Tuatua i te Mea Pakari

‘NARINGA ua ake kare au i tuatua i te reira!’ I tuatua ana koe i te reira kia koe uaorai? Ae, e tauta pakari ana tatou katoatoa i te akatere i to tatou arero. Ka rauka ia tatou i te tavarenga i tetai manu, i karanga ai te Pipiria, “kareka te arero nei, kare ua e tangata e vi ei te reira.” (Iakobo 3:7, 8) Ka tuku ainei tatou i te au i te akatere i ta tatou au tuatua? Kare! Akamanako ana i tetai au kaveinga Pipiria te ka tauturu ia tatou i te akatere i teia mema meangiti o te kopapa inara e mema ririnui tikai.

● “Te maata ra i te tuatua ra, kare e kore te ara: ko tei tāpu ra i tona vaa, e pakari tona.” (Maseli 10:19) Me maata atu ta tatou tuatua, kare ekoko e ka tuatua tatou i tetai apinga neneva me kore kino. Tika rai, e riro ana te arero akatere koreia mei te ai rai, te ka akatotoa atu i te tuatua urutoe e te akakino. (Iakobo 3:5, 6) Inara, me ‘tāpu tatou i to tatou vaa,’ me kore e akamanako i mua ake ka tuatua ai, ka akamanako atu tatou i te kino ka tupu no ta tatou tuatua. Na roto i teia tu, ka kiteia mai tatou ei tangata pakari, e ka akangateitei e ka irinaki mai tetai ke ia tatou.

● ‘Kia rapurapu ua i te akarongo, tavarevare i te tuatua, tavarevare i te riri.’ (Iakobo 1:19) E reka ana te tangata me akarongo meitaki tatou ki ta ratou e tuatua maira, na teia tu te akaari ra tatou i to tatou inangaro pera katoa te akangateitei. Akapeea me tuatua mai tetai tangata i tetai apinga kino me kore te akariri maira ia tatou? Ka tauta tatou i te ‘tavarevare i te riri’ na te kore e riri atu. Kite koe eaa te tumu? Penei kua riri te tangata no tetai ua atu tumu e penei ka tataraapa mai no tana tuatua kino. Te ngata ra ainei ia koe i te ‘tavarevare i te riri’? Pure i reira ki te Atua no te akatere ia koe uaorai. Ka akarongo mai aia ki taau patianga ngakau tae.​—Luka 11:13.

● “E atiati te ivi i te arero maru.” (Maseli 25:15) Tuke ki te au manako e rekaia ana, e ririnui te tu maru. Ei akaraanga, ka autu te pauanga maru i te patoianga mei te ivi maro e te ketaketa rai, penei no te riri me kore no te tu papakitai. Papu tikai, e ngata i te akaari i te tu maru, i roto tikai i tetai turanga riri. No reira e akamanako i te au puapinga no te raveanga i ta te Pipiria e tuatua maira e te ka tupu mai me kare te reira e raveia.

E au kaveinga Pipiria tika tikai ‘te pakari no runga mai.’ (Iakobo 3:17) Me taangaanga tatou i taua tu pakari ra ki ta tatou tuatua, ka riro ta tatou tuatua ei akangateiteianga, akaperepereanga, ei akamaroiroianga​—“mei te apara auro i roto i te vairanga ario i taraiia,” tei tau tikai ki te atianga.—Maseli 25:11, NW.