Te Manamanata o te Riri
Te Manamanata o te Riri
Ota tetai tangata i tana kai i ko i tetai are kai, i na kua kake tikai tona riri no te mea manako aia e kua roa rava tona tiaki anga i tana kai. Tomo aia ki roto i te are kai, tamataku i tetai tangata angaanga, opara iaia ki runga i te kaingakai e kua papaki atu iaia. I reira rave taua tangata riri riri ra i tana kai e kua tomo atu ki vao.
POUROA tatou e riri ana rai i tetai au taime. No te mea e tuanga te riri no to tatou tu, mei te aroa, te manakonakoanga, te apiapi, te taitaia, e te mataku. Te riri tei akaaere meitakiia, ka rauka kia akaariia na roto i te tu tau e no te akakoroanga meitaki. Ei akaraanga, ka puapingaia te riri mei te mea e ka tauturu te reira i tetai kia autu i tetai au arairaianga, me kore manamanata.
Mei tei taikuia mai i tei tupu i runga akenei, ka riro katoa te riri ei mea kino. Tetai au tangata, tupu vave atu to ratou riri, putuputu atu e te otooto atu i to etai ke. Me akaririia, penei ka tuatua kino mai ratou me kore ka ta mai. Akariro ratou e na te riri e akaaere ia ratou, e kare na ratou e akaaere i to ratou riri. E kino tikai taua tu riri ra kare e rauka i te tapu, no reira i karangaia ai e e “riri manamanata.” *
Te aronga e manamanata to ratou no te riri, e akatupu ana i te taitaia kia ratou uaorai e ki etai ke atu. No tetai e au manamanata tona no te tu riri riri, ka riro tetai manga apinga ua ei akatupu i te riri otooto te ka taopenga mai ki tetai au tupuanga taitaia. Akamanako ana i te au akaraanga ka aru mai:
Kua pupuiia te kaki o tetai tangata e aere ra ratou e tetai au oa, i te pakia atu anga te kiri a tetai oa ona ki runga i tetai tangata ke mai i runga i te mataara.
Kua ta tetai tangata 19 mataiti i te pepe 11 marama a tana vaine akaau, e kua mate takiri te pepe. Te kanga tarekareka vitio ra taua tangata ra, e kua riri aia i te amiri anga te pepe i te pitopito o te vitio, akamutu rai i reira tana tarekareka.
Akaari maira te ripoti mei te reira rai takapini i teia ao e, te maata ua atura te tangata e manamanata to ratou no te tu riri riri. Eaa ra i maata atu ei te tu riri riri?
[Tataanga Rikiriki i Raro]
^ para. 4 Te akataka maira te poroutia Boiling Point—Problem Anger and What We Can Do About It i te “riri manamanata” e ko “tetai ua atu tu tau kore e piri atura ki te riri, e te akaaere anga i te tu riri e akatupu ua ana i te au tu ngata i roto i te oraanga o tetai tangata, kapiti mai to ratou aerenga manako, ngakau, tu, e to ratou pirianga ki etai ke.”
[Pia i te kapi 3]
E tuanga te riri no to tatou tu. No reira, tetai au taime ka tau kia akaariia te riri na roto i te tu te ka rauka kia akaaereia. Inara, te tuatua nei teia atikara no runga i te tu riri tau kore, te ka takino ia tatou e etai ke atu i te pae manako ngakau, kopapa, e te pae vaerua.
