Eaa ra i Maata ai te Mamae?

TE AU orometua tei karanga e kua kite ratou i te pauanga ki te uianga tei uiia i te tua kaui, e apii ua ana ratou e e utunga te mamae na te Atua. Ei akaraanga, te au ra i muri ake i te ngaruerue enua i Aiti, kua akakite tetai orometua i te oire maata ki tana putuputuanga e e karere taua tumatetenga ra no ko i te Atua. Tetai aronga kare ratou e taumaro roa ana. Karanga tetai tauturu poropeta Marike o te akonoanga e penei e maata te manako ana e: “Te tumu i akatupu ei te Atua i teia au tumatetenga, e mea ngaro te reira kare i te angaanga na tatou. Ta tatou angaanga ua rai, kia rauka te akarongo.”

Na te Atua ainei e “akatupu” ra i te mamae o te tangata? Te pau tika maira te Pipiria e kare! Kare te Atua ko Iehova i akakoro kia mamae te tangata. Inara, kua patoitoi nga tokorua mua i te ture a te Atua, kua iki kia akanoo i to raua uaorai au turanga no te meitaki e te kino. Kua ariu ke raua mei te Atua e kua rokoia e te kino. Teia tuatau te kite nei tatou i te kino no ta raua ikianga tarevake. Inara kare na te Atua i akatupu i te mamae o te tangata. Karanga te Pipiria e: “Eiaa rava e tangata pikikaaia e karanga e, Kua pikikaaia au e te Atua: kare rava te Atua e vavare i te kino, kare rava oki aia e pikikaa i te tangata.” (Iakobo 1:13) Ka tupu te mamae ki tetai ua atu tangata—pera katoa te aronga akaperepereia e te Atua. Akamanako ana i te au akaraanga e aru mai nei:

● E maki mate to te peroveta ko Elisaia.—2 Ariki 13:14.

● Tata te apotetoro ko Paulo e “te pongi nei matou, e te kaki vai, e te putaua, e te pāpāia nei, e kare rava e nooanga mou.”—1 Korinetia 4:11.

● Kua maki te Kerititiano ko Epaperodito e te “aue maata oki.”—Philipi 2:25, 26.

Kare e ngai e akakite maira kia tatou e te akautungaia ra teia aronga tokotoru e te Atua no ta ratou ara. Kare te Pipiria e akaari ua maira e koai tei kore i akatupu i te mamae. Te akataka katoa maira te reira e toru tumu maata e akatupu ana i te mamae.

 Ta Tetai Uaroai Ikianga

“Ko ta te tangata e ruru ra, ko tana ra ïa e kokoti.” (Galatia 6:7) Papu roa e, ko tetai tangata tei iki kia kai i te avaava, akaoro mako kore, me kore kaimoumou i tana moni, tei runga rai iaia te apainga no tetai ua atu tu kino ka tupu mai no tana ikianga.

Penei ka mamae katoa tatou no te au ikianga tika kore a tetai tangata. E tika e, na te tangata e rave ana i te au tu kino vinivini roa atu, mei te kino rikarika rai a te Nazi, e te takinokino tamariki. Na te taangaanga tau kore anga i to ratou tikaanga kia iki, riro te ikianga a tetai aronga ei akatupu i te mamae no etai ke.

Au Tupuanga Manako Koreia

I te anere mataiti mua T.N., kua inga tetai aka punanga i Ierusalema, kua mate e 18 tangata. Te taiku anga i te aronga i roto i teia tumatetenga, kua akakite a Iesu e: ‘Te manako na kotou e, e aronga ara maata ratou i to Ierusalema katoatoa ra? Kare!’ (Luka 13:4, 5) Kua kite a Iesu e kare te Atua i akautunga ana i taua aronga ra. Kua kite aia i ta te Tuatua a te Atua i akakite i muao e: “E tuatau ra, e te manuia ua, to te tangata katoa ra.” (Koheleta 9:11) Maata te au tumatetenga e tupu ana no te mea kua tarevake te ngai a tetai tangata i aere ei me kore no te apa o te tangata. Ei akaraanga, akaari mai te au ripoti e e maata atu te mamae me kopae te tangata i te au akamatakiteanga, e me kare e patu meitakiia te au are kia kore e ngaangaa me kino te reva e me ngaruerue enua. I taua au turanga ra, maata atu te tangata e kino ana i roto i te au tupuanga manako koreia, maata roa atu i reira te mamae.

“Te Ariki o Teianei Ao”

Akakite te Pipiria e: “Te vai ua nei rai to te ao ravarai i raro ake i taua vaerua kino ra.” (Ioane 12:31; 1 Ioane 5:19) Ko Satani, te Tiaporo, “taua vaerua kino ra,” e vaerua ora ririnui tei akatakaia mai ei “ariki mana o te reva.” Te akamaroiroi ra a Satani i “te vaerua e angaanga ririnui nei i roto i te aronga akarongo kore.” (Ephesia 2:2) Te au kino mei te akapou anga i tetai iti tangata e te takinokino tamariki, te taka ua ra e no te akakeuanga a Satani.

Inara, ko te aiteanga ainei e kare te Atua e manako mai ana i to tatou mamae? Ka rauka ainei e​—ka akaope ainei aia—​i te reira?

[Tutu i te kapi 5]

[Tutu i te kapi 5]

[Tutu i te kapi 5]