E Mamae Tikai te tu Tau Kore!

I TE mataiti 2010, kua tukuia mai a Michael mei roto i te are auri i Texas, i Marike, muri ake i te nooanga i reira e 27 mataiti no te tauati vaine—e apa kare aia i rave ana. Kua tukuia mai aia i te papu anga mei te ripoti o tona DNA—tei kore i rauka ana i te taime i akautungaia ai aia—e kare aia i apa. I muri mai kua kitea mai e te aronga mana te aronga na ratou i rave i taua apa ra, kare ra i rauka i te akautunga no te mea kua pou te tuatau i akatakaia no taua apa ra.

E maata te aronga aati ture kare i akautungaia ana. Ei akaraanga i Peritane, “i te rau ngauru mataiti i topa, e rua taime maata atu te ta tangata, tei akatupu i te mataku e kare e rauka ana i te akava, e te akavaanga i te akautunga i te au apa kino,” i akakite ei te ripoti i roto i The Telegraph.

I roto ia Aukute, mataiti 2011, ngata i te au akava Peritane i te arai i tetai tu apa ke mai—te orureau i Birmingham, Liverpool, London, e te au ngai ke atu. Kua tau aereia e te au pupu meameaau te ai, vavai i te maramarama o te toa, e te keia i te au apinga, te takino i te au pitiniti, au kainga, e te au apinga akaoro pera katoa te oraanga. Te tumu? No te manganui, e noinoi tikai. Kareka tetai papaki, no te tu tau kore e kite ra ratou. Taua aronga ra, i na te aronga akakitekite nuti ei, penei e au mapu tei tupu mai roto i te au ngai putaua e tei manako e kua “kopaeia” ratou e te kavamani, e kare e manakonakoanga no te tuatau ki mua.

Akakite te tangata o te Pipiria ko Iobu e: “Te kapiki nui nei au, kare ra e tuatua-tau.” (Iobu 19:7) Mei te reira rai i teia tuatau, manganui te kapiki ra kia rauka te tu tau, kare ra ratou e akarongoia mai ana. Inara e mana tika tikai ainei to tetai kia takore i te tu tau kore? Me e puapinga kore ua ainei kia manako atu, e ka riro teia ao ei ngai tau atu a te tuatau ki mua? E raukai tetai pauanga tau, ka anoanoia tatou kia akara marie i etai o te au tumu no te tu tau kore.