Te Taime e Riro ei te Akonoanga ei Manamanata

KIA karanga e ko te akonoanga te tumu maata o te au manamanata pouroa, tera te aiteanga ka iti mai te tamaki me kare e akonoanga. Te tano ra ainei tera tuatua? Ka rauka ainei ia tatou i te takore i te tamaki na te takore anga i te akonoanga? Noatu eaa te pauanga, e tai tumu tika kare e rauka kia kopaeia: Kare i rauka i te akonoanga i te taokotai i te tangata. Akamanako ana i tetai au tumu i tika ai teia.

Akamaveteia e te Akonoanga

Kua mavete te pamiri o te tangata i te akonoanga, no te mea te pekapeka ua nei rai te au akonoanga mamaata. E tumuanga tau ainei tetai kia irinaki e ka rauka i te Buda, te au Kerititiano, te Initu, te ngati Iuda, e te Mutirimi kia noo kapiti ua ma te au?

Tetai tumu taitaia tikai koia oki ko te turanga ngaangaa ke ke e vai nei i roto i te au akonoanga mamaata. Ei akatauanga, akakite tetai kimikimianga e kua ngaangaa aere a Kerititome ki roto i tetai 30,000 tuma akonoanga. Kua riro katoa te au irinakianga tukeke ei akamavete i te akonoanga Itirama. Karanga tetai nuti no te Itinga Rotopu e kare i roa akenei kua akakite tetai tangata Mutirimi kite karape, ko Mohsen Hojjat e ko te “tu rotai kore i roto i te au Mutirimi, te tumu tikai o te au manamanata i roto i te au enua Itirama.” Etai atu au akonoanga ririnui mei te Buda, Initu, e te ngati Iuda, kua ngaangaa aere rai ki roto i te au pupu tukeke.

Akonoanga e te Poritiki

I te akaraanga, te akakeu ra te akonoanga vaitata rai i te au tuanga ravarai o te oraanga. Akakite te makatini nuti The Economist e “te maata ua maira te tangata i te akakite i to ratou au irinakianga i roto i te au turanga pouroa, kapiti mai te pitiniti. Te kitea katoaia mai nei te akonoanga i roto i te pae kimi puapinga.” Kua riro teia ei akamavete i te tangata, kare i taokotai mai ia ratou. Inara e akakeuanga kino maata atu tetai, ko te tuatua enua roa o te akonoanga i te akao ia ratou ki roto i te poritiki.

Tetai ripoti i taikuia mai i roto i te atikara i mua ake i teia, akakite tetai pupu tangata tuatua enua e “ka riro te akonoanga ei akatupu i te tamaki me kapiti e me piri vaitata tika atu ki te au mana akaaere o te enua.” Tera i reira tetai tumu tikai kare e rauka kia kopaeia koia oki: Kua piri ua ana te akonoanga ki te au akaaerenga poritiki e te vaeau e tae ua mai ki teia tuatau.

E Kapitianga Kai Tamaki Tikai

I te au enua e manganui, kua riro te au akonoanga mamaata ei akaraanga no te turuturu enua e te iti tangata. Tei tupu mai, vaitata rai e kare kiteaia te tuke i rotopu i te makitakita i te enua ke, te akavaavaa iti tangata, te kai tamaki i rotopu i te au pupu reo ke ke e te akonoanga. Tei roto i teia tu kapitianga kai tamaki te au mea anake tei anoanoia no te akamavete i to tatou ao.

Te mea manamanata i teia au mea pouroa, karanga te maataanga i te au akonoanga e e mata ratou no Tei Anga mai, koia te Atua o te Pipiria. E tau ainei i reira no Tei Anga mai koia oki te mana katoatoa e te pakari mou e te aroa ua, kia piri atu ki te au akonoanga akatupu pekapeka e te akamaringi toto?

[Tutu i te kapi 6]

Tauatini ua atu Au Kite o Iehova tei akamouauriia ana no tei iki i te turanga papakitai kore