E Mea Maaniia Ainei?

Kite Natura i te Anga Apinga o te Rango Pepa Patia

● Kua karangaia e e taunga tikai te rango pepa patia i te anga apinga. Eaa ra teia akatakaanga i tau ei?

Akamanako ana: Mei ta tona ingoa e akakite maira, e maani ana te rango pepa patia i tona koanga ki tetai tu pepa tuke akerai, tana uaorai i maani. * Ka akaputu mai te rango i te kata o te rakau mata e te rakau maro mei te au ngai tukeke mai—te vaie, poupou aua, poupou tereponi, e te au apinga akatu are. I reira ka ngaungau ei i taua au apinga ra tei ki i te tuka, e oti kairo ki te uavare pupuru e maata te protein i roto. Me kairoia teia au mea, ka maro, e ka riro mai ei pepa angiangi, matutu, kare e ngaae. E au mea puapinga katoa to roto i te uavare te ka tauturu i te pepa kia tuku mai i te reva vera e te akangote i te reira, kia tano ua te vaito i roto i te koanga no te rango, i te au ra anuanu.

E maani ana te rango i tona koanga, na te tari tari anga i te au apinga “na roto i tona vaa.” Me oti, mei te tamaru pepa rai te tu kare e mauu, kua ki i te au kauiui pia pia e ono aro​—e matutu tikai tona tu e te meitaki. Te au rango pepa patia e noo ra i te au ngai mauu, ka tuku maata mai ratou i te uavare, no tona au apinga paruru kia kore e mau i te vai. No reira, ka kimi te rango i tetai ngai akatautauanga te ka riro ei paruru i te reira. Ka akatautau mai ratou i to ratou koanga ki raro, ki runga i te atava rakau. Pera katoa, kare te reva e takinoia e te au rango pepa patia—kare i aite mei te au ngai e maaniia maira te pepa, tei takino i te reva, vai, e te enua!

Te marama uaia ra, e te apii nei te aronga kimikimi e te aronga parani are i te au mea ta te rango e maani ana, kia rauka ia ratou i te maani i te au apinga akatu are meitaki roa atu e te mamangika, ketaketa, mama ua i te taangaanga, e ka oki akaou ei one.

Eaa toou manako? Na te rango pepa patia uaorai ainei i kite e, mei teaa te tu me maani i te pepa e te koanga ina e, mei te nga topata one taatai rai te maata i tona roro? Me, e akapapuanga ainei tona tu kite karape e, e mea angaia mai aia?

[Tataanga Rikiriki i Raro]