Akapeea Au e Mataora ai te Apii Anga i te Pipiria?
Ui te au Mapu E
Akapeea Au e Mataora ai te Apii Anga i te Pipiria?
Eaa ra ka apii ei i te Pipiria? Akamanako ana i te reira na teia mataara:
Ka tauturu te Pipiria ia koe kia rauka tetai apinga puapinga. Ka rauka i teia puka oko maata ravaia atu i te
● Akaari kia koe akapeea me akapapa no te oraanga meitaki roa atu
● Akakite kia koe te au mea no runga i te tuatau ki mua—e te tuatau i topa—kare rava koe i kite ana
● Tauturu ia koe kia apii no runga ia koe uaorai e kia riro mai ei tangata meitaki atu *
KA ANOANOIA te tauta pakari i te apii i te Pipiria, e e maata te au akameitakianga ka rauka! Ka inangaro ainei koe i te kite akapeea tetai au mapu te rave anga i te reira? Pakoti e e aatu i te nga kapi e aru maira. Ka rauka ia koe i te akara e a kapi, e akaari maira akapeea toou au oa te autu anga i te au manamanata, e te puapinga anga mei ta ratou uaorai apiianga i te Pipiria.
“E apinga tetai no te katoatoa i roto i te Pipiria. E maata ua atu te au tumu manako no te apii!”—Valerie. *
E maata atu te au atikara mei roto i te “Ui te Au Mapu E” i runga i te Web site www.pr418.com
[Au Tataanga Rikiriki i Raro]
^ para. 7 Kia kite maata atu akapeea te Pipiria me rave i taua au mea pouroa noou, aravei atu i te Au Kite o Iehova i toou ngai me kore e tata atu kia ratou ki te ngai tau i te kapi 5.
^ para. 9 Kua tauiia etai au ingoa i roto i teia atikara.
[Pia/Tutu i te kapi 25, 26]
AKAPEEA ME APII I TE PIPIRIA
Te manamanata: KARE E INANGARO ANA
“Kare te noo ki raro no te ora katoa i te apii, i te mea inangaro naku i te rave.”—Lena.
Te ka anoanoia noou: AKAKEUANGA
E reka ai te apii i te Pipiria, ka anoanoia koe kia pau i te uianga e, Eaa ra te puapinga ka rauka iaku? Ka inangaro ainei koe tetai pirianga oa ki te Atua? te akamaata atu i toou marama no runga i te au tupuanga i teianei ao? kia meitaki atu toou tu? Ka rauka i te Pipiria i te tauturu ia koe i te rave i taua au apinga ra—e te vai atura!
“Eiaa e manako e mei te angaanga rai te reira me kore mei te apii rai i te apii. E manako ra e e mataara te apii Pipiria noou, kia akavaitata atu ki te Oa meitaki rava atu—te Atua ko Iehova.”—Bethany.
“Te taime o te apii, noou uaorai ia taime ma te Atua ko Iehova. Me akapou koe i te taime ki tetai tangata i te taime ua tei reira toou nga metua, e oa tika tikai ainei tera tangata noou, me no toou nga metua ua? Me apii koe ko koe anake ua, ka riro a Iehova ei oa noou.”—Bianca.
Akamaara: “Te au mea ravarai i roto i te Tuatua Tapu e Tuatua na te Atua. Puapinga pouroa te reira no te apii e te tauturu i te tangata, te akatikatika e te akaari kia ratou akapeea me noo i te oraanga.” (2 Timoteo 3:16, Contemporary English Version) Ka rauka katoa i te Pipiria i te tauturu ia koe i roto i taua au mataara ra!
“E tauta ana au te akamou ki runga i te tutaki. Me ngere au i tetai au tu, ko te apii te atianga meitaki noku i te akara i taua mea ra e te akameitaki atu iaku uaorai.”—Max.
Ei akamanako anga:
Eaa te akakeuanga noou i taau apii?
Te manamanata: E IU
“Muri ake i te 10 miniti i te apii anga, akamata au te roiroi; 20 miniti, inangaro au te rave i tetai apinga ke; tae te 30 miniti, iu takiri au!”—Allison.
Te ka anoanoia noou: KARAPE
Taangaanga i toou manako, noatu te o maira taau ka apii, akapeea koe me apii, me kore te ngai ka apii koe.
“Tuku i tetai taime kimikimi no runga i taau au uianga. Me apii koe no runga i tetai apinga i manako ana koe, ka mareka koe me oti mai—e te rekareka katoa.”—Richard.
“Ia koe e tatau ra no runga i tetai tupuanga, akamanako e tei roto koe i te reira. Akamea ua koe e ko koe te tangata akatutu me kore te tangata e akarakara maira i te mea e raveia ra. Timata i te akara i taua mea ra mei te mea rai e te tupu ra i mua ia koe.”—Steven.
“Maani kia mataora te apii. Noo i vao i te aua tiare e taau karati vai remene. E reka ana au tetai apinga katikati me apii au. Koai oki ia kare e akapera ana?”—Alexandra.
Akamaara: E mea tamanako ua te tu iu, kare i te mea tika tikai. I to te karanga e e “iu tikai te apii,” e karanga ra e “iu tikai au.” Naau rai e akataka e ka akapeea koe me apii. Na te reira e akariro ia koe ei akaaere, e ka akamaroiroi ia koe kia rave i te reira.—Maseli 2:10, 11.
“Kare e tumuanga tau kia iu koe i taau uaorai apii. Tei ia koe te tika e ka akapeea koe me apii.”—Vanessa.
Ei akamanako anga:
Ka akapeea koe me akaoraora mai i taau apii?
Te manamanata: KARE E TAIME
“Ka inangaro au i te apii maata atu i te Pipiria, no te maata ra te angaanga, e mea ngata noku kia rauka tetai taime i te noo ki raro i te rave i te reira!”—Maria.
Te ka anoanoia noou: AU MEA PUAPINGA ATU
Tetai tuanga no te riro anga mai ei tangata mamaata koia oki, kia apii e akapeea me akapapu i “te au mea e maata ua atu te meitaki.”—Philipi 1:10.
“Kua tauturu toku mama iaku kia kite e kare rava e rauka tetai taime va noku. Ka anoanoia au kia akataka i tetai taime. Te tauta anga rai au kia tupu toku inangaro i te apii, rauka iaku te akataka i tetai taime no te reira.”—Natanya.
“Iaku e pakari maira, kua kite au e ka anoanoia au kia akanoo i tetai taime no te apii, e kua rave au te reira, noatu eaa te angaanga e raveia ra.”—Yolanda.
“Me tuku koe i taau apii na mua ake i te tamataora, papu nei iaku e ka mataora atu koe i te apii—e kare koe e akava ngakau me tamataora koe.”—Diana.
Akamaara: Me kare koe e akanoo i te mea puapinga atu, kare e rauka ia koe i te akaaere i toou taime e ka riro koe ei tavini no te reira. Meitaki roa atu kia akamata koe e kia akataka i tetai taime no te apii.—Ephesia 5:15, 16.
“Ei tamaiti apii i roto i te apii teitei, ka varenga ua au ki tetai apinga ke atu! Inara, na te tauta pakari anga kia kapiti mai i te apii Pipiria naku uaorai ki taku papaanga, ko te mea puapinga atu ia kiaku.”—Jordan.
Ei akamanako anga:
Eaa taau papaanga apii ka akanoo?
[Pia/Tutu i te kapi 25]
MANAKO O TOOU AU OA
Zachary—Eiaa e apii ua i ta toou nga metua me kore ta etai ke e apii ra. Naau tika tikai te apii, me naau rai i inangaro kia kite no runga i tetai apinga.
Kaley—Akamata rikiriki ua. Me ka inangaro koe, e rima ua miniti, e rave ra i te reira i te au ra ravarai. I reira akatere marie atu koe i toou taime ki te 10 miniti, 15 miniti . . . Te openga ka mataora koe!
Daniela—Tuke maata katoa ta te au manako rikiriki ka akatupu. Rave mai i tetai au peni tukeke te kara, e tetai manga puka tata, me kore tuku i tetai papaanga i runga i te komopiuta, raro i te ingoa Apii Naku Uaorai.
Jordan—Me iki au i tetai tumu manako e reka ana au, ka roa atu taku apii. Tetai katoa ka anoanoia tetai ngai muteki ua. Kare e rauka iaku te apii me maata te turituri.
[Tutu i te kapi 24]
(No runga i teia, akara i te puka)
Pakoti
Aatu