E “Poe Meitaki” Ainei Toou Vaa?

● “Te vai ra te auro, e te au poe e manganui; ko te vaa kite ra, ko te poe meitaki roa ïa,” i tata ei te Ariki ko Solomona i taito. (Maseli 20:15) E oko maata ua ana rai te auro, e i te tuatau o Solomona, e oko maata katoa te poe. Ae, e maata atu ra te oko i to tatou vaa i teia au mea oko maata. Mei teaa ra te tu? Kare e no te akaraanga, no te tu tau ra o te manako ta ratou ka tuatua mai.

Ka tuatua mai te vaa meitaki i te tu meitaki, takinga meitaki, e te aroa. E mei te “vaa kite ra,” ka tuatua ratou i te tuatua mou no runga i te Atua mei tei rekotiia i roto i te Pipiria. Ae, kua ki teia puka taito i te pakari e te tuatua mou no runga i Tei Anga mai ia tatou, pera katoa te au ako meitaki roa atu no te oraanga.​—Ioane 17:17.

Mea maromaroa ra, manganui te tangata e akakino ana i to ratou vaa na te tuatua anga i te au mea pikikaa no runga i te Atua. Ei akaraanga, kua akaapa tetai aronga iaia no te tu tika kore e te tamamae anga i roto i teianei ao, noatu e ko te tika na te tangata i akatupu i te maataanga o te reira. No runga i teia, te akakite ra a Maseli 19:3 e: “E akakino ana tetai au tangata ia ratou uaorai na te au angaanga tarevake ta ratou e rave ra, e oti ka akaapa i te Atu.”​—Today’s English Version.

E akaiti ana tetai pae i te meitaki o to ratou vaa na te au tuatua tika kore, urutoe, me kore te pikikaa. I te taangaanga i te tuatua akatutu pakari, te tatau ra a Maseli 26:23 e: “Mei te ota ario i tukuia ki runga i te āriki karakaraea ra, koia te vaa koperepere, e te ngakau kino.” Mei te “ota ario” e tapoki ra i te karakaraea, te akakite maira te “vaa koperepere” i te manako pakari e te tu tika, penei te uuna ra i “te ngakau kino.”​—Maseli 26:24-26.

Te tika, kare taua kino ra i uunaia mei te Atua. Te kite ra aia i to tatou tu tikai! Mei ta Iesu Karaiti i tuatua e: “E akamata na i te tamā i te kapu e te mereki i roto, e kia mā katoa a vao.” (Mataio 23:26) Tika rai te reira! Tera tetai, te tu ma i roto, me kore tiama, kapiti mai tetai ngakau ki i te tuatua mou pae vaerua, ka akaataia mai i roto i ta tatou au tuatua. Te ka tupu mai? Ka riro to tatou au vaa ei “poe meitaki roa ïa,” i roto tikai i te mata o te Atua.

[Tutu i te kapi 30]

Te vaa o tei pakari e “poe meitaki roa ïa”