Te Manako o te Pipiria

Eaa te Akakoroanga o te Metua?

TEEA i teia au mea te ka inangaro koe i taau tamaiti mapu kia riro mai?

A. Kia aiteite mei ia koe.

E. Ei tamaiti akarongo kore, tona akakoroanga eiaa kia riro mei ia koe.

NG. Ei tangata mako i te rave i te au ikianga tau.

Tetai au metua tei iki i te Tuanga Ng, penei ka akaari mai ta ratou ka rave e ko te Tuanga A, ta ratou e manako ra. Ka maro ratou kia aru ta ratou tamaiti mapu i to ratou kaveinga, te akakite kiaia e eaa te angaanga tana e iki. Eaa te tupu ana? Me maata mai te tamaiti, e kaveinga ke takiri tana ka aru. E maata te au metua tei iki i te Tuanga A, taopenga mai ki te tu tamariki e akatakaia maira i te Tuanga E.

Tumu Kare e Puapingaia te Akaaere Takiri i te Tamariki

Ka inangaro koe i taau tamaiti mapu kia riro mai ei tangata mako, e te kite i te rave i te au ikianga tau. Ka akapeea ra koe e taeria ai taua akakoroanga ra? Okotai apinga papu: Kare ko te akaaere takiri i te tamariki te pauanga. Akamanako ana e rua nga tumu.

1. Te akaaere takiri i te tamariki kare i te ravenga tau i te tuatua tapu. Anga mai te Atua ko Iehova i te tangata ma te tikaanga kia iki. Akatika aia i te tangata kia iki i te arataa ta ratou ka aru i te oraanga, noatu e meitaki e me kare. Ei akaraanga, i te akamou riri anga a Kaina i tona teina ia Abela, akakite a Iehova kiaia e: “Kia rave koe i te meitaki ra, kare ainei koe e kiteia mai? e kare i meitaki ra, kare ainei te vai ra te tarangaara i te ngutupa na? E kauraro ra aia ia koe, e ei runga ake koe iaia.”​—Genese 4:7.

Akara ana ra e, i to Iehova oronga anga i te ako taka meitaki kia Kaina, kare aia i maro ana iaia kia akono i te reira. Tei runga ia Kaina te iki e me ka akakore aia i tona riri e me kare. Te apiianga? Me kare a Iehova e maro i tana au mea ora i anga kia akarongo mai iaia, eiaa rai tatou e akapera i ta tatou au mapu. *

2. Te akaaere takiri i te tamariki, e puapinga kore ua ana te reira ravenga. Akamanako ana i tetai tangata okooko e maro maira ia koe kia oko i tana apinga. Te maata atu i tana maro mai kia oko koe, ko te maata atu ia taau patoi. Noatu te inangaro ra koe i tana apinga, kare ra oki koe e reka ana i tona tu. Inangaro koe te akaatea mai mei ko iaia.

Mei te reira rai te ka tupu me maro koe i taau tamaiti kia aru i toou kaveinga, irinakianga, e te au akakoroanga. Ka “akatika” ainei aia? Kare paa! E apinga ke takiri tana ka rave, e ka akatupu i tona mareka kore no te au turanga taau i akanoo. Maata ua atu te taime e puapinga kore ana te au tautaanga a te metua kia akaaere takiri i te tamariki. Eaa i reira taau ka rave?

Eiaa e akaaere takiri i te oraanga katoa o taau tamaiti, te maro anga iaia kia aru i toou au kaveinga mei taau i matau ana i tona tamarikianga, tauturu ra iaia kia kite e e tu pakari te rave i te mea tika. Ei akaraanga, me e Kerititiano koe, akaari kiaia e peea te akarotai anga i te oraanga ki te au kaveinga a te Atua, i te akatupu anga i te merengo maata no te toenga o tona oraanga.​—Isaia 48:17, 18.

Ia koe e rave ra i te reira, akanoo i te akaraanga. Kia aite koe mei te tangata rai ka inangaro i taau tamaiti mapu i te aru. (1 Korinetia 11:1) Akapapu kia taka meitaki te au kaveinga taau i  iki kia aru. (Maseli 4:11) Me akatupu taua tamaiti i te inangaro no te Atua e tona au turanga, ka rave aia i te au ikianga tau noatu kare koe i reira.​—Salamo 119:97; Philipi 2:12.

Apii i te au tu Tareni Tau

Mei tei akakiteia mai i te kapi 2 o teia makatini, ka tae mai te ra​—penei kare e roa atu ana me tamanako koe​—“e akaruke ei te tangata [taau tamaiti tangata mamaata] i tona metua tane e tona metua vaine.” (Genese 2:24) Ei metua, ka inangaro koe te akapapu e kua rauka iaia te au tu tareni tau tei anoanoia nona kia noo meitaki ei tangata mamaata. Akamanako ana i tetai au tu tareni ka rauka ia koe te tauturu iaia kia akatupu, iaia e noo ra i te kainga.

Au Tareni Akono Ngutuare. Ka kite ainei taau tamaiti mapu i te tunu kai? pua e te auri i tona kakau? tama e te akamako i tona pia moe? te akono e te ripea i te motoka? A tetai ra ka tauturu taua au tareni ra i tetai tamaiti me kore tamaine i te akaaere i te ngutuare. Akakite te apotetoro a Paulo e: “Kua kite au i te akakoromaki i te au mea ravarai i rokoia mai ei au nei.”​—Philipi 4:11.

Au Tareni no te Pirianga Tangata. (Iakobo 3:17) E meitaki ainei te pirianga o taau tamaiti ki etai ke? Ka rauka ainei iaia te akaau meitaki ua i te au manamanata? Kua tereni ainei koe iaia kia akangateitei i te tangata e kia akatikatika i te au manamanata ma te au? (Ephesia 4:29, 31, 32) Te na ko ra te Pipiria e: “E akangateitei atu i te tangata ravarai.”​—1 Petero 2:17.

Akaaere i te Moni. (Luka 14:28) Ka rauka ainei ia koe i te tauturu i taau tamaiti mapu i te tereni no tetai ngai angaanga, te akaravarava i te moni, e te kopae i te kaiou? Kua tereni ainei koe iaia kia akaputuputu no tetai au mea ka anoanoia e kia kopae i te oko manako kore ua, e kia mareka ua i te au mea i rauka? (Maseli 22:7) Tata a Paulo e: “E teianei, e kai ta tatou, e te kakau, kia mareka tatou i te reira.”​—1 Timoteo 6:8.

Te au mapu tei apii i te aru i te au kaveinga tiratiratu e tei rauka te au tareni tau, kua papa meitaki tikai ratou no te oraanga o te aronga mamaata. Kua taeria te akakoroanga o to ratou au metua!​—Maseli 23:24.

[Tataanga Rikiriki i Raro]

I MANAKO ANA AINEI KOE?

● Ei metua, eaa toou akakoroanga?​—Ebera 5:14.

● Eaa te au apainga a taau tamaiti mapu me pakari mai aia?​—Iosua 24:15.

[Au Tutu i te kapi 25]

Teea taau ka inangaro i taau tamaiti mapu kia riro mai?

Kia aiteite mei ia koe rai . . .

Ei tamaiti akarongo kore . . .

Ei tangata pakari mako