Te Manako o te Pipiria

Te Turu ra Ainei te Atua i te Tamaki i Teia Tuatau?

NO RUNGA i te angaanga a te tumutoa, akakite a Davida te Ariki o Iseraela i taito e: “Te apii nei [te Atua] i toku rima i te tamaki: kua aatiia e oku nei rima te ana veo ra.”​—Salamo 18:34.

No runga i te au Kerititiano, kua tata te apotetoro ko Paulo e: “Tei roto rai oki to matou aerenga i te kopapa, kare ra matou i tamaki mei ta te kopapa ra: Kare oki ta matou taoonga tamaki i ta te kopapa.”​—2 Korinetia 10:3, 4.

Te patoi ra ainei tera nga irava i tetai e tetai? Me e au tumu ainei tetai i akatika ai te Atua i to Iseraela i taito kia aere ki te tamaki inara kare e akatika kia akapera te au Kerititiano? Kua taui ainei to te Atua turanga no runga i te tamaki? Ka taka meitaki mai te pauanga me akamanako tatou e toru au tumu tuke maata i rotopu i to Iseraela e te putuputuanga Kerititiano mou.

E Toru au Mea Tuke Maata

1. Ko te iti tangata Iseraela kua oronga te Atua i tetai au kena enua no ratou e kua koropiniia ratou e te au iti tangata makitakita. No reira kua akaue te Atua i tona iti tangata kia paruru i to ratou enua, e kua tauturu katoa ia ratou kia autu ki rungao i to ratou enemi. (Te Au Akava 11:32, 33) Kareka ra te putuputuanga Kerititiano, kare o ratou au kena i akanooia, e ka kiteaia to ratou au mema i te pa enua pouroa. No reira me ka piri te au pipi a Karaiti mei tetai enua ki roto i te tamaki anga atu i tetai enua, te tamaki atura i reira ratou i te au oa akarongo​—to ratou au tungane e te au tuaine—​tei akaueia ratou kia aroa, e kia mate no ratou.​—Mataio 5:44; Ioane 15:12, 13.

2. Ko Iseraela i taito e ariki tangata ua nei to ratou, e tei Ierusalema tona terono. Kareka te au Kerititiano mou, ko Iesu Karaiti to ratou tutara, e mea ora vaerua aia i teianei, tei runga i te rangi tona terono. (Daniela 7:13, 14) Akakite a Iesu uaorai e: “Kare to teianei ao taku basileia: naringa no teianei ao taku basileia, kua akamaroiroi ïa toku au tavini, kia kore au e tukuia ki te ngati Iuda; kare ra toku basileia i to ko nei.” (Ioane 18:36) No reira kare e rauka i tetai patireia poritiki, me kore mana tutara i te enua nei kia karanga e no Iesu ratou. Eaa te aiteanga o teia no to Iesu “au tavini,” me kore au pipi? Te akamarama maira te toru o te tumu i te reira.

3. Ko Iseraela i taito, mei tetai au iti tangata rai, e tuku ana ratou i tetai karere mei ta tatou e kapiki ana e e mata me kore e komono. (2 Ariki 18:13-15; Luka 19:12-14) Kua akapera rai a Karaiti, inara e rua nga mea tuke maata. Mea mua, e au mata me kore e au komono pouroa tana au pipi. No reira kua tata te apotetoro ko Paulo no runga i tona au oa Kerititiano e: “E karere matou na te Mesia.” (2 Korinetia 5:20) Ei au komono akamoeau, kare ratou e tamaki ana. Te rua, e tuatua ana te au pipi a Iesu ki te katoatoa rava te ka akarongo mai ki ta ratou karere. Akakite a Iesu e: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.” (Mataio 24:14) Karanga katoa aia e: “E teianei, ka aere kotou, e akariro i to te pa enua katoa ei pipi; . . . Ma te apii atu ia ratou, kia akono i te au mea katoa taku i akaue atu kia kotou.”—Mataio 28:19, 20.

Te mea taitaia ra, kare te au tavini o Karaiti e ariki rekareka uaia mai ana. Ko te tumu teia i tata ai a Paulo ki te tangata tutu evangeria ko Timoteo e: “E akakoromaki marie koe i te kino, mei te toa meitaki ki o Iesu Mesia ra.” (2 Timoteo 2:3) Ta Timoteo apinga tamaki, no te pae  vaerua e te kapiti maira i te Tuatua a te Atua i tataia, ko “te koke a te vaerua.”—Ephesia 6:11-17.

Eaa i Taui ei Mei to Iseraela ki te Putuputuanga Kerititiano?

Mei te 1,500 mataiti to Iseraela o anga ki roto i tetai pirianga takake rava e te Atua, tei akatumuia ki runga i tetai koreromotu, me kore akanoonooanga. (Exodo 19:5) Taua koreromotu tei riro a Mose ei arai, te kapiti maira i te Ture Ngauru e te au ture ke mai, tei turu pouroa i te akamorianga mou e te au turanga akono tau ngateitei. (Exodo 19:3, 7, 9; 20:1-17) Mea taitaia ra, kua akarongo kore to Iseraela ki te Atua, e kua tamate katoa i tona au peroveta.​—2 Paraleipomeno 36:15, 16; Luka 11:47, 48.

Te openga, kua tono mai te Atua i tana Tamaiti, ko Iesu Karaiti, tei anauia ei ngati Iuda. Kare ratou i ariki mai iaia ei Mesia, kua kopae te iti tangata ngati Iuda iaia. Tei tupu, kua takore te Atua i tana koreromotu roa te tuatau ki to Iseraela, e kua topa maira ki raro te arai akatutu ua tei akatakake i te ngati Iuda mei to te Etene. * (Ephesia 2:13-18; Kolosa 2:14) I taua taime rai, kua akatumu te Atua i te putuputuanga Kerititiano e kua iki ia Iesu ei Upoko no te reira. Tetai katoa, i mua ake i te openga o te anere mataiti mua, kua riro mai taua putuputuanga ra no te pa enua ravarai. “Ko te mataku ra [i te Atua], e ko te rave i te tuatua-tika, i te pa enua ravarai, ko tei kiteia mai ïa e ia,” i akakite ei te apotetoro ngati Iuda ko Petero.​—Angaanga 10:35.

E aru ana te Au Kite o Iehova i te akaraanga o te au Kerititiano o mua ana. No reira, kua kite matauia te Au Kite no ta ratou angaanga orometua, e to ratou turanga piri kore ki te angaanga poritiki e te tamaki. (Mataio 26:52; Angaanga 5:42) Ae, kare ratou e tuku ua atu i tetai apinga kia akatatipake ia ratou mei te akakitekite i te tuatua meitaki o te Patireia o te Atua, te kavamani ua rai te ka takore i te kino e te akatupu i te au tinamou i te enua nei. I te akamaara anga i taua manakonakoanga ra, kua tata te apotetoro ko Paulo e: ‘E teianei e karere matou na te Mesia, e akaongi kotou i te Atua.’ (2 Korinetia 5:20) E karere rapurapu maata atu ta tera au tuatua no teia tuatau, no te mea kua vaitata roa tatou ki “taua tuatau openga ra,” o teia akatereanga kino o te ao nei.​—2 Timoteo 3:1-5.

[Tataanga Rikiriki i Raro]

I MANAKO ANA AINEI KOE?

● Eaa te tu takake rava ta te au Kerititano ka akaari no tetai e tetai?​—Ioane 13:34, 35.

● Eaa ta te Kerititiano mou “apinga tamaki” maata?​—Ephesia 6:17.

● Eaa te karere puapinga ta te au mata o Karaiti e akakitekite nei?​—Mataio 24:14; 2 Korinetia 5:20.

[Tutu i te kapi 27]

E taokotaianga pa enua ravarai to te Au Kite o Iehova e kare ratou e piri ana ki te tamaki a te pa enua