Akaraanga i te Ao

“No te mea ko au te pereteteni no Marike, manako au i reira e ka anoanoia au kia pure.”​—BARACK OBAMA, PERETITENI O MARIKE.

Te patiia anga kia iki i tetai ravenga no te akaari i te tu epaepa enua, e 56 patene tangata i Atenetina mei te 10 ki te 24 mataiti, tei karanga e inangaro atu ratou i te aao i te piriaro o te pupu tueporo tarape o te enua.—LA NACIÓN, ATENETINA.

Te akaari maira te tareanga no tetai kimikimianga e “mei te 33 patene o te kai tei maaniia ei kai na te tangata i te ao nei, kua ngaro me kore kua kaimoumouia, mei te 1.3 pirioni tane i te mataiti okotai.”​—FOOD AND AGRICULTURE ORGANIZATION OF THE UNITED NATIONS, ITARIA.

“Teia tuatau, te ki nei te enua i te tamaki, e te rongo tamaki, no reira kia papa ua rai te vaeau o to tatou Enua anau i te paruru i tona iti tangata e te au mea tapu kia ratou, kia kore e peke i te enemi.”​—PATRIARCH KIRILL, TANGATA MAATA O TE AKONOANGA TUMU I RUTIA.

Te take no te au tumatetenga i runga i te mataara tei ripotiia ki tetai kamupani initurini i Tiamani i te 2010, e tupu ana mei te ora 7 e te ora 8 i te popongi. “Tetai ravenga puapinga roa atu kia kore e tupu te tumatetenga i runga i te mataara, kia rava te taime no te aere ki te angaanga i te popongi,” i tuatua ai tetai tangata maata o tetai kamupani.—PRESSEPORTAL, TIAMANI.

Au Arataki Mapu i Mareitia

Ko te manako maata o tetai porokaramu tarere rongonui i runga i te tivi i Mareitia, kia iki i tetai imam me kore tetai arataki no te akonoanga Itirama. Ko “Imam Muda,” me kore, “Arataki Mapu” te ingoa o teia porokaramu tei neneiia i Kuala Lumpur. Te au tangata tarere, mei te 18 ki te 27 mataiti, no te au turanga keke mai ratou, ka akaatea tatakitaiia e ka toe ua mai e tai. Ko te re, e moni e te motoka ou, e ka oronga katoaia na te tangata i re, tetai ngai angaanga ei arataki, kia aere ki te apii teitei i Saudi Arabia, e tetai tere ki Mecca. Ka anoanoia ratou kia kite meitaki i te au angaanga a te arataki, kia kite i te uriuri no runga i te au mea o teia tuatau e no te akonoanga, e kia tatau tika mai mei roto i te Koran. Karanga te tangata nana te porokaramu e, ko tona akakoroanga kia “akaariu mai i te au mapu” ki te akonoanga Itirama.

Au Mea Tau Kore i Runga i te Initaneti

Maata te aronga e taangaanga ra i te initaneti, kare e kite ana eaa te kino ka tupu me tuku i tetai au mea muna ki roto i reira. Inara, penei ka tupu mai te kino a muri ake no te tuku i teia au mea muna nei. Karanga te puapii maata ko Timothy Wright, tei taikuia i roto i te Sydney Morning Herald i Autireria e, “te akaari maira te tekinoroti ou e kare te tuatua manako kore, akakino, tutu tau kore me kore te au mea muna, e rauka i te takore, e ka rauka ua i tetai ua atu tangata i te akara.” Tera te aiteanga, “ko te au tarevake tei raveia i tona 15 mataiti anga, ka rauka rai i tetai pu angaanga i te akara e 10 mataiti i muri mai,” i karanga ai a Wright.