Kai Vera Mei te Kainga ki te Opati​—I Mumbai

AERE ra koe ki te angaanga i te au ra ravarai, akaruke anga i te kainga i te ora rima i te popongi. Tae ki te tuaero ka inangaro koe i tetai kai veravera tunuia i te kainga mei taau tikai e reka ana. Ko te oraanga ia o te au tauatini tangata e angaanga ra i Mumbai, i Initia, e akameitakianga ki te au dabbawala, e tari nei i te kai Initia tunuia i te kainga. *

Kite Anga i Tetai Atianga

Tae anga ki te openga o te 19 anere mataiti, e ngai mamaata no te turanga pae moni a Mumbai, tei kapikiia i te reira tuatau ko Bombay, e mamao te ngai e aere ana te aronga pitiniti o Peritane e Initia ki to ratou opati. Marie te apinga akaoro, e mamao e kare e maata ana te ngai kaikai. E mea inangaroia te kai tunuia i te kainga, no reira i taangaangaia ai te au tavini kia apai i te au kai tunu mei te kainga o to ratou pu ki tona opati. Te kite anga i tetai atianga no te angaanga pitiniti, kua apai mai tetai tangata maani pitiniti i te au mapu kare e angaanga ana mei te au oire mai, e kua akamata i tetai angaanga tari kai mei te au kainga ki te au opati. Mei teia akamataanga meangiti ua, kua tupu maata atu te pitiniti.

Kare i kore ake te inangaro no te au kai tunuia i te kainga. E tika, maata te ngai kaikai i teianei, inara mama e e reka ake te kai tunuia i te kainga. Pera katoa, maata te au tangata oraanga makimaki e ka anoanoia kia kai i te kai tau no te kopapa. Tetai pae no te ture a te akonoanga. Ei akaraanga, tetai pae kare e kai ana i te oniani, e tetai pae kare e kai ana i te kariki. E kairoia ana teia au mea ki roto i te kai tunuia i te ngai kaikai, no reira kare e manamanata o teia au kai e tariia nei mei te kainga ki te opati.

 Tetai Mataara Meitaki Rava Atu

Kare i maata rava te taui anga no teia tu mama ua no te tari anga i te kai i te au mataiti, inara te maata atura te pitiniti. I teia tuatau, mei te 5,000 tane, e tetai au vaine, e tari ra mei te 200,000 kai i te ra okotai, mei te au kainga i roto i to ratou ngai ki te au opati tei reira te maataanga o te tangata, mei tetai 20 tuma mirioni. E aere ua ana tetai au dabbawala mei tetai 40 maire (60 kiro mita)—te tari anga i ta ratou kou kai e 30 me kore 40 i runga i te uirapa—e na runga ana tetai pae i te patikara takatakai me kore te rerue. Noatu eaa te tu, me tari ratou i te kai e tae meitaki ana te reira ki te tangata nana te kai i te ora tano tikai. E tika, e 1 rai tarevake e kiteaia ana i roto i te 6 mirioni kai e tariia ra! Akapeea ratou te akono tamou anga i taua rekoti meitaki ra?

I te mataiti 1956 kua retitaia te au dabbawala ei akaaereanga tauturu, ma tetai kumiti maata e tetai au opita akaaere. E angaanga takake ana te au pupu tangata e to ratou tangata akaaere. Inara, e au ona e e tuanga moni ta ratou pouroa i roto i te akaaereanga—no runga i teia, i karanga ai ratou e, i puapingaia ai te angaanga. E tika, kare e tangata e akaruke ana i te angaanga no te patoitoi, mei te akamataanga o te reira mei tetai 100 mataiti i topa.

E apai aere ana te au dabbawala i tetai kati te akataka anga ia ratou, e ka kite meitakiia ratou no to ratou pona teatea, piripou karukaru, e te  pare teatea. Me kare ratou e aao i te pare, me kua tureti me kore kare i tae ki te angaanga ma te kore e tumuanga tau, e kua mou no te kai kava i te tuatau angaanga, ka akautungaia ratou.

Te Angaanga i te au ra Ravarai

Me tae ki te 8:30 i te popongi, kua oti i tetai tangata me kore te vaine a te pu o te kainga i te akapapa e te kou i te kai ki roto i te pani—me kore te dabba. E au ngai vairanga kai to te au dabba te ka akapapaia ki runga i tetai e tetai e ka ruru meitakiia e ka pakatiia ki te auri. E koi ana te au dabbawala i te au kou kai mei tetai ngai, e ka tuku i te reira ki runga i tona patikara takatakai me kore te uirapa rakau, e ka aere viviki atu ki te ngai tiaki rerue, te ngai ka aravei ei aia i tona pupu. Ka tua tua aere ratou i te au pani no te ngai i akakoroia, mei te tangata tua mere rai.

Kua akairoia te au kou kai tataki tai ki te au reta, te au numero e te kara, te akaari anga i te ngai no reira mai te kai, te ngai tiaki rerue i te pae mai, te ngai ka aere te rerue, te ingoa o te are, e te numero o te taua. Ka kapitiia te au pani tei akakoroia no te ngai tataki tai, e e 48 kou kai ka akairiia ki runga i te au paata rakau roroa. Me tae mai te rerue, ka tukuia te au pani ki roto i tetai pia takake i te pae mai i te pia o te tangata akaoro. E oti, me tae te rerue ki te ngai maata no te tiaki anga rerue, ka tua aereia te au kou kai e ka apainaia atu ki te ngai o te rerue tei akakoroia. Ka tua akaouia te reira no te tari anga openga ki te tangata nana te kai, na runga i te patikara takatakai me kore te uirapa rakau.

Mako tikai e e mama katoa teia ravenga no te tari apinga. Tei maata atu, kare te dabbawala e piritiaia ana i rotopu i te au apinga akaoro i runga i te mataara, no te mea te takatakai ra aia na te pae mataara me kore na rotopu i te au motoka. Tei tupu mai, kua tae meitaki te kai i te 12:30 i te avatea ki ko i te opati. E oti, i rotopu i te 1:15 e te ora 2:00 i te avatea, me oti te dabbawala tei angaanga pakari ana i te kaikai, ka aere aia ka koi mai i te au pani kua pou te kai, e ka akaoki atu ki te kainga o te pu, e ka tama tetai mema o te pamiri i te reira, te akapapa anga no tera mai ra. Mei te akamataanga ki te akamutuanga, e viviki e e mako tikai te angaanga, mei tetai oro taemoemo rai!

Angaanga Akaaka, Akangateitei Maataia

Kitea meitakiia te rekoti meitaki tikai a te au dabbawala. I akara ana tetai atu au akaaerenga i te tu no te tari anga i te kai, kia rauka ia ratou te taangaanga i te reira akaraanga i roto i tetai atu au pitiniti ta ratou i kite mai. Kua maaniia tetai au teata no runga i te au dabbawala. Kua oronga atu te Forbes Global Magazine i tetai pepa akameitaki anga, ko te Six Sigma, no to ratou rekoti meitaki tikai. Kua taikuia mai ratou i roto i te The Guinness Book of World Records e te apiiia ra no runga ia ratou i ko i te Apii Pitiniti o Harvard i Marike. Kua aravei katoa te aronga taoonga maata o te kavamani i te au dabbawala, kapiti mai tetai mema ariki o Peritane tei umere tikai i ta ratou angaanga, i pati ei aia i tetai pae ki tona akaipoipo i Engarani.

I teia tuatau e taangaanga ana te au dabbawala i te au komupiuta e te au terepaoni apai aere no te au ota e te au rekoti no runga i te moni. Kare i taui te tu no te tari anga i te kai. Me vaitata te tuaero, papu i te aronga angaanga matepongi i te opati i Mumbai, e kare e roa atu ana ka tae mai tetai kai maana tunuia i te kainga ki to ratou kaingakai—kare e tureti!

[Tataanga Rikiriki i Raro]

[Tutu i te kapi 13]

Tari anga i te “au dabba” ki runga i te rerue

[Tutu i te kapi 13]

Au ngai vairanga kai to te “dabba” tei akapapa kapitiia kia mama i te apai e te tari anga

[Tutu i te kapi 14]

Maata te au pitiniti tei apii i te tu mako tikai a te “au dabbawala” no te tari kai