Me te Manako ra Koe Kia Kore Toou Oraanga

I TE au ra ravarai, vaitata rai e 3,000 tangata e tamate ana ia ratou i teianei ao katoa. Te oronga maira te Pipiria i tetai tumu maata i tupu ei teia ki te manganui. Te akamarama maira te reira e te noo nei tatou i te ‘tuatau kino maata.’ Pakari tikai te taomianga o te oraanga e kite nei te tangata. (2 Timoteo 3:1; Koheleta 7:7) Me kino takiri te manako apiapi o tetai, penei ka manako aia i te akakore i tona oraanga kia ngaro te manamanata. Eaa taau ka rave me kua manako akapera ana koe?

Kare ko Koe Ua!

Noatu e akaraanga kino tikai toou turanga, e akamaara ra e kare ko koe anake ua, vaitata rai e ko te au tangata ravarai te akakoromaki nei i teia tu manamanata i teia tuatau. Te akakite maira te Pipiria e: “Te ngunguru anake nei te au mea  katoa i angaia mei te mamae anau ra.” (Roma 8:22) Noatu kare toou manamanata e kore i teia taime, maataanga o te taime e meitaki mai ana te reira i te tuatau ka aereia. Teianei ra, eaa te ka riro ei tauturu?

Akakite i toou manako ngakau ki tetai oa irinakiia. Te na ko ra te Pipiria e: “E aroa mairai te taunga i te au tuatau katoa ra, i anau maira te taeake no te tuatau e tumatetengaʼi ra.” (Maseli 17:17) I te tuatau e tumatetenga ra a Iobu, te tangata tuatua tika tei akatakaia mai i roto i te Pipiria, kua akakite aia i tona manako ngakau ki etai ke. Te rokoia anga aia e tana i karanga e, ‘kua iu aia i tona ora anga,’ kua karanga aia e: “Ka tuku au iaku uaorai kia aue ua na; e tuatua rai au ma te mamae o toku nei vaerua”! (Iobu 10:1) Ka riro te tuatua anga ki tetai tangata ei akaiti mai i te pakari o toou mamae ngakau e penei ka oronga mai i tetai ravenga ou no toou manamanata. *

Riringi i toou ngakau ki te Atua na roto i te pure. Tetai aronga, manako ratou e e ravenga tauturu ua te pure no te manako, inara e tuke ta te Pipiria e tuatua ra. Kapiki a Salamo 65:2 i te Atua ko Iehova e ko “Tei akarongo i te pure,” e te karanga ra a 1 Petero 5:7 e: ‘Koia te tiaki mai ia kotou.’ E akaketaketa ua mai ana te Pipiria i te puapinga o te irinaki ki te Atua. Ei akaraanga:

“E irinaki kia Iehova ma to ngakau katoa ra; auraka ra e irinaki ki toou uaorai kite. Auraka e akangaropoina iaia i toou katoa ra au aerenga; e nana e akakite kia koe i toou ra au arataa.”​—MASELI 3:5, 6.

“E akatika [a Iehova] i te anoano o te aronga i mataku iaia; ka akarongo mai aia i ta ratou kapiki, e ka akaora oki aia ia ratou.”​—SALAMO 145:19.

“Teia taua taitaia kore no tatou i rauka iaia ra, kia pati ua atu tatou i te au mea ravarai i tau iaia ra, te akarongo maira aia ia tatou.”​—1 IOANE 5:14.

“Tei te mamao ke a Iehova i te aronga kino: e akarongo maira aia i te pure a te aronga tuatua-tika.”​—MASELI 15:29.

Me akakite koe ki te Atua i te au turanga ngata taau e aro ra, ka oronga mai aia i te tauturu. E  tumuanga tau tetai e akamaroiroi mai ei te Pipiria ia koe kia “irinaki iaia . . . i te au tuatau katoa! e riringi i to kotou ngakau ki mua iaia!”​—Salamo 62:8.

Me e Maata Atu Tei Anoanoia

Te akaari maira te au kimikimianga e, te maataanga o te tangata e tamate ana ia ratou uaorai, kua roa te maki taitaia anga. * Te akaketaketa maira teia e ka anoanoia te tauturu a te taote. Penei ka oronga mai te taote i te vairakau me kore ka akakite mai kia taui te tu o te kai. Tetai aronga e meitaki atu te akaetaeta uaua i te vairakau. Puapinga maata tikai te rapakau a te taote no te manganui. *

Maata te akakiteanga i roto i te Pipiria te ka oronga mai i te tauturu e te manakonakoanga noou. Ei akaraanga, roto ia Apokalupo 21:4, te karanga ra te Pipiria no runga i te Atua ko Iehova e: “E nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.” Na te Atua teia taputou, e ka rauka te akapumaana me akamanako i te reira.

Te akakite aere nei te Au Kite o Iehova i teia manakonakoanga o te Pipiria ki te mirioni ua atu i te ao katoa. Tei tupu, e manganui ua atu tei rauka te manakonakoanga tika tikai i teia au tuatau taitaia. No tetai akakiteanga maata atu, aravei atu i te Au Kite o Iehova i toou ngai na te atoro anga i te Are Uipaanga Patireia i toou ngai, me kore tata ki te atereti i te kapi 5 o teia makatini. Ka rauka katoa ia koe te akara i ta matou Web site www.watchtower.org.

[Au Tataanga Rikiriki i Raro]

[Pia i te kapi 28]

TAUTURU A TE PIPIRIA

● “Auraka rava kotou e apiapi i te au mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki. E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako i te Mesia nei ia Iesu.”​—Philipi 4:6, 7.

● “Kua kimi au ia Iehova, e kua tuatua maira aia kiaku, e kua akaora iaku i te au mea katoa taku i mataku ra.”​—Salamo 34:4.

● “Te vaitata nei a Iehova i te aronga ngakau paruparu ra; e te akaora nei aia i te aronga ngakau taitaia.”​—Salamo 34:18.

● “Kua rapakau aia i te aronga ngakau paruparu ra, e kua tākai i to ratou au puta.”​—Salamo 147:3.

[Pia i te kapi 29]

ME TE MANAKO RA KOE KIA KORE TOOU ORAANGA . . .

Akakite i toou manako ngakau ki tetai oa irinakiia

Riringi i toou ngakau ki te Atua na roto i te pure

Kimi i te tauturu a te taote

[Pia/​Tutu i te kapi 30]

NO TE AU OA E TE PAMIRI

Te maataanga i te taime ko te au oa e te au mema o te pamiri te kite ana na mua e te manako ra tetai tangata taitaia kia kore tona oraanga. Na te tauturu anga atu e akaora iaia! Akarongo ma te akaaroa. Kia kite e e turanga ngata tika tikai te tupu ra kiaia. Te karanga ra te Pipiria e: “E akapumaana atu i te ngakau taitaia.” (1 Tesalonia 5:14) Raurau atu i tei taitaia te ngakau kia kimi i tetai tauturu, e e aruaru rai te akapapu e kia rauka taua tauturu ra.