Tutu i te kapi 22]

I te uruoaanga a te Au Kite o Iehova i Helsinki i te mataiti 2009. Ko Yvonne e Jouko i to maua tua kaui e ko Jarmo e Barbro i to maua tua katau

[Akameitakianga no te Tutu i te kapi 19]

Published in Aamulehti 8/21/1979