Ariki Anga i te Mate o Tei Akaperepereia

“Kua ngaro toku manako e kua taitaia i te akarongo anga i te mate o toku papa. Tataraara katoa au no te mea kare au i te pae iaia i tona mate anga. Kare e apinga e aite atu ki te mamae oonu o te mate o tetai tei akaperepereia. Mii tikai au i toku papa!”​—Sara.

E NGATA ana i te maata anga o te tangata i te tuatua no runga i te mate, noatu ta ratou peu me kore akonoanga. E oronga mai ana tetai au reo i te au tuatua mareka i te akamama mai i te tu ngata. I te reo Papaa, kare e karangaia e kua “mate” tetai tangata, e karanga ana ra te tangata e kua “takake,” kua “akaruke,” me kore “kare i konei akaou.”

Tera ra, noatu te maru o te au tuatua, kare rai e rauka i te akamaru i te tu taitaia pakari e manako putuputuia ana e te aronga tei takake tetai tei akaperepereia e ratou. No tetai pae, e pakari tikai te tu mii e kare e rauka ia ratou te ariki e kua mate tei akaperepereia e ratou.

Me mate tetai tei akaperepereia e koe, penei ka ngata rai ia koe te ariki i tei takake. Penei ka maani ua koe e te meitaki ra koe, kareka ra e tuke rai a roto ia koe. E tika, kare e aiteite ana te tu mii o te katoatoa, no reira me kare koe e akaari mai ana i toou tu tangi, kare te aiteanga e te tapu ra koe i toou manako. * Tera ra, ka tupu te manamanata me akatutu ua koe mei ta tetai aronga e anoano maira​—penei e au mema pamiri rai te mii ra.

“Kare Oku Taime i te Mii”

Akamanako ana i tei tupu ki te mapu ko Nathaniel, e 24 ona mataiti i mate ei tona mama. “I te akamataanga, ngaro tikai toku manako,” i karanga ai aia. “Manako au e naku e  turuturu i toku papa e te au oa taitaia o toku mama. Kare oku taime i te mii.”

Muri ake i te tai mataiti, kite mai a Nathaniel e kare rai aia i ariki ake i tona uaorai tu ngere. “Te ringi mai nei rai a papa i tetai taime i te akakite mai i tona tu mii,” i karanga ai aia, “e e apinga meitaki te reira. E anoano ana aia i te tuatua no runga i te reira, e e mataora ana au i te tauturu. Tera ua ra me ka inangaro au i te turuturu, manako au e kare aku ngai e uri atu ei.”

Te aronga akono​—kapiti mai te aronga angaanga rapakau maki e kite putuputu ana i te turanga o te mate—​penei e manako ana rai i te tapu i to ratou tu tangi. Akara ana i te turanga o Heloisa, e taote no tetai 20 tuma mataiti. E angaanga ana aia ki roto i tetai oire piri vaitata tikai e e pirianga mou tona ki tana au aronga maki. “Tei ko au i te maata anga ia ratou i te taime i mate ei ratou,” i karanga ai aia, “e ko tetai ia ratou e au oa akaperepere tikai noku.”

Kite mai a Heloisa e ko te aue te tu natura i te akaari i te tu tangi. “Inara e ngata iaku i te aue,” i akakite ei aia. “Maata atu toku manako kia vai maroiroi no etai atu e kua manako au e ka anoanoia au kia tapu i toku au manako tangi. Irinaki au e te tapapaia maira e etai ke kia pera au.”

“Muteki ua a te Kainga no Tei Ngaro Aia”

Ko te tu maromaroa roa atu tetai akaaoanga pakari e aro atura te aronga tei mate to ratou tei akaperepereia. Ei akaraanga, e 19 rai o Ashley mataiti i mate ei tona mama i te cancer. “Muri mai, kua ngaro tikai toku manako e kua maromaroa,” i karanga ai aia. “E oa piri mou tikai toku mama noku. E maata te taime e akapou ana maua no maua uaorai!”

Marama ua e, e ngata ia Ashley i te oki mai ki te kainga i te au ra tataki tai e te kite e kare tona mama i reira. “Muteki tikai te kainga no te mea kare aia i reira,” i karanga ai aia. “Maata ua atu te taime e aere ana au ki roto i toku pia i te aue iaku e akara ra i tona tutu e te manako i te au apinga ta maua e rave kapiti ana.”

Kia papu ia koe e, me kua ngaro tetai mema o toou ngutuare tangata me kore tetai oa akaperepere, kare e ko koe ua te mii ana. Manganui te aronga e rauka ra i te akakoromaki, mei ta tatou ka kite mai.

[Tataanga Rikiriki i Raro]

[Tataanga i te kapi 5]

“Kua ngaro tikai toku manako e kua maromaroa. E oa piri mou tikai toku mama noku”​—Ashley