Ui te au Mapu E

E Puapinga Kore Ainei Au?

“I manako puapinga kore ana au iaku mei tetai o toku oa. Mama ua te au apinga ravarai iaia—mei te mea e kare aia e angaanga ana no te reira! E maani ana iaku kia manako e eaa tikai toku manamanata. E riro ana au e ko toku uaorai enemi kino roa atu.”​—Annette. *

E ARAI ana ainei te au manako tukatau kore ia koe kia rave i te au angaanga ou? I tetai taime, e akaekoko ana ainei te au tuatua meitaki a te aronga taau e akangateitei ra i toou tukatau? E tapupu ana ainei te tu akamaroiroi kore no te au tarevake tei topa ia koe kia tauta akaou? Me koia ia, akapeea koe i te aro atu anga i toou tu puapinga kore​—e tika tikai me kore e manako takere?

Ka puapinga maata ia koe me kimi koe i te pauanga ki te uianga openga no te mea a tetai taime ka tarevake te katoatoa rava i te rave i tetai apinga. (Roma 3:23) Te aronga ra e akono atura i te au tu puapinga kore e matutu atu ana. Te aiteanga ka rauka ia ratou i te akara meitaki atu i to ratou tarevake, e ka tauta akaou. E i tetai atu taime, kare e ekoko e ka puapinga ratou! No reira ka akara atu tatou e akapeea koe me akono i te au akaaoanga e toru​—te turanga ka puapinga kore, te tamanako anga e ka puapinga kore, e te puapinga kore tikai.

TURANGA E KA PUAPINGA KORE → TE KA TUPU Te tapapa ra koe i te kino maata no reira koe i tapupu ei i te tauta atu, i te manako anga e kua kotingaia toou puapinga.

Akataka i te akaaoanga. Raro ake, tuku i tetai ✔ i te pae i te angaanga taau e inangaro ra kia puapinga​—inara papu ia koe e ka puapinga kore noatu taau tautaanga.

◯ Paruru i toou irinakianga i mua i te au oa apii

◯ Kimi anga i te ngai angaanga

◯ Tuatua anga i mua i te katoatoa

◯ Kapiti atu ki roto i te tipoti

◯ Imene me kore akatangi apinga akatangi

◯ Tetai atu

Akamanako meitaki i te reira. Akara i te angaanga taau i akataka i runga akenei, e oti akamanako i te au tupuanga na te pauanga i teia au uianga:

‘Eaa taku ka inangaro kia tupu?’

․․․․․

‘Eaa taku e mataku ra ka tupu?’

․․․․․

Teianei tata e tai tumu ka timata ai koe i te angaanga, noatu e kare e puapinga.

․․․․․

Akaraanga Pipiria. Te akaueia anga a Mose e te Atua ko Iehova kia arataki i te iti tangata o Iseraela, tona manako mua koia oki ko te mea ka tarevake. “Akapeea me kare te tangata ravarai e akarongo mai i taku karere?” i ui ei aia ki te Atua. E oti kua akamata aia i te tamou i te manako ki runga i tona au tarevake. “Kare roa  au i te tangata tukatau i te tuatua,” i karanga ai aia. “Kare rava au i kite e eaa te ka tuatua.” Noatu i muri ake i te taputou a Iehova e ka tauturu aia iaia, kua pati akatenga a Mose e: “E tono koe i tetai tangata ke atu kia rave i te reira.” (Exodo 4:1, 10, 13, Contemporary English Version) I te openga kua ariki a Mose i tana tukuanga angaanga, e kua kite tatou e kua puapinga aia. Raro ake i te aratakianga a te Atua, kua taki atu a Mose i te iti tangata o Iseraela no te 40 mataiti.

Taau ka rave. Kua tata te Ariki ko Solomona e: “Ko tei kitea e koe ta to rima e rave ra, ka rave ma to ririnui ra.” (Koheleta 9:10) No reira eiaa e akariro i te tu mataku kia tapu ia koe, e rave ra i te angaanga ma toou ngakau katoa. Kore ei koe akamanako i tetai atianga taau i rave ma te meitaki i taau i tapapa atu? Eaa te apiianga taau i tamou mai no runga ia koe uaorai no tei meitaki koe? Akapeea taua apiianga ra i te tauturu ia koe kia akavi i tetai ua atu tu mataku e kare koe puapinga, penei taau e kite atura i teianei?

Taikuanga: Me ka rauka, pati atu i tetai akakiteanga mei tetai metua me kore tetai oa pakari ake te ka tauturu ia koe i te akamaroiroi i toou tukatau. *

TAMANAKO ANGA E KA PUAPINGA KORE → TAAU I MANAKO TEI TUPU Me puapinga te angaanga a tetai tangata, manako koe e kua puapinga kore koe me akaaiteia atu kiaia.

Akataka i te akaaoanga. Koai taau e akaaite atura ia koe uaorai, e eaa tei rauka i taua tangata ra tei maani ia koe kia manako puapinga kore?

․․․․․

Akamanako meitaki i te reira. No tei puapinga taua tangata ra te aiteanga tikai ainei e kua puapinga kore koe? Raro ake, tata i tetai tupuanga, mei tetai tarere i te apii, taau i rave meitaki inara kua meitaki atu tetai tangata ke.

․․․․․

Teianei tata i te tumu meitaki i tauta ei koe i te angaanga.

․․․․․

 Akaraanga Pipiria. Kua “riri” a Kaina i te kite anga e kua mareka a Iehova i tona teina ia Abela. Kua akamatakite a Iehova ia Kaina no tona tu vareae, e kua akaari katoa i tona tu papu e ka rauka ia Kaina kia puapinga me iki aia i te reira. “Kia rave koe i te meitaki ra,” i tuatua ai a Iehova kiaia, “kare ainei koe e kiteia mai?” *​—Genese 4:6, 7.

Taau ka rave. Eiaa e ‘akaongoongo tetai ki tetai’​—noatu e i roto ua i toou manako​—ariki ra i tei rauka i etai ke. (Galatia 5:26; Roma 12:15) Taua taime rai, eiaa ei tu akapaapaa, ariki ra i taau uaorai au tareni umere. Akakite te Pipiria e: “Ka timata te tangata ravarai i tana uaorai angaanga, ei reira aia e rekarekaʼi iaia uaorai.”​—Galatia 6:4.

PUAPINGA KORE ANGA TIKAI → TEI TUPU Kua akamanako koe i tetai tarevake o mua atu ana e kua manako e kare e puapinga i te tauta ua atu.

Akataka i te akaaoanga. Ko teea i toou uaorai tarevake taau e kite ana e e akaparuparu maata tikai?

․․․․․

Akamanako meitaki. Te akataka meitaki maira ainei te tarevake taau i tata i runga akenei ia koe? Ei akaraanga, me kua akatika ua koe i tetai tu paruparu, ko te aiteanga ainei e kua puapinga kore koe? Me e akakite anga ainei e ka anoano koe i te tauturu? Me inga koe i roto i tetai tipoti, ka ariki koe i te tauturu kia kanga akaou. Eaa ai koe kore e rave i taua tu ra i te akono atu i toou tarevake? Tata i raro ake i te ingoa o tetai tangata taau ka rauka i te tuatua atu no runga i toou manamanata. *

․․․․․

Akaraanga Pipiria. Tetai au taime, kua akamaroiroi koreia te apotetoro ko Paulo e tona au tu paruparu. “E tangata taitaia tikai au,” i tata ei aia. (Roma 7:24, CEV) Taka ua ra, e kua kite mai a Paulo e kare tona tu apa i akataka iaia. Tata aia e: “I kukumi ana au i te kukumianga meitaki, kua oti toku oro anga, i mou marie na au i te akarongo.”​—2 Timoteo 4:7.

Taau ka rave. Eiaa e tamou ua rai ki runga i toou tarevake, akamanako rai i toou tu meitaki. Te akamanako maira a Iehova i te reira. Akakite te Pipiria e: “Kare te Atua i te Atua tuatua–tika kore, ka akangaro atu ei aia i ta kotou angaanga i rave, e to kotou anoano, i tona ingoa.”​—Ebera 6:10; Salamo 110:3.

Akamaara i teia: Kare e tangata apa kore. E puapinga kore ana te au tangata ravarai no tetai apinga e i tetai taime. Me rauka ia koe te tu matutu atu, ka rauka rai ia koe tetai apinga puapinga te ka tavini meitaki ia koe me pakari mai koe. Akakite a Maseli 24:16 e: “Kia taki itu ua atu te inga anga o te tangata tuatua–tika, e tu akaou mai aia.” Ka riro mai koe ei tangata mei te reira te tu!

[Au Tataanga Rikiriki i Raro]

[Pia/​Au Tutu i te kapi 13]

TA TOOU AU OA E TUATUA RA

“Me rave ua koe i te au mea taau e meitaki ra i te rave—me kare roa koe e tauta i te rave i tetai apinga ou no te mataku e ka puapinga kore koe—te ngere ra koe i te au atianga memeitaki.”

“Ka rauka ia koe te apii mei te tarevake e ka akakeuia kia meitaki mai, me kore ka rauka ia koe kia akamanako ua i te tarevake e kia takotinga i taau ka rave ki te mea tukatau kia koe. Tei runga te reira i toou tu ka iki noou uaorai.”

“Me kite au e kare e rauka iaku te rave i tetai apinga, kare au e manata atu i te reira. Meitaki atu i te kata no te reira eiaa e akamoupuku. Me teitei roa taau tapapaanga i te ka rauka ia koe, kare roa koe e mataora.”

[Tutu i te kapi 14]

Andrea

[Tutu i te kapi 14]

Trenton

[Tutu i te kapi 14]

Naomi

[Pia i te kapi 15]

EAA KOE KORE EI E UI KI TOOU NGA METUA?

Ia koe i toku mataiti, eaa te au manamanata taau i kite mai ana? Akapeea koe i te akono atu anga i te reira? E aro atu ana ainei koe i taua au akaaoanga ra i tetai taime ki tetai taime?

․․․․․

[Tutu i te kapi 15]

Muri ake i tetai inga anga, ka tu mai te tangata matutu​—ma te tauturu me ka inangaroia