Akaraanga i te Ao

Kua ariki te Akaaerenga no te Au Angaanga Akonoanga o Serbia i te patianga kia retitaia te pupu tangata tei tikaia e te ture, e komono ra i te Au Kite o Iehova. Roto i te rekoti a te kavamani, kua angaanga ana te Au Kite o Iehova i taua ngai ra mei te mataiti 1930 mai.

Tamanakoia e e 95 patene o te au imene tei kopiia i te ao katoa i te mataiti 2009, kare i tikaia e te ture.​—TIME, U.S.A.

Au Ngaruerue Enua—“Te au Tumatetenga Kino Rava Atu”

“Na te ngaruerue enua i akatupu i te au tumatetenga kino rava atu i te ngauru mataiti i topa,” i akakite ei te akaaerenga, no te Ravenga a te United Nation i te Pa Enua no te Akaiti Tumatetenga, i akanooia ki Geneva, Tuiterani. Tei mate no taua au tumatetenga i roto i taua tuatau, vaitata rai e 60 patene tei mate i te ngaruerue enua. Te riro nei rai teia “kino natura” ei akaaoanga no te mea e 8 i roto i te 10 oire mamaata no ratou te tangata maata rava atu i te ao katoa nei, tei runga tikai ratou i te au ara maata o te ngaruerue enua. I te ngauru mataiti i topa akenei, tere atu i te 780,000 tangata tei mate i roto i teia au tupuanga e 3,852 tei rekotiia ei au tumatetenga.

Ngai Angaanga Kino

“E 110 te katoaanga o te aronga tata nuti tei mate i roto i ta ratou ngai angaanga i te mataiti 2009, e ko taua mataiti ra te mea kino roa atu i te ngauru mataiti i topa” no teia ngai angaanga i karanga ai te Akaaerenga Tata Nuti i te Pa Enua, i akanooia ki Vienna, Auteria. I te au ngai tamaki mei ia Avikanitana, Iraki, Pakitana, e Tomaria, ko “te aronga tata nuti tei akakoro kinoia” i te au mataiti ua akenei i karanga ai te ripoti. Kua riro teia ei akaiti mai i te nuti e ripotiia maira, e e “tu manamanata teia no te mea kare e marama meitakiia ana te tu tikai o teia . . . au tupuanga tuke tuke” i roto i teia au ngai nei. Ko Iraki te enua kino roa atu no te aronga tata nuti i te ngauru mataiti i aereia mai, aru mai ko Piripine, Koromopia, Meiko, e Rutia.

Au Apinga Mama i Tukuia ki te au Enua, Iti Mai te Tomo Are

Penei ka riro “te maata o te au apinga erikitoroniki mama ua” ei akangere i te aronga tomo are o Peritane i te ngai angaanga i karanga ai te nuti a te Reuters mei London, i te taiku mai anga i te puapii no te aronga aati ture ko James Treadwell, no te Apii Teitei o Leicester, i Peritane. Ei akaraanga, no te meangiti rava i te oko o te matini akatangi DVD, vaitata rai e kare e puapinga i te oko akaou atu. “Kare e paunaia te taime i te keia” i karanga ai a Treadwell. Kare te akatopa anga i te oko i akakore ana i te aati ture. Mari ra, te takete nei te aronga keikeia i te au apinga oko maata atu e te au apinga e umuumuia maira e te tangata, ‘mei te tereponi apaipai rima e te iPod e apai aere ana te tangata i runga ia ratou.’ Te rave nei te aronga tomo are i tetai au angaanga aati ture ke atu, mei te ta e te keia i te tangata i te ngai tangata.