Akaraanga i te Ao

I te Repapuriki o Tiotia i te tua tonga itinga i Europa, “kua kake atu te numero o te aronga tei kopae i to ratou tokorua i te ngauru mataiti i topa.” Te maataanga o te aronga e kopae nei i to ratou tokorua, tei raro ake i te 20 mataiti.​—FINANCIAL, TIOTIA.

I Airerani, e 17 patene o te au tamariki 11 ki te 16 mataiti, “kua oake i to ratou ingoa katoa i runga i te initaneti ki tetai ke ua kare ratou i kite.” Pera katoa e tai ngauru patene tei oake i to ratou “atereti imere, numero tereponi me kore tutu.”​—THE IRISH SOCIETY FOR THE PREVENTION OF CRUELTY TO CHILDREN.

Mei tetai 4 patene o te au ai ka i roto i te vaorakau i te ao katoa, e mea tupu natura ua. Pouroa te au ai ke mai, na te tangata i akatupu​—penei no te manako kore me kore e mea akakoro tikai.​—PRESSEPORTAL, TIAMANI.

“Vaitata rai e tai i roto i te 10 tangata Marike [12 mataiti me kore tere atu] tei akakite mai e e kai ua ana ratou i te au mea akakona kare i tikaia e te ture, mei te maruana, cocaine, heroin, hallucinogen, inhalant me kore te au vairakau a te taote, ei tamataora ia ratou.”​—USA TODAY, MARIKE.

Tu Tapu Marie te Taviri ki te Turanga Tinamou

“Akakite maira tetai kimikimianga e me kare o te tamariki tu tapu marie i te mapuanga, penei ka riro ei manamanata ki te oraanga kopapa, ka takino i te turanga pae moni e ka o ki te manamanata aati ture me tangata mamaata mai,” i karanga ai te Time. Tere atu i te 1,000 tangata tei raveia te kimikimianga, mei te anau mai anga ki te 32 mataiti. Te tangata mamaata mai anga, “te aronga rererere e te riri vave ua [i te tamarikianga] e te akakoromaki kore kare e rauka i te tiaki marie i te akatupu i to ratou inangaro,” e toru taime maata atu ratou i te tuia e te maki, meangiti ta ratou moni angaanga, riro ei au metua takaua, me kore kua aati ana i te ture. Inara “ka rauka i te apii i te tu tapu marie,” i karanga ai taua makatini ra, e: “Ka riro te tauturu a te apii, e ta te pamiri ei apii i te tamariki i te tu tapu marie i te meangitianga, e ka akatupu mai i te aronga mamaata meitaki, e te tinamou.”

Apii Anga i te Aronga Akaoro Motoka Mako Kore

Te tamata ra te aronga mana i Initia i tetai au ravenga ou i te tauturu i te aronga mako kore roa atu i te akaoro motoka, na te tuku anga ia ratou ki runga i te mataara kia angaanga ei au akava apinga akaoro. Te akakoroanga, kia tauturu i te aronga akaoro kia marama e eaa te o maira i te akono anga i te au manamanata ta ratou e akatupu ana i runga i te mataara. Teianei, kare ratou e tapu ua i te aronga apa i te akautunga ia ratou, mari ra te maani ra te au akava i Gurgaon, i te tua tokerau opunga o Initia, i te aronga akaoro kia piri atu ki te au akava, i te akaaere i te au apinga akaoro i runga i te mataara no tetai apa ora. Te karanga ra tetai aronga akaoro motoka e kua riro taua apiianga ei taui i to ratou tu. “E tai tauatini [utunga] a matou e tuku ana i te au ra ravarai i Gurgaon no te aronga aati ture akaoro,” i karanga ai a Bharti Arora, te tauturu komitiona. “Ka inangaro matou e 1000 akaou mai ‘au akava’ i te au ra ravarai.”