Ua Rakau Rengarenga o Amenia

● Kua tupu ana te apricot i Asia e Europa no te au tauatini mataiti. Kua irinaki te au tangata o Europa e no Amenia mai te apricot, no reira ratou i kapiki ei te reira e e apara Amenia.

Teia tuatau e 50 katiri tuketuke o te apricot e akatupuia ana i Amenia. E para ua ana te reira mei roto ia Tiunu kia Aukute. No te meitaki o te one kura e te maata o te maana i Amenia, no reira te apricot tei akatupuia i reira i tuke roa ai te vene, i karanga ai te manganui e ko tetai mea reka roa atu ia i te ao nei.

Te au katiri matauia, mei te paramu meangiti rai te tu, e e tukeke te kara mei te rengarenga maratea ki te rengarenga tou. To ratou pakiri mei te terevete rai, e te matutu i te kiko, kare e vai roa ana, tetai pae e vene, tetai pae e kava. Te au katiri reka roaia atu, e karanga ana tetai aronga e mei te piiti rai e te paramu tona kainga.

Kua akatupu ana te aronga tanutanu i tetai apricot “kerekere,” kare ra i te apricot tikai. Mari ra e mea pauia te apricot e te paramu. Tona pakiri e uruuru e te vareau tou, aite atu rai ki te kerekere, tona kiko e rengarenga.

E puera ana te tiare o te pu rakau apricot i mua ake ka nionio mai ei te rau, e e pua mai ei te tiare teatea kakara. Aite rai te tiare ki to te pu rakau piiti, paramu, e te cherry. Tupu meitaki atu te au pu rakau i te tuatau anu e te tuatau maana, no te mea ka inangaroia te tuatau anu kia puera e kia ua meitaki. No reira, tau ua te reva i Amenia no ratou!

Maata te puapinga o te apricot para ou ua. Ei akaraanga, e maata te beta-carotene e te vitamina C o roto. Maata te tangata tei matau i te apricot kua tamaroia. Te tumu, kare e tae ana te mea para ou ua kia ratou no te mea ka paii e ka kino vave ua. No reira i inangaro maataia ai te apricot tamaroia i tetai au ngai o teianei ao, i to te mea para. Te mea meitaki ra, maata rai te puapinga o te apricot tamaroia, e te apinga tamaru kai e te akarava toto. Tetai katoa, e akariroia ana te apricot ei maani brandy, tiamu, e te vai venevene.

E tarai katoaia mai ana tetai au apinga manea mei te rakau o te apricot, mei te duduk rai, e pui Amenia inangaroia, e karangaia ana tetai taime e e pui apricot. I roto i te au toa e te makete i Yerevan, te oire maata o Amenia, e kite katoa ana te aronga turoto i te au apinga manea tei taraiia mai mei te rakau o te apricot.

Me te noo ra koe i tetai tuanga o te ao, e ka rauka ia koe i te tongi i tetai apricot para ou ua, aere tamataia. Kare e ekoko ka navenave koe te kai anga i teia ua rakau rengarenga.