Eaa ra te ka Taui?

“Kare tetai enua e tamaki mai ki tetai enua i te koke.”

“Kare oki to reira e karanga e, Kua maki au.”

“E kore rava te mate.”

PENEI ka akara anga ekoko e me ka tupu rai teia au tuatua i runga akenei. Inara kia papu ia tatou e kare te reira i te moemoea ua. No teaa ra? No te mea, kare tera i te koreromotu puapinga kore ua na te aronga poritiki kare o ratou mana i te taui i to tatou ao. Mari ra, ka kiteaia te au taputou i runga akenei i roto i te Pipiria. *

E maata te tangata e manako ra e e puka takere te Pipiria e kare o te reira puapinga no to tatou tuatau. Ko taau ainei tera e irinaki ra? Me koia ia, kore ei koe e akara meitaki e eaa to roto i te Pipiria? Ko te Pipiria ua rai te puka tapu e akakite maira i te tuatua enua o te tangata mei muatangana mai. Te akamarama maira te reira i te au mea e aru mai nei:

● Akapeea te tangata i te o anga ki roto i te kino.​—Roma 5:12.

● To te Atua akakoroanga, kia akatikatika i taua turanga ra.​—Ioane 3:16.

● Te tumu kare ei e rauka i te au kavamani te taui to tatou ao.​—Ieremia 10:23.

● Te tumu ka rauka ai ia tatou te irinaki i ta te Atua taputou kia rave i te reira.​—Iosua 23:14.

Ka takore tika tikai ainei te Atua i te onge, tamaki, maki, e te mate ta te tangata e kite nei? Kare tera manakonakoanga i te mea ngata i te irinaki me ariki koe i te au mea e aru mai nei:

1. Na te Atua i anga ia tatou.

2. Te manako maira aia ia tatou.

3. E mana tona i te taui i teia ao.

4. Akakoro aia i te akatupu i te reira.

E au tumuanga tau ainei tetai kia ariki i taua au manako e a? Te pati atu nei te Au Kite o Iehova, na ratou i nenei i teia makatini, kia kimi koe uaorai na roto i te apii anga i te Pipiria.

Penei e Pipiria taau, inara kare koe e tatau putuputu ana me kore kare rava koe e tatau ana i te reira. Maata te au tangata e tatau ana i te Pipiria tei karanga e e ngata ana ia ratou te marama i te reira. Me ko koe tetai e akapera ana, te pati atu nei matou ia koe kia aravei atu i te Au Kite o Iehova no tetai apii Pipiria kare e tutaki. Mirioni ua atu tangata i te ao katoa te puapingaia nei mei taua akanoonooanga. E akapeea ana ra te reira?

Te au epetoma ravarai, e tai me kore e rua nga Kite o Iehova ka aere atu ki toou kainga me kore ki tetai ngai ka tau ia koe i te uriuri i te Pipiria kia koe kare e tiati. Ka riro teia au tuanga apii Pipiria ei tauturu ia koe i te pau i te au uianga mei te, Eaa te tumu e mamae nei tatou? Eaa ra i kore ei e rauka i te kavamani tangata i te taui i te ao? Eaa te Patireia o te Atua, e ka akapeea te reira i te akatupuanga i te au mea kare e rauka i te au kavamani tangata i te rave?

No tetai akakiteanga maata atu e ka akapeea koe e puapingaia ai mei tetai apii Pipiria, aravei atu i te Au Kite o Iehova i toou ngai me kore akara i ta matou Web site www.pr418.com. Ka rauka katoa ia koe te tata ki te au atereti i te kapi 5 o teia makatini.

[Tataanga Rikiriki i Raro]