“Kare Au i Mate”

“Eiaa e tu i ko i toku vaarua aue ei,

kare au i reira.

Kare au i mate.”

● Kua kite koe i teia pee? I rongo ana koe te imeneia anga te reira? Te au raungauru mataiti i topa, kua riro teia pee ei akapumaana i te tangata i te ao nei. Karangaia e na te aronga atu pee tukeke i te au mataiti i aereia mai ana. Karanga katoa tetai aronga e e pure tanu mate na te Navajo. I te reo Papaa, rongonui te reira no te aerenga tuatua o te raini mua: “Eiaa e tu i ko i toku vaarua aue ei,” e kare no tona au tuatua openga i taikuia i runga akenei.

Rongonui teia imene i Tiapani i te au mataiti akenei, inara kua akatupu katoa te reira i te ekoko maata. E atoro putuputu ana te au tangata Tiapani i te menema o to ratou pamiri, i te akamaara i to ratou kopu tangata, tei irinaki ratou e te ora maira i tetai ngai ke. Tei tupu mai no te apii maira teia imene i tetai mea ke takiri mei ta ratou e irinaki ra, manganui tei ui e, “Teiea ra i reira tei mate?”

Kua roa te au Buda i Tiapani i te rave tanumanga anga, te apare e te akamaaraanga. Tera ra kare e rauka i te maataanga o te Buda i te pau i te uianga e, Teiea ra tei mate? Me kore i tetai atu au uianga mei te: Ka aere rai te aronga mate o te au akonoanga e te pa enua ki taua ngai ra? Eaa ra te tumu kare ei te aronga mate e tuatua mai?

Manganui te manako ana e kare e pauanga ki taua uianga ra, e kaimoumou taime ua te kimi i te pauanga. Inara penei ka umere rai koe e, ‘Eaa te ka tupu kia tatou me mate?’ Ka kitea ra te pauanga kiea? Karanga ra te Pipiria e i anga mai te Atua i nga tangata mua ma te tu apa kore e kua oronga i tetai kainga manea no raua. Rauka ia raua te manakonakoanga no te ora mutu kore i roto i te Parataito i te enua nei me akarongo raua i te Atua. Inara kare raua i akarongo.

I na kua akautunga te Atua ia raua. Kua tuaru aia i nga tokorua mei roto i to raua kainga Parataito e kua akamutu rai aia i te utuutu i to raua oraanga. Kua akamarama aia e eaa te ka tupu no to raua akarongo kore: “E one-pueu oki koe, e ka riro akaou rai koe ei one-pueu.” I angaia mai te tangata mei te one pueu, e i te openga​—i te matenga—​ka oki akaou aia ki reira.​—Genese 2:7; 3:19.

Tetai tangata i Kofu i Tiapani e akono ana i tetai ngai tanumanga maatamaata, akakite aia e: “Kua ki te au pia i te reu e te ivi me tuku au te reira ki roto i te vaarua. Mei te rima mataiti i muri mai, apa ua te vai ra. Taingauru mataiti i muri mai, kare takiri e apinga toe i roto i te maataanga o te pia.” Maaniia to tatou kopapa ki te au kemikara i roto i te one, te tuatau ka aereia, kua oki akaou ratou ki te one pueu. Eaa i reira tei toe mai?

Noatu ka kore te manakonakoanga me mate, ka akamaara mai Tei Anga ia tatou ma te akaperepere, i na kua kite ua aia i te au manu rirkiriki tataki tai me mate. (Mataio 10:29-31) Mei tana i taputou mai, ka akatu mai aia ia tatou, ae, ka ora akaou tatou. Ka kapiki mai aia ia tatou mei te mate.​—Iobu 14:13-15; Ioane 11:21-23, 38-44.

Me ka inangaro koe te kite maata atu no runga i teia tumu manako, te patiia atu nei koe kia tata ki te aronga nenei o teia makatini, ka mataora ratou te tuku atu i tetai akakiteanga, me kore e akara i runga i te Initaneti www.watchtower.org.