E Tumatetenga Ngata Tikai

E tamaine maroiroi meangiti ua a Nicolle. Inara i tetai aiai kua mamae tona mimiti, e kua apai atu tona nga metua iaia ki ko i te are maki. I tera mai aiai, iaia e akaraia ra rai, kua rokoia a Nicolle e te maki pukuatu. I te akara akaou angaia aia, kua kitea mai e kua tu aia i tetai maki manumanu kare e kitea putuputuia ana tei totoa ki roto i tona ate, ngakau, e te pukuatu. I roto i te 48 ora, kua mate a Nicolle. E toru rai ona mataiti.

TE MATE o tetai tei akaperepereia e tupuanga tumatetenga maata rava me aro atu te tangata. Tetai au taime, penei e ngata i te akakoromaki i te mate. “Mii maata tikai au ia Nicolle,” i karanga ai a Isabelle, te mama o te tamaine. “E mii ana au i tana takave mai, tona kakara, e tona tu maru. Mii ana au iaia me oronga mai i tetai tiare naku i te au ra ravarai. E manako ua ana rai au ia Nicolle.”

Kua ngaro katoa ainei tetai tei akaperepereia e koe​—me e tamaiti, e tokorua, e tungane, e tuaine, e metua, me kore e oa piri tikai? Me koia ia, akapeea koe i te akakoromaki anga i toou tu tangi?