E au Akakoroanga Tau Tikai Ainei Toou?

● Eaa taau e inangaro ra i roto i te oraanga? E au tapapaanga tau ainei taau, me te moemoea ua ra koe i te au apinga kare e rauka ia koe? Kua oronga mai tetai tangata kite i te tu o te tangata i teia tuatua pakari: “E ngari ake te mareka ua i ta to mata e kite ra, i to te tuku ua atu ki toou anoano; e tarevaka katoa teia e te puapinga kore.”​—Koheleta 6:9, The New English Bible.

Ko “ta to [tatou] mata e kite ra,” te tuatua ra no runga i to tatou au turanga e te au tu tika tikai i teianei. Kia papu e kare i te tarevake kia akameitaki atu i to tatou oraanga. Te manako ta te Pipiria e akakite ra koia oki, kare te tangata pakari e aruaru i te au akakoroanga kare e rauka. Penei i te turanga rongonui, apinga nui, tokorua akaipoipo meitaki, me kore oraanga kopapa meitaki.

Tetai katoa, te aronga i rauka i te akatupu i tetai akakoroanga, mei te au apinga nui i te pae kopapa, penei ka inangaro atu rai kia maata. Te akakite tika maira te Pipiria e: “Ko tei inangaro i te ario ra, kare ïa e mareka i te ario; e tei inangaro i te apinga nui ra, kare ia e mareka i te apinga e kia maata ra. E mea puapinga kore katoa te reira ra.” (Koheleta 5:10) No reira ka tauta te tangata pakari i te pae vaerua kia mareka ua i tana i rauka, “ta to [ratou] mata e kite ra.” Ae, te ariki ra ratou i teia tuatua mou e: “Kare ua oki a tatou apinga i apai mai ki teianei ao; e kua kitea tikaia e kare takiri e apinga e tika kia apai katoa kia aere ke tatou nei.”​—1 Timoteo 6:7.

E rauka mai ana te mataora maata roa atu i te aronga tei mareka ua i to ratou anoano pae vaerua. (Mataio 5:3) Akapeea tatou me rave i te reira? Akakite a Iesu Karaiti e: “Kare o te kai anake ra te mea e oraʼi te tangata nei, ko te au mea katoa ra no roto mai i te vaa o te Atua ra.” (Mataio 4:4) Ka kiteaia teia au tuatua puapinga i roto i te Pipiria, e kare e tutaki.

Ka kiteaia tetai tuatua mei te reira rai i roto ia Salamo 37:4. Te na ko ra te reira e: “Kia mataora oki koe ia Iehova; e nana e oronga mai i ta to ngakau e anoano ra.” Ei Atua Mana Katoatoa, ka oronga ua mai a Iehova i te au apinga na tona aronga akamori tiratiratu te kare roa e rauka i tetai tangata kia oronga mai: oraanga kopapa apa kore, turanga ponuiaau i te pae materia, e te oraanga mutu kore i roto i te Parataito i te enua nei. (Luka 23:43; Apokalupo 21:3, 4) E tuatua tika tikai teia tei tau kia irinakiia.