Au Taviri no te Akameitaki Atu i te tu Tau Kore

INANGARO Tei Anga mai ia tatou kia mataora ua tatou, kia rauka te ngakau au, e kia tauturu i etai ke kia mataora. No reira, te pati maira aia ia tatou kia “rave i te tuatua-tau, e kia inangaro i te aroa.” (Mika 6:8) Akapeea e rauka ai ia tatou te rave i te reira? Ka anoanoia tatou kia akatupu i te au tu te ka takore i te au peu e akatupu ra i te tu tau kore. Akamanako ana akapeea te Pipiria i te tauturu anga ia tatou i te rave i te reira.

AUTU ANGA I TE TU NOINOI. Te ravenga ririnui roa atu i te patoi i te tu noinoi, e aroa​—kare mei tetai tu manako ua me kore i te tu akainangaro​—mari ra e aroa akaatinga no etai ke. Taua tu “aroa . . . e takinga meitaki,” e “kare e kimi i te meitaki nona uaorai,” i karanga ai a 1 Korinetia 13:4, 5. Tetai katoa, kare teia tu aroa e akaari uaia ana ki te pamiri e te au taeake. “Ko ta kotou e aroa atu, eaa ta kotou tutaki i reira?” i ui ei a Iesu, te kapiti anga atu e e aroa ana rai te aronga akono kore i te Atua, i tei aroa mai ia ratou.​—Mataio 5:46.

AUTU ANGA I TE TU PAPAKITAI. Te na ko ra a Angaanga 10:34, 35 e: “Kare te Atua e akono i te tu o te tangata: Ko te mataku ra iaia, e ko te rave i te tuatua-tika, i te pa enua ravarai, ko tei kiteia mai ïa e ia.” Kare te Atua e akava i te tangata kia tau ki to ratou iti tangata, turanga, me kore me e tane e me e vaine. Roto i tona mata “kare e ngati Iuda, kare e Eleni, kare e tuikaa, kare e rangatira, kare e tane, kare e vaine.” (Galatia 3:28) Me aru tatou i te tu o te Atua, ka autu tatou i te tu papakitai. Akamanako i te akaraanga o Dorothy, e noo ana aia i Marike.

Riri tikai a Dorothy i te tu akavaavaa iti tangata e kua inangaro aia i te piri ki tetai pupu meameaau i te tauturu i te iti tangata kerekere e takinokinoia ra. Inara i taua taime ra, kua aere aia ki tetai uipaanga Kerititiano na te Au Kite o Iehova, e kua umere tikai aia i te arikianga pumaana a te au taeake kerekere e te papaa iaia. Kare i roa, kite mai aia e ko te Atua ua rai te ka rauka i te taui i te ngakau o te tangata. Tona kite mata anga i te aroa tika tikai o te Au Kite papaa​—e au tangata papaa “kare rava aia e tapupu i te tamate, no te akakoroanga o te meameaau”​—kua “pumaana tikai” tona ngakau e kua atiati aia i te aue.

 AUTU ANGA I TE TU MEAMEAAU. Mua ake ka riro ei ei au Kerititiano, tetai papaki i te au pipi a Iesu e aronga kona kava, aru, e te akakino. Inara, ma te tauturu a te Atua rauka ia ratou i te akakore i te au tu tau kore, na te akatupu anga i te aroa, takinga meitaki, e te meitaki. (1 Korinetia 5:11; 6:9-11; Galatia 5:22) Mei teia tuatau rai, mirioni ua atu tangata tei akatupu i te au tauianga tau i roto i to ratou oraanga na te akamori anga i te Atua. Tetai akaraanga ko Firuddin, e noo ana aia i Atipatiani.

Ngakiia a Firuddin i roto i tetai ngai tamariki matiroeroe, e ta putuputu ana aia ki te tamariki tamaroa i reira. Te maatamaata mai anga, riro mai aia ei puapii no te angaanga ta tangata ki te rima. “Apinga tikai au i te akatangata, te kino, e te roto riri,” i nana ai. “Me ngaropoina i taku vaine ko Zahra, tetai apinga i te taime kaikai​—noatu me e manga apinga ua—​ka motomoto au iaia. E me akara ua mai tetai tangata iaia me aere kapiti maua, ka akapera rai au i tera tangata!”

Tetai ra, kua tukia te ngakau o Firuddin i te kite anga e kua pati a Iesu ki te Atua kia akakore mai i te ara a te au vaeau tei akatatauro iaia. (Luka 23:34) ‘Ko te Tamaiti anake ua a te Atua te ka akapera,’ i manako ei aia. I muri mai kua akamata aia i te kimi i te Atua. Te oronga mai anga te Au Kite o Iehova kia tauturu iaia, kua ariki vave ua aia i tetai apii Pipiria. Kare i roa ana, kua meitaki mai tona tu. Ae, no tona tu takinga meitaki kua akamata katoa a Zahra i te apii i te Pipiria. Teianei kua taokotaiia raua ma te au i roto i te akamorianga mou.

E tika, e penei kare te au tauianga ta tatou uaorai i rave e akatikatika i te tu tau kore i teia ao katoa! Peea i reira, me akakoro te Atua kia anga i tetai ao ou, tau tikai? I na oki e e mana maata tona! E oti e akamanako ana i teia: I roto ia 2 Timoteo 3:1-4 tei taikuia i te akamataanga o te atikara i mua ake i teia, kua kite tatou e kua totou tika mai te Pipiria e mei teaa te tu o te tangata i to tatou tuatau. Kua akatupu pouroaia taua au totou ra​—pera katoa te au totou Pipiria ke atu e manganui. No reira, ka tau rai tatou kia irinaki i ta te Atua taputou kia takore i te au tu tau kore ravarai. Ae, ka rauka i te Atua te akatupu i taua akakoroanga ra. Akapeea ra?

[Pia/​Tutu i te kapi 7]

KIMI A HEIDE I TE TU TAU

“Taitaia tikai au no te tu akavaavaa iti tangata, tamaki, ngere, e te au tu tau kore, e te kimi ra au i tetai ravenga,” i akamaara ai a Heide, e noo ana aia i Marike. “Tauta au i te angaanga kapiti e te akaaerenga no te tikaanga o te tangata, e i te openga kua piri atu au ki tetai pati poritiki, akaraanga ra, kare e rauka i teia aronga i te akakore i te tu tau kore.

“Manako au e ka anoanoia tetai tauianga maata, e te akaraanga ka puapingaia te pupu o te ipi (hippy). Inara, kare katoa te reira i puapingaia. Akara au, e maata atu te inangaro o te ipi i te ainga, te kai apinga akakona, e te ura rock and roll i to te taui i teia akatereanga​—toku kite anga i teia, taitaia kino roa atu au. Muri mai kua aravei au i tetai o te Au Kite o Iehova. Kua akaari mai aia mei roto i te Pipiria i te au tauianga ta te Atua i akakoro. Ei akaraanga, kua akaari mai aia i te au irava mei ia Apokalupo 21:3, 4, e karanga ra e ka orei te Atua i te roi-mata o te katoatoa e ka akakore i te aue, te mii e te mamae​—tei akatupu putuputu i te tu tau kore. Kua ui au kiaku uaorai e, ‘Ka tupu tika tikai ainei taua au taputou ra?’

“I na kua kore toku ekoko i te tatau anga i ta te Tuatua Tapu e akakite ra no runga i to te Atua mana e te aroa, e i toku kite anga i te aroa i rotopu i te Au Kite o Iehova. Teianei te tapapa atu nei au i te taime e tupu ei te au taputou a te Atua.”

[Tutu i te kapi 6]

Ka autu tatou i te tu papakitai me aru i to te Atua aroa

[Tutu i te kapi 6]

Firuddin e tana vaine ko Zahra