Te Manako o te Pipiria

Akapeea Koe me Akatupu i te au ki Etai Ke?

TE TUATUA ra te Pipiria no runga i te tangata e: “Kua rave katoatoa oki i te ara, e kua ngere i te akameitaki a te Atua.” (Roma 3:23) No te mea tere atu i te itu pirioni tangata apa i te enua, ka tupu rai te manamanata ki tetai e tetai. Akapeea tatou me akatupu i te au i roto i taua au turanga ra?

Te oronga maira te Pipiria i te akoanga meitaki. Te akataka maira no runga i Tei Anga mai e ko “te Atua au,” tona ingoa ko Iehova. (Ebera 13:20; Salamo 83:18) Te inangaro ra te Atua i tana tamariki i te enua nei kia rauka te pirianga au. No reira i roto i teia tu, koia te arataki. Te ara anga te nga tangata mua ki te Atua, te takore anga i te pirianga au, kua rave viviki aia i te au takainga i te akaongi anga i to teianei ao kiaia. (2 Korinetia 5:19) Akamanako ana e toru au mataara ka rauka ia koe i te akatupu i te au ki tetai ke.

Akakore ua Rai i te Ara

Eaa ta te Pipiria e akakite maira? “E tauturu atu tetai ki tetai, e akakore tetai i ta tetai ara, e tapepeanga ta tetai ki tetai ra; mei [ia Iehova] i akakore i ta kotou na, e akapera katoa kotou.”​—Kolosa 3:13.

Eaa te akaaoanga? Penei e tumuanga tau toou no te ‘tapepeanga i tetai’ e te manako ra koe e kua tano rai koe kia kore e piri akaou ki tei akariri mai ia koe. Penei ka manako koe kia aere mai tei akariri ia koe kia tataraapa na mua. Inara me kare aia i kite eaa tana tarevake i rave, me kore te irinaki ra aia e ko koe tei tarevake, ka vai rai te manamanata.

Eaa taau ka rave? Aru i te akoanga a te Pipiria kia akakore ua rai i te ara a te tangata, noatu eaa te meangiti o te manamanata. Akamaara, naringa te Atua i tamou ua rai i to tatou au tarevake, kare rava tatou e tau ki mua i tona aroaro. (Salamo 130:3) Te akakite ra te Pipiria e “e aroa e te takinga-meitaki to Iehova; kare e riri vave, te maata ra te aroa. Kua kite oki aia i to tatou tu; te manako ra aia e, e one tatou nei.”​—Salamo 103:8, 14.

Akamanako katoa i te materi Pipiria: “Na te akono o te tangata i kore ei i riri vave; ko tona ïa kakā koia i akakore i te ara.” (Maseli 19:11) Na te akono e tauturu ia tatou kia kite oonu atu, kia marama i te tumu i tuatua ai e i akapera ai te tangata. No reira e ui kia koe uaorai e, ‘Kua roiroi ainei, kua maki, me te taitaia ra te tangata tei rave i te tarevake kiaku?’ Me kite tatou i te akakoroanga tikai, te manako ngakau, e te au turanga o te tangata, penei na te reira e akamaru mai i toou riri e te tauturu ia koe kia akakore atu i to ratou tarevake.

E Tuatua no Runga i te Reira

Eaa ta te Pipiria e akakite maira? “E kia takinga-kino to taeake ia koe, e aere e akakite atu i tana apa korua anake ua; e kia akarongo mai aia ra, kua rauka ïa to taeake ia koe.”​—Mataio 18:15.

Eaa te akaaoanga? Ka arai te au manako ngakau kino mei te mataku, te riri, e te akama ia koe, kia kore e aravei atu i taua tangata ra kia akatikatika i te manamanata. E penei, ka timataia koe kia kimi i te tauturu a tetai ke, na te akakite anga i te manamanata kia ratou, e te takino roa atu anga i te manamanata.

Eaa taau ka rave? Me kino tikai te manamanata e kare e rauka ia koe i te akakore atu i te reira, e aravei atu i taua tangata ra e e tuatua no runga i te reira. Tamata i teia:

(1) Ma te viviki: Auraka e tavarevare. Me ka tavarevare koe, ka kino atu te manamanata. Tauta i te taangaanga i te akoanga a Iesu e: “E teianei, kia apai koe i taau apinga oronga ua ki  te atarau, e kua manako iora koe i reira e, e ara ta to taeake ia koe na: Vaio atu i to apinga i mua i te atarau, e akamata i te aere e ongi i to taeake, ka aere ei ka apai i taau apinga.”​—Mataio 5:23, 24.

(2) Ko korua anake ua: Auraka e urutoe ki tetai ke no runga i te manamanata. “E akataka marie ua atu koe i taau tuatua ki to tangata tupu ra, auraka koe e aaki i tana ra tuatua muna ki tetai ke.”​—Maseli 25:9.

(3) Ma te au: Auraka e kimi e koai tei tika e koai tei tarevake. Toou akakoroanga kia akatupu i te au, kare kia re i te taumaro anga. Tamata i te tuatua e “ko au,” kare e “ko koe.” Ka meitaki atu i te akakite ki te tangata e “Mamae tikai au no te mea . . . ” i te karanga atu e: “Kua takinokino koe iaku!” Te akakite maira te Pipiria e: “E teianei, ka umuumu tatou i te tuatua i akatupu i te au, e te tuatua e meitaki kapipiti ei ra.”​—Roma 14:19.

E Akakoromaki

Eaa ta te Pipiria e akakite maira? “Auraka te kino e tutakiia atu ki te kino i te tangata ravarai nei. . . . E teianei, ‘te pongi ra to enemi, ka akaangai atu; e te kaki vai ra, ka akainu atu.’”​—Roma 12:17, 20.

Eaa te akaaoanga? Me ka kopae te tangata i taau tautaanga i te akatupu i te au, penei kare koe e tauta ua atu.

Eaa taau ka rave? E akakoromaki. E tuke te tu e te turanga pakari o te manako o te au tangata. Ka roa tetai pae i te akamaru mai; tetai pae ra te apii nei rai i te akaari i te au tu o te Atua. E akaari ua rai i te tu takinga meitaki e te aroa kia ratou. “Auraka e mate i te kino, kia mate ra te kino ia koe i te meitaki,” e akakite maira te Pipiria.​—Roma 12:21.

Kia akatupu i te au ki tetai ke, ka anoanoia tatou kia akaari i te tu akaaka, akono, akakoromaki, e te aroa. E puapinga tikai te pirianga au!

I MANAKO ANA AINEI KOE?

● Eaa te ka tauturu ia koe kia akakore ua rai i te ara a tetai ke?​—Kolosa 3:13.

● Eaa te ka tauturu ia koe kia aravei i te tangata e kia tuatua no runga i te manamanata?​—Mataio 5:23, 24.

● Eaa taau ka rave me kopaeia taau tautaanga kia akatupu i te au? ​—Roma 12:17-21.

[Tataanga i te kapi 23]

“Na te akono o te tangata i kore ei i riri vave; ko tona ïa kakā koia i akakore i te ara.”​—MASELI 19:11