E Akakeuanga Ririnui Ainei te Akonoanga no te Au?

AKAPAAPAA tetai aronga i te reira e ko te are pure tapu roa atu i roto ia Kerititome, inara kua riro katoa mai te Are Pure o te Sepulchre Tapu i Ierusalema ei ngai no te karo e te pekapeka akonoanga. Kia tau ki te peu matauia, kua riro te are pure ei akairo i te ngai “tei arikiia e ko te ngai i tanuia ai a Karaiti, e i tuakaou mai ei mei te mate.” Kua riro katoa ana teia ngai akataputapuia ei ngai no te au manamanata kikino roa atu. Kua ta te au Mongoka e te au orometua o e ono au akonoanga “Kerititiano” tukeke i tetai e tetai no runga i to ratou tikaanga kia taangaanga i te are pure. Kua kino roa atu te manamanata i te au mataiti ua akenei. Kua aere mai te au akava e ta ratou au pupui i te akaau, e te akaaere poto ua i te are pure.

E Tuatua Enua ta Ua

Te au mea tei tupu i ko i te Are Pure o te Sepulchre Tapu e tuanga ua te reira no tetai tuatua enua roa o te akamaringianga toto, e te ta tangata no te akakeuanga pakari a te akonoanga. Roto i tetai akarakara akaou anga i te au manamanata i te au tuanga tukeke o teianei ao, karanga te puka Violence in God’s Name e: “Mei Initonetia ki te Tua Apatonga o Airerani, te Itinga Rotopu ki Kashmir, Initia ki Naiteria, te Balkans ki Tiri Ranaka, te au Kerititiano, Buda, ngati Iuda, Initu, Mutirimi e te Tiiki, ko ta ratou kotoeanga no te ta ua koia oki te paruru ra ratou i te ingoa e te turanga o ta ratou akonoanga.”

E oti akera, irinaki te maataanga o te au akonoanga e ko te au turanga au e te rotai to ratou nga kaveinga maata. I te au mataiti i aereia mai ana, turuturu pakari te akonoanga i te au kaveinga karapii kore mei te aroa i te tangata tupu e te akatapu i te oraanga tangata. Kare ainei i reira i te mea tau kia taangaanga te akonoanga i tona akakeuanga ririnui ei akatupu i te au? Mea meitaki no te aronga akamori ngakau tae kia makitoro marie i teia uianga.