E Mea Maaniia Ainei?

Te Putangiu o te Erepani

● Te maani ra te aronga kimikimi i tetai rima matini te ka rauka i te rave i tetai ua atu angaanga. Karanga te tangata maata no te pitiniti maani apinga i ko i te kamupani e maani ra i taua matini e, “e meitaki rava atu teia [rima matini ou] i tetai ua atu apinga e vai nei, i roto i te au ngai maani matini i teia tuatau.” Peea ratou i kite ei e akapeea me maani i teia rima matini ou? Na te akara anga i “te tu e angaanga ana te putangiu o te erepani,” i karanga ai aia.

Akamanako ana: Mei tetai 140 kiro karama te teimaa, kua karangaia e ko te putangiu o te erepani “te apinga maata roa atu tana au angaanga tukeke ka rauka i te rave i te enua nei.” E taangaangaia ana teia apinga ei putangiu, ei akangote vai, ei rima me kore ei mangamanga rima. E ka rauka i te erepani i te akaea, te ongi i te au tu aunga, te inu vai, mou mai i tetai apinga, e te akatangi pu mai i tona reo na roto i te reira!

Kare ko tera ua. Mei te 40,000 uaua i roto i te putangiu o te erepani, kia rauka iaia i te uri ki tetai ua atu tua. Na te taangaanga anga i a mua i tona putangiu, ka rauka i te erepani i te mou mai i tetai moni toka. E i taua taime rai, ka rauka i te erepani i te taangaanga i tona putangiu ei taaki i te au apinga teiaa atu i te 270 kiro karama!

Te irinaki ra te aronga kimikimi e me kopi ratou i te tu i maaniia ai te putangiu o te erepani, e e akapeea ana te reira me angaanga, ka tauturu tera ia ratou kia kite e akapeea me maani i te au matini meitaki roa atu, ei taangaanga no te ngutuare e te ngai pitiniti. “Maani matou i tetai matini ou takiri kare i aite mei te au matini tei matauia, ei tauturu i te tangata,” i karanga ai tetai komono no te kamupani tei taikuia i mua akenei, “e ka rauka i te tangata e te au matini i te angaanga kapiti meitaki ua no te taime mua ma te kore e kino e tupu.”

Eaa toou manako? E mea tupu ua mai ainei te putangiu o te erepani? Me e mea angaia mai ainei?