Ta te au Metua e Tuatua Ra

Me e metua koe no tetai tamaiti kare i aere ake ki te apii, kare e kore e e au akaaoanga taau e kite ra. Ei akaraanga, eaa taau ka rave me manava kino te tamaiti? Ka akapeea koe te apii anga i taau tamaiti kia kite e eaa te mea tika e te mea tarevake, e te oronga anga i te akatikatikaanga tau? Akara ra e i akapeea tetai au metua i te rave anga i teia.

TU MANAVA KINO

“I te tuatau o te ‘nga mataiti ngata,’ ka tapapa mai te tamaiti kia rauka tana e inangaro ra. Te manamanata teia o ta maua tamaiti. Me kare e akatikaia tona anoano, ka akamata aia i te pepei apinga. Ta maua tamaiti mua teia, e kare o maua kite no runga i teia tu manava kino. Kare katoa maua e pumaana ana i te akakite mai anga tetai au metua e ko te tu rai teia o te tamariki.”​—Susan, Kenia.

“Tae anga te rua mataiti, ka takoto ta maua tamaine ki runga i te taua, ka ava ava, ka aue, ka tuetue . . . Manamanata tikai! Kare e puapinga i te tuatua atu kiaia i tera taime. I na e tono ana maua ko taku tane iaia ki roto i tona pia ma te akakite marie ua kiaia e, me maru mai aia kia aere mai ki vao, ka uriuri ei maua i taua mea ra kiaia. Te maru mai anga aia, aere atu tetai o maua ki tona pia i te tauturu iaia kia marama e no teaa tona tu i kore ei e tau. Kua puapingaia teia ravenga. E tai taime, akarongo atu maua iaia e pure ra ki te Atua i te pati kia akakore mai i tana ara. Kua iti mai tona tu manava kino i te au taime i aereia, e oti kua akamutu ua.”​—Yolanda, Paniora.

“Ka kimi ravenga te au pepe kia kite e me ka rauka rai ta ratou e inangaro ra. Me akatikaia te tamaiti kia rave i taau i akataka meitaki eiaa aia e rave, te akaekoko ra koe i te tamaiti. Kite mai maua e me vai ngaueue kore maua kare e akatuke i ta maua tika i tuku, ka kite marie ua ta maua tamariki e kare te ava ava i te mataara meitaki e rauka ai ta ratou e inangaro ra.”​—Neil, Peritane.

AKO

“Me tei raro ake te tamaiti i te rima mataiti, e ngata i te kite e me te akarongo maira aia. Mea puapinga kia ripiti ua rai. E ripiti ua rai koe ma te akatutu katoa atu, e kia tangianga papu tikai toou reo.”​—Serge, Varani.

“Noatu e tai rai ngai e utuutuia ra ratou, tuke rai ta maua au tamariki tetai mei tetai. Ka aue ua okotai me kite aia e kare maua e mareka ana iaia; tetai mai ka titau aia kia kite e me ka rauka rai tana e inangaro ra. Tetai au atianga ka rava ua te akatuma atu i te mata me kore i te akamura atu, kareka i tetai au taime e tuku ana maua i tetai utunga tau.”​—Nathan, Kanata.

“Mea puapinga eiaa e tuku i te au. Inara i taua taime rai eiaa te metua e maro atu me kore, eiaa e pakari roa. Tetai au taime me kua tataraara tikai te tamaiti, ka akamanako rai maua e kia tau ua te ako e kia mama ua te reira.”​—Matthieu, Varani.

“E tauta ana au eiaa kia maata te ture, inara ko te au ture taku i akanoo e akataka meitaki ana au e kare te reira e tuke. Kua kite ua taku tamaiti toru mataiti e eaa tana ka kokoti no te akarongo kore, na te reira i tauturu iaia kia akamako i tona tu. E tika, me roiroi au, ka mama ua iaku i te kopae i tana angaanga tarevake. Inara, ngaueue kore rai au i taku i tuatua, te tauta pakari anga i te akatano iaia. Puapinga maata kia ngaueue kore!”​—Natalie, Kanata.

TU NGAUEUE KORE

“Ka maara ua i te tamariki tetai ua atu taime ka akatuke te metua i ta ratou i tuatua.”​—Milton, Porivia.

“Tetai au taime ka ui mai ta maua tamaiti no runga i taua apinga rai, na roto i te au mataara tukeke kia kite aia e me ka aiteite ua ta maua pauanga ka oronga atu. E me ka tuatua atu au i tetai apinga e oti e apinga ke ta tona mama ka tuatua mai, ka akariro aia i te reira ei kotoeanga nana kia akatikaia tona inangaro.”​—Ángel, Paniora.

“Tetai au taime kare au e akono atu ana i te tu kino o taku tamaiti me rekareka au, me riri ra au ka akautunga pakari au iaia. Kua kite au e ka akakino roa atu teia i tona tu.”​—Gyeong-ok, Korea.

“Mea puapinga kia marama te tamariki e me e tarevake tetai tu i teia ra, ka tarevake ua atu rai te reira.”​—Antonio, Paratiri.

“Me kare nga metua e ngaueue kore, ka manako te tamaiti e kare a Tati raua ko Mami e papu ana e eaa te ka rave, ta raua tukuanga tika tei runga ua i to raua turanga manako. Inara me tamou nga metua ki to raua kaveinga, ka kite te tamariki e me e tarevake tetai tu, ka tarevake ua atu rai te reira. Tetai mataara teia no nga metua i te akamou i tetai turanga ponuiaau e te aroa.”​—Gilmar, Paratiri.

“Ka rauka ua i te tamariki i te maani kotoeanga no tetai turanga, e kare atu a nga metua ravenga mari ra kia akatika i ta ratou patianga—i mua i te tangata. Mei te mea taku pauanga e, e kare, e akakite ana au i te reira i te akamataanga, e ka akapapu meitaki au ki taku tamaiti e kare au e akarongo atu me patipati ua mai rai aia noatu eaa te tu.”​—Chang-seok, Korea.

“Ka anoanoia nga metua kia taokotai. Me kare maua ko taku vaine e taokotai no runga i tetai apinga, e uriuri ana maua i te reira ko maua ua. Ka kite ua te tamariki me kare to ratou nga metua e taokotai ana no runga i tetai mea, e ka akariro ratou i te reira ei kotoeanga kia tu ta ratou e inangaro ra.”​—Jesús, Paniora.

“Me kite te tamaiti e te taokotai ra tona nga metua e kare e rauka i te tarurike ia raua, ka rauka tona turanga ponuiaau. Kite ua aia eaa tana ka tapapa atu, noatu ka akarongo aia e me kare.”​—Damaris, Tiamani.

“Kia maua ko taku vaine, te kapiti katoa maira te tu ngaueue kore i te akamou anga ki ta maua tuatua me taputou maua i tetai apinga manea na ta maua tamaine. Na teia mataara ka kite aia e ka rauka ua iaia te irinaki i ta maua ka taputou.”​—Hendrick, Tiamani.

“Me tauiui ua rai toku pu angaanga i te angaanga tei umuumuia au kia rave i te ngai angaanga, ka riri roa au. Kare te tamariki i tuke. Rauka to ratou turanga ponuiaau me kite ratou e eaa te au ture, e me kite ratou e kare e tuke te ture. Ka anoano katoaia kia kite ratou e e utunga to te akarongo kore, e kare katoa rai teia e tuke.”​—Glenn, Kanata.

 [Tataanga i te kapi 8]

Kia riro ta kotou “koia, ei koia; e ta kotou kare, ei kare.”​—Iakobo 5:12

 [Pia/​Au Tutu i te kapi 9]

PAPAANGA PAMIRI

Nui Kare i Paraniia Ana​—Peea Maua i te Akatanotano Anga

Akakiteia e Tom raua ko Yoonhee Han

Tom: E ono rai marama to maua akaipoipo anga, kite mai a Yoonhee e kua nui aia. Noo muteki ua au no te mea inangaro au te akapapu kia Yoonhee e ka rauka iaia te irinaki ki runga iaku no te tauturu e te maroiroi. Kareka i roto i toku ngakau, mataku tikai au!

Yoonhee: Taitaia tikai au​—e te mataku! Aueue ua au; manako au e kare au i papa e kare katoa au e tau kia riro ei metua vaine.

Tom: E kare rai au i manako e kua papa au kia riro ei metua tane! Muri ake ra oki i te tuatua anga ki toku nga metua, kite mai maua e kare i te apinga ou te nui kare i paraniia. Kua tauturu katoa te reira ia maua kia akarongo ki te tuatua a tetai au metua no runga i te mataora i te riro anga ei metua tane, e ei metua vaine. Riro marie ua mai toku mataku e te papu kore ei manakonakoanga rekareka.

Yoonhee: Muri ake i te anau anga mai a Amanda, tupu mai tetai au akaaoanga ke. Aueue ua aia kare e akamutu, e kare au i moe meitaki ana no tetai au epetoma. Kare au e kaki kai e kua riro teia ei akaroiroi takiri iaku. Te akamata anga, kare au e inangaro kia piri atu ki te tangata. Inara kua kite mai au e kare te noo ua i te kainga e tauturu iaku. I na kua akapou au i tetai taime i te piri ki te au metua vaine ou. Riro teia ei atianga noku i te ‘puka atu i toku turanga’ ki te aronga mei iaku rai, e kua tauturu teia iaku kia kite e kare ko au ua tei tu i te manamanata.

Tom: Tauta pakari au kia tinamou te peu matau a te pamiri. Ei akaraanga, ei Au Kite no Iehova, akapapu meitaki maua ko Yoonhee e kia tae putuputu ki te angaanga orometua e te au uipaanga Kerititiano. Tetai katoa, ka anoanoia te moni i te atianga manako koreia me anau tamariki. E akapapu ana maua eiaa e kaimoumou kia kore e o ki roto i te kaiou, te ka akamaata atu i te manamanata.

Yoonhee: Te akamataanga, manako au e kare paa e tau kia piri ki te angaanga orometua, no te aueue a te pepe. Tikaanga ra oki, e reka ana te tangata i te akarakara i te au pepe. Riro te kite anga i te reira ei tauturu iaku kia piri rai ki te angaanga orometua, e kia kore e manamanata no runga i taku pepe.

Tom: Karanga ra te Pipiria e ko te tamariki “e tuanga ïa no ko ia Iehova ra” e “e tutaki ïa.” (Salamo 127:3) Kiaku, te akaari maira tera au tuatua e e apinga aroa akaperepere te tamariki. Mei tetai ua atu apinga tei orongaia mai, e ikianga taau ka rave: Ka rauka ia koe te taangaanga meitaki, me kore ka kaimoumou koe i te reira. Te kite nei au e, e puapinga te au turanga tukeke o to te tamaiti tupuanga, e ka anoanoia au kia o ki te au turanga ravarai o te oraanga o taku tamaine, no te mea me pou tera tuatau, kare te reira e rauka akaou mai.

Yoonhee: Tetai au taime, e tupu ana to tatou poitirere i roto i te oraanga, inara kare te anau anga mai tetai tamaiti parani koreia i te poitirere kino. E ono o Amanda mataiti i teianei, e kare au i kite e mei teaa ra te tu o toku oraanga me kare aia.

[Tutu]

Tom raua ko Yoonhee e ta raua tamaine, ko Amanda