Anoano Nei Tatou Kia Ope te Mamae!

Akamata mai to Khieu mamae i te tamateia anga tona papa no tei tuku i te au puakatoro ki roto i te aua koni i te pae ua mai. Muri mai, kua tamateia tona mama pera te nga tuaine—na te Khmer Rouge o Kamupotia i ta. E oti kua takai a Khieu ki runga i tetai maina enua. E 16 ra tona tiaki anga i roto i te vao rakau kia tae mai tetai tauturu. Kua tipuia tona vaevae. “Kare au i inangaro ana kia ora mai,” i karanga ai a Khieu.

PENEI kua kite koe e kare te mamae e iriiri i te tu o te tangata. Ka rokoia tetai ua atu tangata e te tumatetenga natura, te maki e te pakipakitai, te kino, e etai atu au tumatetenga, i tetai ua atu ngai e te taime. Kua angaanga pakari tikai te au akaaerenga tauturu a te tangata kia paruru me kore kia akaiti mai i te mamae o te tangata. Eaa ra tei rauka mai no ta ratou tautaanga?

E akamanako i tetai akaraanga​—te tautaanga kia kore te onge. Karanga te nutipepa Toronto Star e e manganui tei ngere i te kainga e te kai no te tumatetenga natura. Tera ra, kua ripoti mai te reira e “kua takinoia te tautaanga a te au akaaerenga kia akaiti mai i te onge, no te maata o te kino.”

Kua tauta te au arataki poritiki, te pae o te tangata, e te pae rapakauanga i te akaiti mai i te mamae, inara kua puapinga kore ua. Kare te au porokaramu no te akatupu i te pae moni i takore ana i te putaua. Kare e rauka i te au vairakau paruru, te au vairakau rapakau e te au ravenga karape no te vavai maki i te akaope i te au maki pouroa. Kua akara ua te au akava e te au vaeau akatupu au i te ta ua e tupu ra, e te maata ua atura.

Eaa ra i maata ua ai te mamae? Te manako maira ainei te Atua i te tupu nei ki te tangata? Mirioni ua atu tei kite i te au pauanga pumaana ki teia au uianga i roto i te Pipiria, mei ta tatou ka kite.