“Na te Tuatua-Mou Kotou e Akarangatira”!

I ROTO i te Pipiria, ka kiteaia taua tuatua a Iesu Karaiti, i roto ia Ioane 8:32 ei tuatua mou mutu kore. Ka akarangatira taua tuatua mou ia tatou mei te manako purepure e te au peu te akamareka kore ra i te Atua e te ka takino ia tatou. Ka akaari mai te ka aru mai, akapeea te tuatua mou Pipiria te akarangatira anga i te au tangata i te au enua tukeke mei tetai au peu teiaa no runga i te Kiritimiti.

Akarangatira te Tuatua Mou Pipiria ia Ratou!

Atenetina “Kare to matou pamiri e manamanata akaou ana no runga i te kaikai e te inu maata, e te oko anga i te au apinga aroa kare e peke ia matou,” i karanga ai a Oscar.

Kua kite mai a Mario i te turanga rangatira tikai te akakiteia anga kiaia te “tu pikikaa o te Kiritimiti,” ko tana ia i kapiki. “Te mataora nei au i te  akaari i toku tu rekareka ki tetai ke na te oronga anga i te au apinga aroa i tetai ua atu taime o te mataiti, me rava taku moni.”

Kanata “E reka ana au i te oronga e te ariki mai i te au apinga aroa,” i tata ei a Elfie. “Inara kare au e reka ana me oronga mai tetai tangata i tetai apinga aroa no tei maroia. Te akamutu anga toku pamiri i te akono i te Kiritimiti, kua kite mai matou i te tu rangatira!”

Maara mai i tetai tamaine a Elfie, ko Ulli e: “Muri ake te akamutu anga toku nga metua i te akono i te Kiritimiti, kua akanoo raua i te au tamataora anga e kua oronga poitirere mai i te au apinga aroa i roto i te mataiti, e kua mataora tikai matou i te reira! Me ui mai to matou oa apii i te tumu, ka akakite ngakau parau matou kia ratou e, ‘No te inangaro o to matou nga metua!’ Te taui anga to matou oraanga no ta matou i kite i roto i te Pipiria, kua tupu te patoianga ki te pamiri no te mea kare matou e piri akaou ana ki te tamataoraanga a te kopu tangata. Kua vai ngaueue kore ua raua. Te kite anga i to raua tu ngaueue kore te akamorianga i te Atua ko Iehova ma te tu tau, e akakeu anga maata tikai kiaku.”

No Silvia, te akamutu anga i te akono i te Kiritimiti “maru tikai te ngakau,” i karanga ai aia. “I muri ake, mataora tikai au! Kua kite au e te akamareka ra au i te Atua ko Iehova, e e meitaki atu te reira i to te akono anga i te au tauatini ua atu Kiritimiti.”

Kenia Kua tata a Peter e: “Te akono anga au i te Kiritimiti, maata taku moni i kaiou no te oko mai i te au apinga aroa e te tutaki anga i te au kai okomaata. Te aiteanga ka angaanga roa atu au e kare oku taime ki toku pamiri. Mataora tikai au e kua matara mai au mei taua au peu katoa ra!”

“Ka oronga​—e ka ariki mai au—​i te au apinga aroa mei toku pamiri e te au oa i tetai ua atu taime,” i karanga ai a Carolyne. “Irinaki nei au e ko taua au apinga aroa tapapa koreia, tei orongaia mai ma te ngakau tae, ko te mea meitaki rava atuia.”

Tiapani Kua tata a Hiroshi e Rie e, “Kare ta maua tamariki, e tapapa ua mai ana i te au apinga aroa ma te manako kore. Mataora tikai maua ei nga metua te kite anga e te marama ra ratou e ko te oronga anga, no roto mai i te ngakau.”

Maara ia Keiko e: “I akono ana to maua pamiri i te Kiritimiti. Me papu ia maua te moe ra ta maua tamaiti, ka tuku maua ko taku tane i tetai apinga aroa ki te pae i tona roi. Tera mai popongi, ka karanga maua kiaia e: ‘No te mea e tamaiti meitaki koe, kua oronga mai a Santa i tetai apinga aroa naau.’ Te kite mai anga au i te tika no runga i te Kiritimiti e kua akakite atu i taku i kite ki taku tamaiti, poitirere aia e kua aue. Tera taime, kua kite tikai au e kare te Kiritimiti i te mea meitaki i ta te reira e akatutu maira. Inara, e pikikaa ua, e na te rave ua anga i te reira, kua kite mai au e kua pikikaa au i taku tamaiti.”

Piripine Kua karanga a Dave e: “Ngata tikai i te tata no runga i te mataora ta Iehova e oronga maira kia tatou na roto i te tuatua mou tei kiteia i roto i te Pipiria. Me oronga te au mema o toku pamiri i te au apinga aroa ki tetai ke, kare matou e tapapa atu kia orongaia mai tetai apinga. E oronga ana matou no roto mai i te ngakau.”

Te aronga tei taikuia mai i runga akenei ko tetai ua o te au mirioni tangata tei kite mai i ta ratou uaorai i na roto ana, e ka akarangatira te tuatua mou Pipiria i te au tangata. Mea maata atu, me aru rotai tatou i taua tuatua mou ra, ka akarekareka tatou i te ngakau o te Atua. (Maseli 27:11) Kua karanga a Iesu Karaiti e: “E akamori ei i te Metua te aronga akamori tika ra, ma te vaerua e te tuatua-mou: ko te tu ïa o te tangata akamori ta te Metua e anoano ra.” (Ioane 4:23) Me akara mai te Atua i toou ngakau, te kite maira ainei aia i tetai tangata e inangaro tikai ra i te tuatua mou? Te irinaki nei matou e te taka ua ra te pauanga e ae!

[Tutu i te kapi 9]

E oronga aroa ana te au Kerititiano i tetai ua atu taime i te mataiti