Ui te au Mapu E

E oa ua Ainei Taua​—Me e Apinga ke Atu Rai Tetai?, Tuanga 2

I ROTO I TA TATOU ATIKARA MUA, kua akamanako ana tatou e rua tu o te oraanga.

● Me o koe ki tetai pirianga akainangaro i mua ake ka papa ai koe no te reira, papu e ka mamae tetai tangata.​—Maseli 6:27.

● Me piri toou manako ki tetai tamaiti me kore tamaine i mua ake ka papa ai koe no tetai pirianga tinamou, penei ka takino tera i to korua pirianga oa. *​—Maseli 18:24.

I ROTO I TEIA ITIU, ka uriuri tatou

● Te toru o te tu o te oraanga me o koe ki tetai pirianga akainangaro

● Akapeea koe e kite ei me kua taui toou turanga i roto i tetai pirianga ki tetai tamaiti me kore tamaine

TE TU IA O TE ORAANGA: Me o koe ki tetai pirianga akainangaro i mua ake ka papa ai koe no te reira, ka takino te reira i toou rongo meitaki. Karanga a Mia * e: “Maata  taku tamariki tamaroa i kite e e maata te tamariki tamaine ta ratou i akaoa atu. E maata ta ratou tamariki tamaine e piri ana. Manako te tamariki tamaine e te inangaroia maira ratou, kareka ra te kangakanga uaia maira.”

Kia akamanako:

● Noatu me e tamaroa me kore e tamaine koe, akapeea te pirianga vaitata roa ki tetai tamaiti me kore tamaine te takino anga i toou rongo meitaki?

“Kare i te mea meitaki i te tuku karere ki tetai tamaiti me kore tamaine. Akamata koe te tuku e tai manga karere ki tetai tamaiti, kare i roa ana e maata ua atu taau tamaiti e tuku karere ra. Kite ua ake koe, e toru ia tamaiti taau e akameamea ra, e te manako ra tetai e tetai e koia taau ‘mea inangaro rava atu.’ Me kite mai ratou i te tika, ka mamae ratou—aere mai toou rongo e tamaine akameamea.”​—Ko Lara.

Te na ko ra te Pipiria e: “E kitea te tu o te tamaiti [me kore tamaine] i tana au ravenga; i te meitaki anga e te tiratiratu.”​​—Maseli 20:11.

Te mea puapinga: Kare i te tarevake kia kapiti atu ki tetai tamaiti me kore tamaine. Inara, me kare koe e akanoo i tetai au kena, ka mamae koe, ka takino i te pirianga meitaki, e ka takino i toou rongo meitaki.

 Akapeea koe e kite ei me kua taui toou turanga? Tetai mataara, kia ui kia koe uaorai e, ‘E tai ua ainei rai oa tamaine me kore tamaiti taku e akakite ana i taku au mea muna?’ “Me e oa ua korua ko tetai tamaiti,” i akakite ei tetai tamaine ko Erin tona ingoa, “eiaa e akariro e koia ua taau tangata mua ka tuatua i te au ra ravarai e taau ka akakite i te au nuti maata. Kia papu ia koe e kare koia taau ka inangaro kia akapumaana mai ia koe.”

Kia akamanako:

● Eaa ra i akara anga meitaki ei kia akariro e ko tetai tamaiti okotai ua me kore tamaine, te ka akakite koe i taau au mea muna? E eaa te au kino ka tupu mai?

“Te tamariki tamaroa taku i kite, kare ko ratou toku au oa piri tikai. Kare e roa ana taku tuatua kia ratou i runga i te tereponi, mei taku e tuatua ana ki toku oa tamaine. E kare au e akakite ana i tetai au manako kia ratou.”​—Ko Rianne.

Te na ko ra te Pipiria e: “Ko tei tapapa i tona vaa, kua tiaki ïa i tona ora: ko tei amama ua ra i tona vaa, e mate tona.”​—Maseli 13:3.

Akamanako ana: E kino ainei te akakite maata no runga ia koe ki tetai tamaiti me kore tamaine? Akapeea me kore to korua pirianga oa? Ka tataraapa ainei koe no tei akakite koe i taua au mea ra kiaia?

Kua akakite mai tetai tamaine mapu ko Alexis te ingoa e: “Auraka e kopae atu i tetai no te mea e tamaiti me kore e tamaine aia. E auraka e pikikaa ia koe uaorai e e oa ua korua e oti akera e apinga ke atu rai tetai. Akamako i toou manako, kare koe i reira e mamae ngakau.”

Maata atu te au atikara i roto i te “Ui te au Mapu E,” ka kiteaia i runga i te Web site www.pr418.com

[Au Tataanga Rikiriki i Raro]

[Pia i te kapi 27]

TUA TIKA TIKAI: “E oa maua ko tetai tamaiti, e te mea, e oaoa ua ana maua. Inara, akamata maua i te pukapuka no runga ia maua rai. Te kite ra au e te aere ke ua atura te manako, no te mea te tuatua mai nei aia i tona uaorai au manamanata. Tetai ra kua tuku mai aia i tetai imere te akakite mai e e inangaro tona iaku. Kare au i kite e eaa taku ka tuatua. Tetai tua, reka au​—no te mea ka reka rai taua me manako akapera mai tetai tangata ia taua. Ina, kua akamata au i te manamanata. Kua kite au e kare e tau kia ‘oa ua’ atu rai maua no te mea te manako ra aia e e apinga ke atu rai tetai. Me akakite au kiaia e te tamariki nei rai maua e kare e tau no teia tu akainangaro, kare aia e rekareka. Kua akakite au i teia au mea pouroa ki toku nga metua, akakite tika mai raua e e mea puapinga tikai eiaa maua e aravei putuputu. Kua riro teia ei akakite mai kiaku e ka viviki ua tetai apinga tau i te riro mai ei mea manamanata maata. E mei reira mai, kua akapapu meitaki au e kia akaiti mai i toku taime e piri ana ki tetai tamaiti, i te taime tikai me tuku karere. Tauturu meitaki teia iaku kia aere i roto i te pupu. Na roto i taua mataara ra, kare e aere ke ua te tuatua, e kare korua e akainangaro atu i tetai e tetai.”​—Elena.

[Pia i te kapi 28]

KORE EI E UI KI TOOU NGA METUA?

Ui ki toou nga metua i to raua manako no runga i te nga uianga “Kia akamanako” i roto i teia atikara. E tuke ainei to raua manako ki toou? Me koia ia, akapeea? Eaa te puapinga taau e kite ra no runga i to raua manako?​—Maseli 1:8.

[Pia/​Au Tutu i te kapi 28]

TA TOOU AU OA E TUATUA RA

Andre​—Te maata atu i toou taime ka akapou ki tetai tamaine, te mama roa atu ia noou te akainangaro atu iaia, e ka manako mai aia e te inangaro atura koe iaia. Me kare tikai toou akakoroanga e kia akatupu i tetai pirianga akainangaro, eiaa i reira e maani mai i tetai.

Cassidy​—E tamaine oaoa au, tupu mai au i rotopu i te tamariki tamaroa no reira e reka ana au ia ratou​—kare ra oki te reira i te mea meitaki. Ko te manako atu i tetai tamaiti mei taku rai e manako ana i toku oa tamaine, kare i te mea meitaki—​no te mea ka oronga atu te reira i tetai manako tarevake. Ko te manako i tetai tamaiti mei te mea rai e e tungane aia noku, ko te mea meitaki ia!

 [Pia i te kapi 29]

AKAKITEANGA KI TE AU METUA

I roto i te au ngai tau, kare i te mea tarevake no te au mapu i te kapiti atu ki tetai tamaiti me kore tamaine. Te aronga kare i papa ake no tetai pirianga te ka arataki atu ki te oraanga akaipoipo, ka anoanoia kia akanoo i tetai au kena. * No ratou, kia vai ua te reira ei pirianga oa​—eiaa ei apinga ke atu.

Eaa te tupu ana me o tetai nga tokorua ki roto i tetai pirianga akainangaro i mua ake ka papa ai raua no te reira? Kare raua e mataora. Aite rai mei te motoka kare e uira, kare ona puapinga. Pera rai raua kare roa, ka kite mai raua e kare teia pirianga e puapingaia. Penei ka akamata tetai pae te aravei muna ua​—e maata te manamanata ka tupu i teia turanga. Tetai pae kua akaruke​—ka akatupu teia i te mamae ngakau e te taitaia. Ka akapeea koe me tauturu i taau tamaiti me kore tamaine kia kopae i teia mataara tarevake o te akainangaro e kare aia i papa ake?​—Koheleta 11:10.

Te mea puapinga rava atu ka tau koe kia rave, e komunikeiti maru atu kiaia me tuatua no runga i te oa tamaiti me kore tamaine. Na teia mataara ka kite i reira koe e eaa te tupu ra​—e ka papa ua koe i te tauturu—​me akamata mai tetai apinga ke i roto i to raua pirianga.

Tetai au metua kare ratou e kite ana e, te arai ra ratou i te inangaro o ta ratou mapu i te tuatua mai no runga i to ratou pirianga oa. Akamanako ana i ta tetai au mapu i akakite ki te makatini E Ara!

“E inangaro ua ana au i te akakite ki toku mama e koai taku e akainangaro ra, inara no te viviki ua ana aia i te riri, kare au i akakite atu kiaia.”​—Cara.

“Me akakite au ki toku mama e e tamaiti taku e inangaro ra, ka karanga mai aia e, ‘Eiaa koe e manako e ka tae atu au ki toou akaipoipo!’ kare aia e karanga mai e ‘Ka inangaro au i te kite no runga i toou oa. Eaa taau mea e reka ana no runga iaia?’ Naringa toku mama i ui akapera mai, penei ka akarongo au ki tana akamaroiroianga.”​—Nadeine.

I tetai tua ra, akamanako ana i te tuke me akarongo meitaki nga metua e oti oronga i te aratakianga tau.

“Kare toku nga metua i riri ana te akakite anga au e e tamaiti taku e reka ana. Kua akakite mai raua i te mea tikai e anoanoia ra kia kite au, e kua marama ua raua i toku manako. No reira mama ua iaku i te akarongo ki to raua manako e kia akakite atu i taku au mea e manako ra.”​—Corrina.

“Te akakite mai anga toku nga metua e koai ta raua mea inangaro i to raua mapuanga—e kua akamarama katoa mai i te tumu i kore ei tetai pirianga oa i puapingaia​—kua tauturu te reira iaku kia kite e te MEITAKI ua ra kia akakite au i toku manako no runga i tetai tamaiti kia raua.”​—Linette.

Akamanako katoa e, i tetai taime e au tumu ke atu rai tetai i akainangaro ei tetai mapu i tetai.

“Toku aravei ngaro ua anga i tetai tamaiti, ko te tumu, no te mea e mataora ana au iaia e ka akarongo ua mai aia kiaku.”​—Annette.

“E tamaiti tetai e reka ana au te akaoaoa atu. E akamanako ua mai ana aia iaku, ko tera toku tu paruparu. E reka ana au tona tu, noatu e meitaki me e kino.”​—Amy.

“Me akakite mai toku nga metua e e manea au me kore e manea tetai kakau i runga iaku, kare i reira au e manako ana e, ka inangaroia te tuatua akameitaki a tetai tamaiti.”​—Karen.

Ui kia koe uaorai e:

Eaa taku ka rave kia rauka i taku tamaiti me kore tamaine i te akakite mai i tona manako kiaku?​—Philipi 4:5.

E tu ‘rapurapu ainei toku i te akarongo, e te tavarevare i te tuatua’?​—Iakobo 1:19.

Eaa taku ka rave i te akaiti mai i te timataanga no taku tamaiti me kore tamaine, kia kore e kimi i te inangaro e te arikianga a tetai ke?​—Kolosa 3:21.

Te mea puapinga: Tauturu i taau mapu kia kite e akapeea te akapapu anga e kia vai mako ua to ratou pirianga ki tetai tamaiti me kore tamaine, e kia kore e manamanata e tupu. Ka tauturu teia ravenga iaia me tangata mamaata mai.​—Kolosa 3:5; 1 Tesalonia 4:3-6.

[Tataanga Rikiriki i Raro]

[Tiati i te kapi 27]

(No runga i teia, akara i te puka)

AU KENA

E

✔ aere kapiti i roto i te pupu

✔ akamatau atu kia ratou

✔ pukapuka mataora

AURAKA E

X aere kapiti ko korua ua

X akakite i te au mea muna

X akameamea

[Tutu i te kapi 28]

(No runga i teia, akara i te puka)

AKAOAOA ANGA

AKAMEAMEA ANGA

AMIRIMIRI ANGA

MOUMOU RIMA ANGA

ONGI ONGI ANGA