Ta te au Metua e Tuatua Ra

Te tuatau mapuanga e maata te au akaaoanga no te au metua e manganui. Akapeea koe me tauturu i taau tamaiti kia puapingaia i roto i teia taime o te oraanga​—penei te ka riro ei mea ngata kiaia e kia koe katoa? Akara e eaa ta tetai au metua takapini i teianei ao e tuatua ra.

AU TAUIANGA

“Tona tamarikianga, ka akarongo meitaki taku tamaiti ki taku akoanga ma te kore e patoi mai. Inara i te tuatau mapuanga, te akaraanga kua kore tona irinakianga i taku akaaereanga. Akaapa aia i taku ka tuatua e te tu i tuatua ai au.”​—Frank, Kanata.

“Kare taku tamaiti e tuatua maata mai ana mei tana i matau i mua ana. Ka ui roa au kiaia e eaa to roto i tona manako, i to te tapapa atu e nana e akakite mai kiaku. Te maani iaia kia pau mai i tetai uianga, kare i te mea mama ua. Ka akakite mai aia i te pauanga​—inara kare i tera taime tikai.”​—Francis, Autireria.

“E mea puapinga tikai te tu akakoromaki. Tetai taime e tuatua riri ana maua ki ta maua tamariki, inara ko te mataara meitaki rava atu koia oki, na te tuatua maru ua anga e te pukapuka atu anga kia ratou!”​—Felicia, Marike.

KOMUNIKEITIANGA

“Tetai taime ka riri taku tamaine mapu, e tetai taime ka manako aia e te akaapa ra au iaia. E akamaara ana au kiaia e te inangaro ra au iaia, e te inangaro ra au iaia kia puapingaia!”​—Lisa, Marike.

“To raua tamarikianga, ka tuatua maoraora ua mai taku nga tamariki kiaku. Mama ua i te kite e eaa to roto i to raua manako. Teianei, ka tauta maata roa atu au kia marama, e kia akaari e te akangateitei ra au ia raua. Te mataara ua rai tera e akakite mai ei raua kiaku e eaa to roto i to raua ngakau.”​—Nan-hi, Korea.

“Kare e rava ua i te arai i te au mapu kia kore e rave i tetai au mea. Ka uriuri manako e ka pukapuka meitaki matou i te itae i to ratou ngakau. Kia akamaroiroi tatou ia ratou kia akakite mai i to ratou manako, e kia papa ua tatou i te akarongo i ta ratou ka tuatua mai, noatu me e tuatua kare tatou e inangaro i te akarongo.”​—Dalila, Paratiri.

“Me anoanoia kia ako au i taku tamaine, e tauta ana au i te tuatua kiaia ko maua ua, eiaa i mua i te tangata.”​—Edna, Naiteria.

“Tetai taime me tuatua maua ko taku tamaiti, ka apiapi au i te au angaanga i roto i te ngutuare e kare au e akarongo meitaki ana kiaia. Kua kite aia i te reira, penei ko te tumu tera kare aia e tuatua maata mai ana kiaku. Anoanoia au kia akarongo meitaki kiaia me pukapuka maua, kia komunikeiti ua atu rai kiaia.”​—Miriam, Meiko.

 TIKAANGA

“E manata ua ana au i te oronga i te tikaanga no taku nga tamariki kia rave i to raua anoano, e riro ua ana ei manamanata. Kua uriuri atea ana matou i te manamanata. Kua akamarama atu au te tumu i manako akapera ai au, i muri ake kua akamarama mai raua eaa raua i inangaro ei kia maata atu to raua tikaanga. Kua akatika matou kia rave raua i ta raua e inangaro ra, kia tau ra oki ki te au turanga taku i akanoo.”​—Edwin, Kana.

“Kua inangaro taku tamaiti i tetai patikara matini. Kua patoi au i tera manako e kua tuatua riri au kiaia te akakite anga i te au mea kino ka tupu me oko aia i te reira, e kare au i oronga atu i tetai tuatau nona kia akamarama mai. Kua akariri te reira iaia e kua pakari roa atu tona manako kia oko mai i tetai patikara! Kua manako au kia akatuke i taku tuatua. Kua akamaroiroi au i taku tamaiti kia rave i tetai kimikimianga mei te au turanga tukeke, no runga i taua manako ra kapiti mai te kino, te moni ka pou, e te au umuumuanga ka anoanoia kia rauka te raitini no te apinga akaoro. Kua akakite katoa au kiaia kia kimi i te tauturu a te au Kerititiano pakari i roto i te putuputuanga. Kua kite mai au e e mea meitaki roa atu kia akamaroiroi i taku tamaiti kia tuatua puareinga ua no runga i tana ka inangaro, e eiaa au e tuatua akakino atu. Na roto i taua tu ra ka rauka iaku kia itae i tona ngakau.”​—Hye-young, Korea.

“Kua akanoo matou i te au kotinga, inara kua oronga marie ua maua i tetai tikaanga no ratou. Te meitaki atu o ta maua tamariki i te akono i to ratou tikaanga, te maata atu ta te nga metua ka oronga. Kua oronga maua i te au atianga kia rauka ia ratou taua tikaanga ra, te akaari anga kia ratou e ko to maua inangaro kia rauka mai ia ratou taua turanga ra; inara e utunga tetai me akarongo kore ratou.”​—Dorothée, Varani.

“Kare roa au e tuku ana i toku turanga ki raro. Inara me akarongo mai taku nga tamariki, ka tuku puareinga ua au tetai au tikaanga. Ei akaraanga, tetai au taime ka akatika ua au ia raua kia noo roa atu ki ko i to raua au taeake. Inara me noo roa atu raua e kare maua i akatika ana, e akautungaanga tetai.”​—Il-hyun, Korea.

Te maata atu o te akarongo e te akono o te tangata angaanga, te maata atu ia ta tona pu ka oronga mai nana. Mei te reira rai te tu, ka kite mai taku tamaiti e ko te maata atu o tana akarongo e te akono i te au turanga ta maua i akanoo, te maata atu ia tona tikaanga ka rauka kia rave i tona anoano. Kua kite taku tamaiti e mei te tangata angaanga rai e akautungaia ana no te kare e rave meitaki i tana angaanga, ka ngere rai aia i te tikaanga tei rauka kia rave i tona anoano me kare aia e akono meitaki i te reira.”​—Ramón, Meiko.

[Tataanga i te kapi 22]

“Apii i te tamariki i te mataara tau no to ratou oraanga, ka akamaara ua rai ratou i te reira i to ratou oraanga katoa.”​—Maseli 22:6, Good News Translation

 [Pia/​Au Tutu i te kapi 23]

PAPAANGA PAMIRI

“E Tupuanga Mataora te Utuutu Anga i te Au Mapu”

Joseph: E mapu taku nga tamaine mua, e e mea puapinga kia akarongo e kia akameitaki au i to raua manako. Me akakite au i te tika no toku uaorai au apa​—e te akaari i te tu akangateitei me tuatua ki taku nga tamaine—​ka tauturu te reira i ta matou komunikeitianga. No reira, manako au e e tupuanga mataora te ututu anga i te au mapu, kia akameitakiia te aratakianga a te Tuatua a te Atua, te Pipiria.

Lisa: Kite mai au e i te mapuanga mai ta maua tamaine mua, anoano maataia kia akarongo au kiaia. Maara nei iaku te au tuatau i akarongo ei au kiaia, te tuatua anga kiaia, e te akapapu atu anga iaia. Kua akatika maua ko taku tane i ta maua nga tamaine kia akakite ua mai i to raua au manako, e ka akangateitei maua i to raua manako ngakau. Tauta au i te taangaanga i te akamaroiroianga a Iakobo 1:19, te karanga ra e kia “rapurapu ua te tangata ravarai i te akarongo, kia tavarevare i te tuatua.”

Victoria: Ko toku mami toku oa meitaki rava atu. Kare rava au e aravei ana i tetai vaine akono meitaki mei iaia rai​​—e kua akapera rai aia ki te tangata ravarai. E tu “ngakau tae” tikai to toku mami ki te tangata. Kare atu e mami mei iaia rai.

Olivia: E tangata akono meitaki e te oronga ua toku tati. E oronga puareinga ua ana aia i te tauturu ki tetai ke i te pae kopapa noatu me e manga ua ta te pamiri ka oronga. Kite aia akapeea me manako pakari, e kua kite katoa aia e akapeea tikai me tamataora. E metua tane akaraanga meitaki tikai aia e te mataora nei au e e tati aia noku!

“Kare o Matou Taime kia Maromaroa!”

Sonny: Me e manamanata to ta maua nga tamaine, ka noo matou ei pamiri i te uriuri i te reira. E akakite tika ua ana matou i to matou manako ngakau, e kua akatumuia ta matou ikianga ki runga i te au kaveinga Pipiria. Tauta ana maua ko Ynez i te akapapu e e au oa maroiroi to ta maua nga tamaine i te pae vaerua. Riro to maua au oa ei oa no raua, e to raua au oa ei oa no maua.

Ynez: Ka vai maroiroi ua rai matou, e e angaanga kapiti ana matou ei pamiri. Ei Au Kite no Iehova, e maata ta matou angaanga i roto i te angaanga orometua, te apii Pipiria naau uaorai, te apii Pipiria a te pamiri, e te angaanga tauturu​—kapiti mai te au angaanga tauturu tumatetenga e te patu Are Uipaanga Patireia. E akaaiteite katoa ana matou i teia au mea kia parani ki te tamataoraanga. Kare o matou taime kia maromaroa!

Kellsie: E tangata akarongo meitaki toku tati, e tuatua putuputu ana aia ki te pamiri i mua ake ka rave ei i tetai ikianga maata. E akarongo putuputu ana toku mami kiaku me inangaro au i te tauturu​—me kore kia tuatua ua.

Samantha: Akaperepere tikai toku mami iaku, inangaro iaku, e puapinga katoa au kiaia​—noatu kare aia i kite. E akarongo mai ana aia. Te manako maira aia iaku. Koia toku oa piri mou tikai.

[Au Tutu]

Te pamiri Camera: Joseph, Lisa, Victoria, Olivia, e Isabella

Te pamiri Zapata: Kellsie, Ynez, Sonny, e Samantha

[Tutu i te kapi 22]

Penei ka oronga te au metua i tetai tikaanga kia rave te tamariki i to ratou anoano, ka akanoo katoa ratou i tetai au turanga tau