E Mea Maaniia Ainei?

Ika Akapupu

● I te au mataiti ravarai, tere atu i te okotai mirioni tangata e mate ana i roto i te au motoka u, e mei te 50 mirioni tei kino. E oti akera, mirioni ua atu ika ka rauka i te kau kapiti i roto i te pupu, e kare tetai e u atu ki runga i tetai. E akapeea ana ratou, e eaa ta ratou ka apii mai ia tatou no runga i te akaiti mai anga i te au motoka e u nei?

Akamanako ana: E kite ana te au ika akapupu i te au mea takapini ia ratou, na roto i to ratou mata e tetai mero tei karangaia e e lateral line. E taangaanga ana ratou i teia mero, kia kite i te ngai o te au ika ke atu takapini ia ratou, e oti ka akatano ei ratou mei te aru maira:

1: Kau kapiti. E akatano ana ratou i to ratou viviki ki to te ika i te pae mai ia ratou, e te akapapu e kia tau ua te mamao mei ia ratou.

2: Me akavaitata atu. Ka akavaitata atu ratou ki te au ika tei mamao roa atu mei ia ratou.

3: Kia kore e u. E taui ana ratou i to ratou kaveinga kia kore e u ki runga i tetai au ika ke mai.

Akatumuia ki runga i taua au tu o te ika akapupu, kua maani tetai kamupani maani motoka i Tiapani i tetai au motoka ropoti rikiriki, kia rauka i te oro kapiti i roto i te pupu ma te kore e u. Na te ropoti e komunikeiti, kare na te mata; ko te laser ta te reira ka taangaanga, kare ko lateral line. Kua irinaki teia kamupani e na teia ravenga e tauturu ia ratou i te maani i te au motoka “kare e u,” e “kare e takino i te au turanga natura, e te ka kopae i te au turanga e piritia nei te motoka i runga i te mataara.”

“Kua taangaanga matou i te tu kite ou o teia tuatau [na] te kopi mai anga i te tu o te ika akapupu,” i karanga ai a Toshiyuki Andou, te enitinia maata no te maani anga i te motoka ropoti. “E maata ta matou, ta te aronga maani motoka ka kite mai, mei te tu o te ika akapupu.”

Eaa toou manako? E mea tupu manako kore ua mai ainei te ika akapupu? Me e mea maaniia ainei?

[Tutu i te kapi 15]

[Akameitakianga]

© Ralf Kiefner/​age fotostock