Te Manako o te Pipiria

Eaa te Atua i Kore ei e Takore Atu i te Tiaporo?

ME KA rauka ia koe te akakore i te mamae o tetai tangata, ka akapera ainei koe? Te aronga tauturu, e aere viviki ua ana ratou ki ko i tetai tumatetenga natura i te tauturu i te aronga i kino e te akaora i te au tangata ke takiri. No reira penei ka ui tetai e, ‘Eaa ra te Atua i kore ei e taviviki i te takore atu i te Tiaporo, te tumu o te au kino e manganui tana i akatupu ki te tangata?’

Ei tauturu i te pau i taua uianga ra, penei e akamanako koe i tetai oroanga i roto i te akavaanga. Te rapu ra te tangata ta tangata, kia akamutu te kimianga, karanga aia e te angaanga pikikaa ra te akavanui i te akaaere anga i tana akavaanga, e kua akaapa katoa aia e te tutakiia ra te au tiuri e te akavanui. No reira e maata ua atu te au kite tei akatikaia kia tuatua mai i ta ratou i kite.

Kua kite te akavanui e me roa roatu te kimianga ka maata te tamanamanata, e ka inangaro aia kia oti te kimianga ma te kore e tavarevare. Inara, kua kite aia e, e rauka ai tetai tukuanga tika te ka riro ei akanoo i tetai akaraanga no te au oroanga a te tuatau ki mua, kia rava te taime ka akatikaia no nga tua e rua kia tuku mai i ta raua oroanga no taua manamanata ra.

Eaa ra te pirianga o teia akatutuanga ki te akaaoanga ta te Tiaporo​—tei kapiki katoaia e ko te “taae,” te “ovi,” e “Satani”—​i akaapa atu ia Iehova, ko “Tei Teitei i te enua katoa nei”? (Apokalupo 12:9; Salamo 83:18) Koai tikai te Tiaporo? E eaa tana au akaapaanga i te Atua ko Iehova? Tetai katoa, aea te Atua e takore ei iaia?

 Akanoo i Tetai Akaraanga no te tu Akono Tau

I muatangana ko te peretana tei riro mai ei Tiaporo, e vaerua apa kore aia, koia tetai angera a te Atua. (Iobu 1:6, 7) Nana rai i akariro iaia ei Tiaporo i tona umuumu anga i tetai akakoroanga noinoi kia akamoriia aia e te tangata. I na, kua akaao atu aia i to te Atua tikaanga kia tutara, e kua karanga katoa e kare te Atua e tau kia akarongoia. Kua akaapa aia e, te tavini ra te tangata i te Atua me okoia ki te akameitakianga. Karanga a Satani e i raro i te turanga ngata uaorai ka “akakino” pouroa te tangata i Tei Anga mai ia ratou.​—Iobu 1:8-11; 2:4, 5.

Taua au akaapaanga na Satani, ka inangaroia tetai au pauanga te kare e rauka ua i te pau na roto i te tamate atu anga iaia. Te ka tupu penei ka riro te tamate anga i te Tiaporo i roto i te kainga i Edene, i te akaari atu ki tetai aronga e kua tika rai te Tiaporo. No reira kua akamata te Atua, nona anake ua te mana akaaere, i te rave i tetai au kimianga kia tau i te ture ei akatikatika i taua au maroanga ra i roto i te manako o te aronga pouroa e akara maira.

Kia rotai ki tana au kaveinga e tona tu tika apa kore, kua akaari mai te Atua ko Iehova e ka apai mai nga pupu e rua i tetai au kite, te ka oronga mai i tetai akapapuanga, ei turu i tona tua o te manamanata. Te tuatau tei akatikaia, kua oronga te reira i tetai tikaanga no te uanga o Adamu kia ora e kia kapiti mai i ta ratou akapapuanga i te turu i te Atua na te iki anga kia vai tiratiratu rai kiaia no to ratou aroa noatu te au tu ngata.

Mei Teaa ra te Roa?

Te kite ua maira te Atua ko Iehova e i taua au kimianga e raveia ra, ka kite ua rai te tangata i te kino. Tera ra, kua akakoro tikai aia e kia oti vave teia. Te akataka maira te Pipiria iaia e ko “te tumu o te aroa, e ko te Atua nona anake te pumaana.” (2 Korinetia 1:3) Te taka ua ra e kare “te Atua nona anake te pumaana” e akatika kia roa atu te oraanga o te Tiaporo i tei anoanoia nona, e kare katoa Aia e akatika i te au tu kino o tana akakeuanga kia vai mai. I tetai tua, kare te Atua e takore vave i te Tiaporo ma te kore e akaoti takiri i teia oroanga i roto i te akavaanga a te ao katoa e pini ua ake.

Me oti ana te au maroanga i te akatikatikaia, kua akapapu meitakiia i reira to Iehova tikaanga kia tutara. Te oroanga patoi ia Satani kia tau i te ture, ka vai rai te reira ei turanga tikaia e te ture e tuatau ua atu. E ua ake e tupu akaou mai tetai akaaoanga mei te reira, ka tau i reira kia akariroia tei tupu kia Satani, ei akaraanga te kare e anoanoia kia ripiti akaouia.

Me tae te tuatau ka akakite te Atua ko Iehova ki tana Tamaiti tei akatuia mai, kia takore i te Tiaporo e tana au angaanga. Te akakite maira te Pipiria i te tuatau “ka tuku atu ei aia [Karaiti] i te basileia ki te Atua, ki te Metua ra; kia ope rava te aronga au, e te mana, e te maroiroi, i te akakoreia e ia. E iaia oki te au, e kia ope rava te au enemi katoa i te tukuia e ia ki raro ake i ona vaevae. E taua enemi openga ra, ko te mate, e akakoreia ïa.”​—1 Korinetia 15:24-26.

Te mea mataora, te taputou maira te Pipiria e ka kiteaia taua au turanga Parataito ra i te enua katoa. Mei ta te Atua rai i akakoro i te akamataanga, ka noo te tangata i roto i tetai parataito au ua! “Kareka te aronga maru ra, ka noo ïa i te enua, e ka rekareka ratou i te maata o te au ra.” Ae, “ka riro te enua no te aronga tuatua-tika, ka noo tamou rai ratou i reira.”​—Salamo 37:11, 29.

Akamanako ana i te manakonakoanga manea no te au tavini o te Atua e akatakaia maira i roto i te Pipiria: “I na, tei ko te tangata ra te puakapa o te Atua e e noo aia ki rotopu ia ratou, e riro ratou ei tangata nona, e e noo te Atua ki rotopu ia ratou, ei Atua no ratou. E nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.”​—Apokalupo 21:3, 4.

I MANAKO ANA AINEI KOE?

● Akapeea te Tiaporo i te akaapa pikikaa ua anga i te Atua e te tangata? —Iobu 1:8-11.

● Eaa te au tu o te Atua e akapapu maira kia tatou e me tae te taime ka takore aia i te Tiaporo?—2 Korinetia 1:3.

● Eaa te manakonakoanga ta te Pipiria e oronga maira?—Apokalupo 21:3, 4.

[Tutu i te kapi 10]

E rauka ai tetai tukuanga tika te ka riro ei akanoo i tetai akaraanga no te tu akono tau kia rava te taime ka akatikaia no nga tua e rua kia tuku mai i ta raua oroanga