Ta te au Metua e Tuatua Ra

I ta kotou tamariki e tupu maira, akapeea kotou me tauturu ia ratou kia kite i te puapinga o te akarongo? Akapeea kotou me apii ia ratou i te au turanga tau ia ratou e mamaata maira? Akara mai i ta tetai au metua takapini i teianei ao e tuatua ra.

AU TARENI NO TE PIRIANGA TANGATA E TE NGUTUARE

“Me kaikai kapiti e me tuatua matou no to matou ra, ka kite te tamariki akapeea me akarongo. Me kite raua ia mama raua ko papa e akarongo maira, ka akaketaketa te reira i to raua tu akarongo i tetai e tetai e nona uaorai.”​—Richard, Peritane.

“E mea pumaana tikai i te kite i ta maua tamariki i te akono meitaki ia ratou uaorai, e i te kite ia ratou e akatikatika ra i to ratou au manamanata ma te kore e tauturu. E ka komunikeiti papu tikai ratou e te au metua.”​—John, Aperika Apatonga.

“Kare au i te tangata apa kore, e i tetai au taime e riro ana toku tu ei akamamae i taku tamariki. Me tupu te reira, e mea puapinga noku kia tataraara atu no toku tarevake.”​—Janelle, Australia.

“E tereni ana maua i ta maua tamariki kia rave i te au angaanga i te kainga. Te apii anga ia ratou kia rave i te angaanga te ka puapinga tetai ke, ka riro ei tauturu i te pamiri kia tere meitaki ki mua ma te au, e ka rekareka te tamariki e kua rauka ia ratou i te rave i tetai mea meitaki.”​—Clive, Autireria.

“Kare i te angaanga mama i te rave, inara e mea puapinga kia apii ia ratou kia marama i te turanga o etai ke, kia akarongo e kia akakore i te ara a tetai ke.” ​—Yuko, Tiapani.

TU MA E TE KOPAPA MAROIROI

“Te mapu anga ta maua tamariki, kua apii maua ia ratou kia pai ia ratou uaorai e kia akariro i te reira ei mea mataora na te taangaanga anga i te pua tei akamaneaia, e te pua rouru e tutu katunu to runga i te moina, e te oma (sponge), mei te manu rai te akaraanga.”​—Edgar, Meiko.

“Te tuatau e noo ana matou kare e vai paipa, e akapapu ua ana rai au e e pua tetai e te vairanga vai i tetai ngai tau ei tama i to matou rima ia matou e tomo atura ki roto i te are.”​—Endurance, Naiteria.

“I te au ra ravarai, e kai meitaki ta maua e angai ana i te tamariki, e akamarama ana maua e e mea puapinga kia tau ua te kai. Inangaro te tamariki kia kite eaa tei roto i te au kai tukeke, no reira kua maani au ia ratou kia tauturu iaku i te tunu i te kai. Te tuatau e rave kapiti ra matou i te reira, riro ei akamaroiroi ia matou kia komunikeiti.”​—Sandra, Peritane.

“Mea puapinga te akaetaeta uaua, e ei metua, e tauta ua ana maua i te akaari i te akaraanga meitaki. Reka ana ta maua tamariki me aere matou i te orooro, te pai vai, pa poro e te keteporo, me kore i te akaorooro patikara ei pamiri. Kua kite ratou e e angaanga reka e te puapinga te akaetaeta uaua.”​—Keren, Autireria.

“Te tuatau e akapou kapiti ana ki te nga metua, ka anoano maataia no te tamariki. Kare e rauka i tetai ua atu apinga i te mono i te reira​—kare te moni, te au apinga aroa, me kore te au orote. E angaanga ua ana au i te popongi me aere te tamariki ki te apii. E oti i te avatea e akapou ana au i toku taime ki taku tamariki.”​—Romina, Itaria.

 AKO

“Kitea mai ia maua e kare e okotai ua tu meitaki rava atu no te ako; tei runga ra i te turanga o te manamanata. Tetai au taime i te akoanga ka o mai te pukapuka anga ngakau tae, e i tetai taime ka o mai te araianga i ta te tamariki e inangaro ra i te rave.”​—Ogbiti, Naiteria.

“E pati ana maua i ta maua tamariki kia ripiti mai i ta maua i ako atu kia ratou kia rave, i te akapapu e me te marama ra ratou i te reira. E oti, ka rave maua i ta maua i tuatua. Me ka inangaro maua i ta maua tamariki kia akarongo mai, ka anoanoia maua kia akapapu e kua kite ratou e ka akautungaia ratou me akarongo kore.”​—Clive, Autireria.

“Kua kitea mai iaku e e meitaki atu te piko ki raro me ako i taku nga tamariki kia kite tika atu au i to raua mata. Tauturu teia iaku kia kite atu e me te akarongo meitaki maira raua. Ka rauka katoa ia raua te akara mai i te tu o toku mata, tei aite rai ki taku ka tuatua atu.”​—Jennifer, Autireria.

“Tauta maua kia kore e karanga ki ta maua tamariki e, ‘Kare rava koe e akarongo mai ana,’ noatu me e tika te reira. Pera katoa, kare maua e akaapa ana ia raua i mua ia raua rai. Penei ka koumuumu maua kia raua me kore ka akaatea mai ia raua e oti tuatua ngaro ua ki tetai e tetai.”​—Rudi, Motamapiki.

“Mama ua i te akakeu i te tamariki, e e reka ana ratou i te aru i te akaraanga a etai ke. No reira, ka anoanoia tatou kia arai i te akakeuanga kino a te au oa apii, te nuti, e te tamataora, e kia tauturu i ta tatou tamariki kia akatupu i te au tu tau memeitaki tei akatumuia ki runga i te au kaveinga tau. Ka riro teia au kaveinga tau ei tauturu ia ratou kia patoi i tetai ua atu apinga kino.”​—Grégoire, Temokaratiki Repapuriki o Kongoko.

“Kia tau te ako, ei mea mou, okotai kaveinga kia ngaueue kore me oronga i te ako, kia tau, e kia akamou rai ki te reira. Anoanoia te tamariki kia marama e e openga kino to te rave i te tarevake, e kia kite e ka rave rai koe i taau i akakite.”​—Owen, Engarani.

[Tataanga i te kapi 14]

“Auraka e akariri atu i ta kotou tamariki, ko te taitaia aea ratou.”​—Kolosa 3:21

 [Pia/​Tutu i te kapi 15]

PAPAANGA PAMIRI

Puapingaia ei Metua Takaua

Uiuianga kia Lucinda Forster

Eaa te mea ngata roa atu kia koe ei metua takaua?

E angaanga ngata te riro ei metua, inara ei metua takaua, e ngata tikai kia akaaere i toku taime e te maroiroi. Anoanoia te tuatau kia apii i te au kaveinga e te au tu, e i taua taime rai, i te tuatau kia akangaroi e kia katakata kapiti. Maata te taime ka anoanoia au kia akaatinga i toku taime akangaroianga kia rave i te angaanga i te kainga.

Akapeea koe te komunikeiti meitaki ua anga ki taau nga tamaine?

Muri ake te takake anga o nga metua, ka manako papu kore te tamariki e ka riri. Kite mai au e me tupu te au manamanata, e mea puapinga te akara tika atu kia raua e te tuatua atu ma te reo maru. Ka tiaki au kia maru matou, e oti e tauta ua ana au kia akakite i toku manako ma te kore e akakino roa atu i taua manamanata ra. E pati ana au i to raua manako, ka akarongo meitaki, e ka akaari au e e mea puapinga tikai to raua manako ngakau kiaku. E akaari ana au i te inangaro no ta raua apii, e ka akameitaki ia raua no ta raua i rave. E kaikai kapiti ana matou i te au taime ravarai i ko i te kaingakai i roto i te turanga maru e te mareka ua. E akakite putuputu ana au i toku inangaro maata ia raua.

Akapeea koe me ako atu?

Anoanoia kia taka meitaki te au ture, e kia akamou rai ki te reira. E tauta ana au kia akaari i te tu takinga meitaki, inara ma te ngaueue kore. Anoanoia au kia uriuri manako e taku nga tamaine e kia akamarama atu i te tumu i tarevake ei taua tu ra. E ui ana au i te au uianga no runga i to raua manako e to raua manako ngakau i mua ake ka ako atu au ia raua, kia kite au i te tumu i rave ei raua i ta raua i rave. Me ko au tei tarevake​—ei akaraanga, penei kare au i marama meitaki ana i te turanga​—ka tataraara au.

Akapeea ra koe me apii atu i taau tamariki i te tu akangateitei no tetai ke?

E akamaara ua ana rai au kia raua i ta Iesu i apii​—kia akono ua rai koe i tetai ke mei taau e anoano ra kia akonoia mai koe. (Luka 6:31) E akamaroiroi ana au i taku nga tamaine kia akatikatika i to raua au manamanata kia raua rai me ka rauka, e ka apii au ia raua i te puapinga o te ariu atu anga na roto i te tu maru e te takinga meitaki me riri raua.

Eaa taau e rave ana kia akangaroi?

Tetai au taime kare a matou moni kia aere i te orote, no reira ka akara matou ki roto i te nuti pepa no te au angaanga kare e pou maata te moni. Ka aere matou ki vao i te pikiniki me kore ka aere ka akara i te au ngai e akatupuia ana te tiare. E tanu ana matou i te au apinga akareka kai i roto i ta matou aua kai, e reka ana matou i te iki i ta matou uaorai apinga akareka kai. E mea puapinga te tamataoraanga, noatu me kua pou te taime i ko i te paka.

Eaa te au tu rekareka e te au akameitakianga taau i kite mai?

No matou, e ngata te noo anga ei metua takaua, inara e pirianga matutu to matou ki tetai e tetai, e kua apii matou kia ariki rekareka i te au mea ta te Atua i rave no matou. E reka ana au i te au tu tukeke o taku nga tamaine. I teianei kua inangaro raua i te akapou i tetai taime kiaku, e e mea akaperepere naku te kapiti atu kia raua. Ka kite raua e me kua mataora au e me kua taitaia au, e i tetai au taime e takave ana raua iaku. Oronga mai to raua tu aroa i te rekarekaanga maata kiaku. Tei maata rava atu, kua kite raua i te aroa o Tei Anga mai tei riro ei tauturu ia matou na roto i te au turanga ngata. Kua oronga mai te Pipiria i te maroiroi kiaku kia tauta ua atu rai kia riro ei metua meitaki.​—Isaia 41:13.

[Tutu]

Lucinda e tana nga tamaine, ko Brie raua ko Shae