Te Manako o te Pipiria

Ra Tapu i te au Epetoma​—Te Umuumuia ra Ainei?

TAKAPINI i teia ao, mirioni ua atu Mutirimi, ngati Iuda, e te au Kerititiano tutu ua tei akataka i tetai ra i te au epetoma ravarai no tetai au angaanga akonoanga. Eaa te tumu? Ei akaraanga, ko Ibrahim, e Mutirimi maroiroi, e aere ana ki te are pure i te au Varaire pouroa i te pure e te akarongo i te akoanga, akamarama mai aia e: “Inangaro au kia piri vaitata atu ki te Atua, e kia rauka te manako au.”

Te apii ra ainei te Pipiria e te umuumu maira te Atua ia tatou kia akono i tetai ra tapu i te epetoma? Ko te akamorianga ainei te ra okotai te taviri no te akaanga i te roi i te pae vaerua?

E Akanooanga Poto Ua

Tere atu i te 3,500 mataiti i topa akenei, kua taangaanga te Atua i te peroveta ko Mose kia oronga mai i tetai au ture puapinga maata. Kapiti mai taua Ture ra i tetai akanooanga no te au ra akangaroi, me kore au Sabati, tei akatakaia no te akamorianga. Te ra putuputu roa atu no te akangaroianga, ko te Sabati epetoma. Akamata i te opunga ra i te Varaire, ki te opunga ra i te Maanakai.​—Exodo 20:8-10.

Ka akono ainei te tangata o te au pa enua ravarai i taua ra akangaroi o te au epetoma? Kare, kare ratou e akono. I orongaia te Ture a Mose ki te ngati Iseraela anake ua e ta ratou au poroteraita. Tuatua te Atua kia Mose e: “Ka akono te tamariki na Iseraela i te sabati, . . . Ko te akairo ïa naku, e te tamariki na Iseraela e tuatau ua atu.” *​—Exodo 31:16, 17.

Karanga te Pipiria i te Ture a Mose e “e ata anake ïa no te ka tupu a muri atu.” (Kolosa 2:17) No reira, e tuanga te Sabati no tetai akanooanga poto ua no te akamorianga e tou atura ki tetai akanooanga ngateitei atu a te tuatau ki mua. (Ebera 10:1) Akaari maira te Pipiria i to te Atua manako e, ko te Ture tei orongaia ki to Iseraela kapiti mai te umuumuanga kia akono i tetai ra Sabati epetoma, kua ope te reira i te mate anga a Iesu. (Roma 10:4) Eaa tei mono mai te reira?

Mataara ou no te Akamorianga

Te akamorianga tei marekaia mai e te Atua i muri ake i te akatupu angaia te akakoroanga o te Ture a Mose, te akataka meitakiia maira i roto i te Pipiria. Te kapiti maira ainei te reira i te akamori anga i tetai ra takake i te epetoma?

Te akaari maira te au Tuatua Tapu e ko tetai au akauenga tei orongaia ki to Iseraela, no te aronga katoa i roto i te putuputuanga Kerititiano. Te kapiti maira teia i te akauenga kia kopae i te akamori itoro e te moeaana, pera te kore e kai i te toto. (Angaanga 15:28, 29) Tera ra, kare te au akauenga no runga i te au Sabati epetoma i kapitiia mai ki roto i te au mea tei umuumuia te au Kerititiano kia akono.​—Roma 14:5.

Eaa atu tetai e akakite maira te Pipiria kia tatou no runga i te tu e akamori ana te au Kerititiano o te anere mataiti mua? E uipa putuputu ana ratou i te pure, tatau irava, akarongo ki te akoanga, e te imene akapaapaa i te Atua. (Angaanga 12:12; Kolosa 3:16) I ko i taua uipaanga ra, e apiiia ana te au Kerititiano, akamatutuia to ratou akarongo, e te akamaroiroi i tetai e tetai.​—Ebera 10:24, 25.

 Kare e ngai i roto i te Pipiria e karanga ra e kia raveia te au uipaanga Kerititiano i te Tapati me kore i tetai ra takake i te epetoma. Eaa ra i reira te au Kerititiano tutu ua i akono ei i te Tapati ei ra tapu? Tupu mai te peu akamori i te Tapati, i muri ake i te oti anga te Pipiria i te tata, akamata mai i reira te au tu irinakianga, e te au peu kare i akatumuia ki runga i te Pipiria.

I akanoo akaou ana rai te Atua i tetai ra o te epetoma ei akamori anga na te katoatoa? Kare. Kua akanoo meitakiia te akaraanga no te tu o te akamorianga i roto i te Pipiria. Kare e au tataanga ke atu tei akauruia i kapitiia mai ana i roto i te au Tuatua Tapu. Kua akauruia te apotetoro ko Paulo kia tata e: “Ko matou uaorai oki, e tetai angela no te rangi mai, kia ako atu ia kotou i te evangelia ke, mari ra i tei akoia atu e matou kia kotou na, kia taumaaia aia.”​—Galatia 1:8.

Akamorianga Tau e Akamareka ra i te Atua

Noatu e te akono matatio ra te au arataki akonoanga i to Iesu tuatau i tetai ra tapu i te epetoma, kare ta ratou akamorianga i arikiia ana e te Atua no te kino o to ratou ngakau. Aronga noinoi moni ratou e te akavaavaa i te aronga akaaka e te maru. Noinoi ratou i te turanga papanunui, angaanga viivii, e kua piri ki roto i te angaanga poritiki i to ratou tuatau. (Mataio 23:6, 7, 29-33; Luka 16:14; Ioane 11:46-48) E mata ratou no te Atua i na ratou ei. E oti akera kua akariro ratou i te Sabati ta te Atua i akakoro no te akaangaroi, ei ture akatuikaa na ratou i te tangata.​—Mataio 12:9-14.

Te taka ua ra e, kare te akono anga i tetai ra tapu i te epetoma i te mataara tikai no te akamorianga te ka akamareka i te Atua. Eaa te anoanoia ra? Kua oronga mai a Iesu i teia patianga maoraora: “E aere mai kotou kiaku nei, ko te aronga katoa i roiroi, e te aronga teiaa i te apainga, naku e akaanga i to kotou roi.” (Mataio 11:28) Te akamorianga tei akatumuia ki runga i te au apiianga a Iesu, ka akaanga tika tikai te reira i te roi. E pikikaa kore te reira e kare e au peu akateimaa.

I teianei ao katoa, te aru vaitata nei te Au Kite o Iehova i teia akaraanga no te akamorianga e raveia ana e te au pipi mua a Iesu. E mataora ana te Au Kite i te porokaramu apii Pipiria i te au epetoma. Te au ra e raveia ana teia au uipaanga, e akatanoia ana te reira ki te turanga o te katoatoa, kare ki te au peu kare i tau i te Atua. Kore ei koe e aere ki tetai o taua au uipaanga i te ngai e noo ra koe kia kite tikai koe i te tu mareka o teia akamorianga?

[Tataanga Rikiriki i Raro]

I MANAKO ANA AINEI KOE?

● Ka anoanoia ainei koe te akamori i te Atua i tetai ra akatakaia o te epetoma?​—Roma 10:4; 14:5.

● Eaa tatou ka akaputuputu mai ei no te akamorianga?​—Ebera 10:24, 25.

● Eaa te taviri no te tu akamorianga merengo tikai?​—Mataio 11:28.

[Tiati/​Au Tutu i te kapi 28, 29]

(No runga i teia, akara i te puka)

RUIRUA

RUITORU

1 PARAPARAU

2 VARAIRE

3 MAANAKAI

4 TAPATI