Oraanga Kare e Mamae Taputou Tau Kia Irinakiia

“E [na te Atua] e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.”​—Apokalupo 21:4.

KA RAUKA ainei te irinaki i teia taputou? E akamanako ana no runga i tetai o te au akamatakiteanga mua tei orongaia ki te tangata. Kua akakite te Atua kia Adamu e me akarongo kore aia, “ka mate ïa” aia. (Genese 2:17) E kua rave rai aia, mei ta te Atua tikai i tuatua. Ko teia e te mate, pera te mamae tei iri mai ki runga i te tangata ravarai, te akapapuanga e ka rauka i te irinaki i te Atua. E tumu ainei tetai kia ekoko e kare e tupu te taputou a te Atua kia akaoki akaou mai i te au turanga apa kore ki te enua nei?

E akamaara katoa i te au tu o te Atua, tei uriuriia i roto i te atikara i mua akenei. To tatou anoano kia ope te mamae, te akaata maira i to te Atua uaorai tu akaaroa, aroa, e te tika. Tetai katoa, te au tupuanga o teianei ao e te au tu matauia i teia tuatau, e akapapuanga te reira e kua vaitata roa mai te taime no te Atua kia akaope i te reira.​—Akara i te pia  “Aea Teia Au Mea Nei?”

Eaa ra i riro ei e ko te Atua ko Iehova tei tau kia akaope i te mamae o te tangata? Akamanako ana e​—i te taangaanga anga i tana Tamaiti ko Iesu​—akapeea i rauka ai iaia i te akanoo kia akatikatikaia te au tumu tikai o te mamae.

Ta tetai uaorai ikianga. Kua rave to tatou tupuna ko Adamu i tetai ikianga tei akatupu i te openga kino ki tana au tamariki pouroa. Kua tata te apotetoro ko Paulo e: “Te ngunguru anake nei te au mea katoa i angaia mei te mamae anau ra.” (Roma 8:22) Te rapakauanga a te Atua e mea tika rava, e tu tangi tikai, e te mama ua. Te akamarama maira a Roma 6:23 e: “E utunga te mate no te ara; kareka te ora mutu kore ra, e mea oronga uaia mai e te Atua i roto i to tatou Atu ia Iesu Mesia.”

E oraanga ara kore to te tangata apa kore ko Iesu. Riro tona mate i runga i te rakau tamamae ei oronga i te tumuanga tau no te akaora mai te au tangata akarongo mei te taumaa o te ara e te mate. Teianei e manakonakoanga to tatou no te oraanga mutu kore i roto i tetai ao te ka kore to tatou tu ara i te rave i te au ikianga tarevake. Ka kore katoa te aronga tei tamamae akakoro i etai ke, no te mea “ka riro oki te aronga i rave i te kino ra i te tipu keia.”​—Salamo 37:9.

Au tupuanga manako koreia e te tu apa ua. Te Ariki ikiia ko Iesu Karaiti, e mana tona kia akatere i te au mea natura o te enua. I te anere mataiti mua T.N., tei runga a Iesu e tana au apotetoro i tetai pai tautai e “kua tupu maira tetai uriia maata, ki maira te pai i te kare.” Te kapikiia anga kia tauturu, “tu akera [Iesu] ki runga, kauvae atura i te matangi, e na ko atura ki te kare, Kua oti ana, kia aki. Torue atura te  matangi, marino rava atura.” Kua umere tana au apotetoro. “I akarongo ei te matangi e te kare iaia,” i karanga ai ratou.​—Mareko 4:37-41.

Raro i ta Iesu tutaraanga, ko te aronga akarongo, “ka noo marie ua ïa ma te ora; e akaea ua aia ma te mataku kore i te kino.” (Maseli 1:33) Te o maira te tumatetenga natura. Ka ngaro katoa te tu akono kore i te enua, te au ravenga tau kore o te patu are, e te tu kamakura no runga i te au mea natura o te enua, e tetai atu au tarevake a te tangata. Kare e tangata e mamae no te mea kua tarevake tana ngai i aere ei.

Iaia i runga i te enua, kua akakite mai a Iesu e eaa tetai tuanga o tana tutaraanga te ka rauka i te akakore i te au tu mamae o teia tuatau tei taopenga mai ki te au tupuanga kitea koreia. “Ko au te tuakaouanga, e te ora,” i karanga ai aia. (Ioane 11:25) Ae, tei ia Iesu te mana, e te anoano ra aia kia akaora mai i te mirioni ua atu tei mate no te au tumatetenga natura. E taputou puapinga kore ainei teia? Kua akaketaketa mai a Iesu i te tumu no to tatou irinakianga i roto iaia, na te rave anga i te au akatuakaouanga iaia i runga nei i te enua. Kua rekotiia e toru o teia i roto i te Pipiria.​—Mareko 5:38-43; Luka 7:11-15; Ioane 11:38-44.

“Te ariki o teianei ao.” Kua iki te Atua ia Iesu Karaiti ei “akangere atu iaia nona te mate ra, koia oki te diabolo.” (Ebera 2:14) Kua akakite a Iesu e: “E akapaiaʼi teianei ao; ei teianei ka eke ei [akaateaia] te ariki o teianei ao.” (Ioane 12:31) Ka “akakore aia i te angaanga a te diabolo” na te takore anga i te akakeuanga a te Tiaporo mei te au angaanga a teianei ao. (1 Ioane 3:8) E akamanako ana i te tuke o te tangata me takoreia te tu vaerua noinoi o te Tiaporo, te pikikaa, e te anoano tika kore!

[Pia i te kapi 9]

 “Aea Teia au Mea Nei?”

Kua ui te au pipi a Iesu kiaia e: “Aea teia au mea nei, e eaa te akairo o toou ra parutia e te akaopengaanga o te akatereanga o te au mea nei?” (Mataio 24:3, NW) Ta Iesu pauanga, kapiti mai tetai atu au tataanga akauruia i muri ake i tona mate, te akakite maira e eaa te ka tupu me vaitata to te Atua tuatau i te akaope i te mamae. * Akaaite i te au totou i raro nei ki te au turanga e te au tu matauia i teia tuatau.

● Tamaki i te ao katoa​—Mataio 24:7; Apokalupo 6:4.

● Onge e te maki​—Luka 21:11; Apokalupo 6:5-8.

● Takino i te enua​—Apokalupo 11:18.

● “Noinoi” moni​—2 Timoteo 3:2.

● “Akarongo kore ki te metua”​—2 Timoteo 3:2.

● “Anoano i te au mea e navenave ei ra, kare i anoano i te Atua”​—2 Timoteo 3:4.

Ka rekareka te Au Kite o Iehova i te tauturu ia koe kia kite e te vaitata maira te oraanga kare e mamae. Aravei i te Au Kite i roto i toou ngai. Ka rekareka maata ratou i te apii i te Pipiria kia koe i roto i toou uaorai ngutuare me kore i tetai ngai tei tau ia koe.

[Tataanga Rikiriki i Raro]