Ui te au Mapu E

Koai ra Au?

Kite atu a Michael ia Brad e aere maira, kare aia i reka ana no te mea kua kite aia e eaa te ka tupu. “E Mikey, tamata koe i teia!” i na Brad ei. Oora mai a Brad i tona rima, kite atu a Michael i tana tikai e manako ra e ka kite aia—e rora maruana ou ua. Kare aia i inangaro ana i te apai e kare katoa aia e inangaro ana kia manakoia mai e e aka ruti aia. “Kite koe eaa,” i tuatua maru ua atu ei a Michael, “penei a tetai taime ke atu. . . . Ine?”

Kite atu a Jessica ia Brad e aere maira, e kua papa ua aia no te ka tupu. “E Jess, tamata koe i teia!” i na Brad ei. Oora mai a Brad i tona rima kite atu a Jessica i tana tikai e manako ra e ka kite aia​—e rora maruana ou ua. “Kare au e inangaro,” i na Jessica ei. “E parani taku no te tuatau ki mua kia meitaki au i te akaea. E tetai e Brad, . . . te manako nei au e e tangata kite koe e kare e kai avaava!”

ROTO i nga turanga i runga akenei, eaa ra i mama ua ai ia Jessica i te patoi i te taomianga? No te mea kua rauka iaia tetai apinga kare i rauka ia Michael. Kua kite koe e eaa te reira? E akatakaanga e koai aia. Kare, kare i te kati e ingoa e te tutu to runga. Ko te akatakaanga, e manako papu te reira i roto ia koe uaorai e akakite maira kia koe e koai koe e eaa toou turanga. Na taua kite ra e akamaroiroi ia koe kia patoi i te manamanata—kia akaaere i toou uaorai oraanga e kia kore e tuku na tetai ke e akatere ia koe. Ka akapeea koe te akatupu anga i taua tu manako papu ra? Meitaki paa e akamata koe na te pau anga i te au uianga ka aru mai.

1 EAA UA AI TOKU AU TU MEITAKI?

No teaa i puapinga ai: Kia kite i toou au tareni e toou au tu meitaki, ka akamaata atu i toou tu manako papu.

Akamanako ana: Tukeke te tareni o te au tangata ravarai. Ei akaraanga, tetai aronga e taunga ratou i roto i te angaanga ati e te akatangi imene, e ko tetai aronga e meitaki ratou i te angaanga tarekareka. Ko Raquel, apinga tikai aia i te maani motoka. * “Tae anga toku mataiti ki te 15,” i nana ai, “inangaro au kia riro mai ei mekeniki.”

Akaraanga Pipiria: Kua tata te apotetoro ko Paulo e: “Te kamakura ra au i te tuatua, kare ra au e kamakura i te kite.” (2 Korinetia 11:6) No tona kite meitaki i te Tuatua Tapu, kua rauka ia Paulo i te paruru iaia uaorai me akaaoangaia mai. Kare aia i tuku ana i te tu papu kore kia akangaueue i tona irinakianga.—2 Korinetia 10:10; 11:5.

Akara matatio ia koe uaorai. I raro ake, tata i taau tareni me kore i toou tu kite karape.

․․․․․

 Teianei e akataka mai i tetai tu meitaki taau e akaari ana. (Ei akaraanga, e tangata manako ainei koe i etai ke? tu oronga ua? irinakiia? kare e tureti ana?)

․․․․․

“Tauta ana au i te tauturu i te tangata. Me inangaro tetai tangata i te pukapuka e e maata taku angaanga, ka akaruke au i taku e rave ra e ka akarongo atu kiaia.”—Brianne.

Me ngata ia koe te akataka i tetai tu meitaki, e akamanako i tetai tu tau tei rauka ia koe te akatupu mei toou tamarikianga mai, tata i te reira i raro akenei.—No te au akaraanga, akara i te pia  “Ta Toou Au Oa e Tuatua Ra.”

․․․․․

2 EAA UA AI TOKU AU TU PARUPARU?

No teaa i puapinga ai: Kare e ketaketa te vivi me paruparu tetai paunga, mei tera rai toou akatakaanga, ka taui viviki ua me tuku koe i toou au tu paruparu kia akaaere ia koe.

Akamanako ana: Kare e tangata apa kore. (Roma 3:23) Te au tangata ravarai e au tu to ratou e inangaro ana ratou i te taui. “Eaa ra au e akatika ai i te au mea neneva ua kia akamanata mai iaku?” i ui ei tetai tamaine ko Seija tona ingoa. “Manga apinga ua ake kua maitu au, e oti ngaro vave ua toku manako!”

Akaraanga Pipiria: Kua kite a Paulo i tona au tu paruparu. Kua tata aia e: “Te rekareka nei oki au i te ture a te Atua i te akonoanga i te tangata i roto ra; Te kite nei ra au i tetai ture i roto i toku kopapa nei, i te māro mai anga i te ture i roto i toku ngakau, e te akariro anga iaku ei tuikaa na te ture kino.”—Roma 7:22, 23.

Akara matatio ia koe uaorai. Eaa ua ai te au tu paruparu ka anoanoia koe kia akakoromaki?

․․․․․

“Kite mai au e me oti au i te akarakara i tetai teata akameamea, e maromaroa ana au, inangaro au i tetai tokorua noku. Teianei ra kua kite au e ka anoanoia au kia matakite i taua tu tamataora anga.”—Bridget.

3 EAA RA TOKU AU AKAKOROANGA?

No teaa i puapinga ai: Me e akakoroanga toou, ka kite koe e e kaveinga tetai i toou oraanga, e e aiteanga katoa tetai. Ka rauka ua ia koe te kopae i te au tangata e te au turanga te ka arai ia koe mei te akatupuanga i taau i akakoro.

Akamanako ana: Ka tomo ainei koe ki roto i tetai taxi e ka akakite ki te tangata akaoro kia akaoro takapinipini aere ua e pou ua atu te penitini? E auouo rai​—e te akapou moni! Ka tauturu te au akakoroanga ia koe kia kore e aere takapinipini ua i roto i toou oraanga. E ngai papu taau e aere ra, e parani taau kia tae ki reira.

Akaraanga Pipiria: Kua tata a Paulo e: “Te oro nei au, kare ra mei te mea kare i kitea.” (1 Korinetia 9:26) Kare aia i tuku ua ana i te au mea kia tupu kiaia i roto i te oraanga, kua akanoo  ra a Paulo i tetai au akakoroanga e kua akarotai i tona oraanga kia tau ki te reira.​—Philipi 3:12-14.

Akara matatio ia koe uaorai. I raro ake, tata e toru au akakoroanga ka inangaro koe kia tupu a teia mataiti ki mua.

1 ․․․․․

2 ․․․․․

3 ․․․․․

Teianei, e iki i te akakoroanga puapinga roa atu kia koe, e oti tata i taau ka rave i teianei kia akatupu i te reira.

․․․․․

“Me kare e maata taku angaanga, tarevaka ua toku oraanga. E ngari ake kia akanoo i tetai au akakoroanga e kia tauta i te akatupu i te reira.”​—José.

4 EAA UA AI TOKU AU IRINAKIANGA?

No teaa i puapinga ai: Me kare e irinakianga, ka ekoko koe. Ka aite koe mei te moko arara rai, ka tieni koe i toou kara kia aite ki toou au oa—e akairo papu tera e kare oou uaorai akatakaanga.

Akamanako ana: Te akamaroiroi maira te Pipiria i te au Kerititiano kia ‘taka tikai ia ratou uaorai to te Atua anoano, tei meitaki e te tau e te apa kore.’ (Roma 12:2) Me kua akatumuia taau e rave ra ki runga i toou irinakianga, ka vai tiratiratu ua rai koe—noatu eaa ta etai ke ka rave.

Akaraanga Pipiria: Tona mapuanga, ‘te manako ra te ngakau’ o Daniela peroveta e ka akono aia i te au ture a te Atua, noatu kua takake mai aia mei tona pamiri e tona au oa akamori. (Daniela 1:8) Na te akapera anga, kua vai tiratiratu uaorai aia. Kua akarotai a Daniela i tona oraanga ki tona irinakianga.

Akara matatio ia koe uaorai. Eaa ua ai toku irinakianga? Ei akaraanga:

● Irinaki ainei koe i te Atua? Me koia ia, eaa te tumu? Eaa te akapapuanga taau i irinaki tikai e te vai nei aia?

● Irinaki ainei koe e ka riro te au turanga akono tau o te Atua ei meitaki noou uaorai? Me koia ia, eaa te tumu? Ei akaraanga, eaa koe i irinaki ei e ka mataora atu koe i te akono i te au ture a te Atua no runga i te pirianga ainga, i to te aru i te oraanga “marikonga kore” o toou au oa?

Kare e inangaroia kia pau viviki i teia au uianga. Akapou i tetai taime i te akamanako e eaa tikai te tumu no toou au irinakianga. Me akapera koe, ka rauka ua ia koe te paruru i te reira.​—Maseli 14:15; 1 Petero 3:15.

“I te apii, ka tatiaeae te tamariki ia koe no toou au tu paruparu, e kare au e inangaro ana kia ngaueue toku akarongo. I na, kua akamata au i te akataka meitaki i te au tumu ngaueue kore no toku irinakianga. Kare au e karanga ana ki te tangata e, ‘Kare e rauka iaku no te mea kare taku akonoanga e akapera ana,’ mari ra, ‘kare au e manako ana e e tika te reira.’ Ko toku au irinakianga teia.”​—Danielle.

I te openga, ko teea taau ka inangaro—e rau rakau pururu tei aangi aere uaia e te matangi, me e tumu rakau matutu i te pange i te au uriia ririnui? Akamatutu i toou akatakaanga, e ka riro koe mei tera pu rakau. Na te reira e tauturu ia koe i te pau i te uianga e, Koai ra au?

[Tataanga Rikiriki i Raro]

[Pia/​Au Tutu i te kapi 27]

TA TOOU AU OA E TUATUA RA

  “Teianei kua pakari mai au, kua kite au te akamanako meitaki i tetai au mea me rave au i tetai ikianga maata me kore meangiti, e te kopae i te au angaanga ka akamareka kore i te Atua.”

“Toku meangiti ake anga, e manako ana au e e tuke ua ake rai te aronga kare mei iaku rai. Teianei ra, reka ua au e kare e aiteite ana te katoatoa, e e inangaro ana au kia kite i te manako o etai ke.”

[Tutu i te kapi 26]

[Tutu i te kapi 26]

(No runga i teia, akara i te puka)

AU TU MEITAKI

AU TU PARUPARU

AU AKAKOROANGA

AU IRINAKIANGA

[Tutu i te kapi 27]

Jeremiah

[Tutu i te kapi 27]

Jennifer

[Pia i te kapi 28]

KORE EI E UI KI TOOU NGA METUA?

Eaa taau tareni e kite ra i roto iaku? Eaa toou manako te au tu ka tau kia akameitaki atu au? Akapeea koe te akamutu anga i te irinakianga i roto i to te Atua au turanga?

[Tutu i te kapi 28]

Me e akatakaanga matutu toou, aite rai koe mei te pu rakau ngaueue kore te ka rauka ua i te pange i te uriia