Te Manako o te Pipiria

Ka Anoanoia Ainei Koe Kia Aere ki Tetai Iero, Nao, me Kore Are Pure i te Pure ki te Atua?

MAATA te tangata e aere ua ana ki tetai are akamorianga kia pure ki te Atua. Tetai pae e aere mamao ana ratou ki taua au ngai ra. Toou manako e ka anoanoia koe kia aere ki tetai iero, nao, me kore are pure i te pure ki te Atua? Toou manako e ka rauka ua ia koe i te tuatua kiaia i tetai ua atu taime me kore i tetai ua atu ngai? Eaa ra ta te Pipiria e akakite maira?

I te akamataanga o te tuatua enua o te tangata, kare e are akamorianga. E aua manea ua rai te ngai e noo ana to tatou nga metua mua. (Genese 2:8) Mei reira mai, e komunikeiti ana raua ki te Atua ko Iehova, Tei Anga ia raua. Te maata mai anga te tangata i muri mai, pouroa te au tangata tuatua tika mei ia Noa rai, “kua aaere” ratou ma “te Atua”​—e kare i anoanoia ana tetai are akamorianga no ratou. (Genese 6:9) E pure putuputu ua ana teia au tangata kia Iehova no to ratou inangaro iaia e kua mareka mai aia ia ratou.

Kare te Atua e Noo Ana i Roto i te Are i Angaia e te Rima

Kua kite te au tangata akarongo mou i taito e kare Tei Anga i te enua e te ao katoa nei e noo ana i roto i te are i angaia e te rima. “Ka noo tika mairai ainei te Atua ki o te tangata nei ki runga i te enua?” i ui ei te ariki pakari ko Solomona. “I na, te rangi nei, e te rangi o te au rangi ra, kare rai koe e o,” i akakite ei aia. (2 Paraleipomeno 6:18) E tika, e puakapa to te ngati Iseraela e i muri mai e akaputuputu ana ratou ki roto i te iero i te akono i te au oroa kia tau ki te Ture a te Atua. (Exodo 23:14-17) Inara ka rauka ua ia ratou i te pure ki te Atua i tetai ua atu taime​—me tiaki i ta ratou anana, angaanga i roto i te koro, noo kapiti e to ratou pamiri, e me ko ratou anake ua.​—Salamo 65:2; Mataio 6:6.

Mei te reira katoa, ka rauka ia tatou i te pure ki te Atua i tetai ua atu ngai e i tetai ua atu taime. E aere ua ana a Iesu Karaiti, to tatou akaraanga, ki te au ngai motutaa kia pure. (Mareko 1:35) Ei akaraanga, tetai atianga, kua aere aia “ki runga i tetai maunga e pure, e ao ua iora te po iaia i te pure anga ki te Atua.”​—Luka 6:12.

E tika rai, ei ngati Iuda, e aere ua ana a Iesu ki te au oroa akamorianga i ko i te iero i Ierusalema. (Ioane 2:13, 14) Inara, kua totou mai aia no runga i tetai tuatau kare te iero e riro akaou ei ngai no te akamorianga mou. Te tuatua anga aia ki tetai vaine Samaria vaitata atu ki tetai maunga i Samaria, te ngai o te iero a tona iti tangata, kua akakite a Iesu e: “Kua vaitata te ora e, kare kotou e akamori i te Metua i teianei maunga, e kare rai oki i Ierusalema.” E kua karanga katoa aia e “e akamori ei i te Metua te aronga akamori tika ra, ma te vaerua e te tuatua-mou.”​—Ioane 4:21, 23.

Ae, kare a Iesu e manako ana no runga i te are tei maaniia ki te piriki e te ngaika mari ra i te akamorianga mou tei orongaia ma te ngakau tae. Ko te aiteanga ainei i reira e kare te au pipi a Iesu, tei kapikiia ei au Kerititiano i muri mai, e akamori i te Atua i roto i tetai are? (Angaanga 11:26) Kare, no te mea e au tumuanga tau tetai.

E Pamiri Pae Vaerua te Iti Tangata o te Atua

E pamiri te au tavini akarongo mou o te Atua​—koia oki e pamiri pae vaerua. (Luka 8:21) Te  pamiri meitaki e kaikai kapiti ana ratou, na teia e akaketaketa ana i to ratou pirianga ei pamiri. Mei te reira katoa i te pae vaerua. Te au uipaanga Kerititiano mei te kaikai anga vaerua rai, ei akamatutu e ei akamaroiroi i te pirianga pae vaerua. Kua tata te apotetoro Kerititiano ko Paulo e: “E akono marie rai tatou tetai ki tetai, ka akamaroiroi atu ei kia maata te aroa, e i te angaanga memeitaki ra: Auraka e akaruke i to tatou akaputuputu anga mei ta tetai aronga, ka akamaroiroi ra.”​—Ebera 10:24, 25.

No reira, te kite ra te aronga akamori mou e e tuanga maata te putuputuanga, no te mea ka tauturu te reira i te au mema tataki tai kia akatupu i te au tu pae vaerua kare e rauka me ko ratou anake ua. Te kapiti maira teia au tu i te inangaro, akakore anga ara, takinga meitaki, maru, e te au.​—2 Korinetia 2:7; Galatia 5:19-23.

E akaputuputu ana te au Kerititiano mua kiea no te uipaanga e te akamorianga? Maataanga o te taime, i roto i te ngutuare o te au taeake. (Roma 16:5; Kolosa 4:15) Ei akaraanga, te tata anga aia ki tetai taeake Kerititiano, kua tata a Paulo i tana reta ki “te ekalesia i roto i toou are.” *​—Philemona 1, 2.

Mei te reira katoa i teia tuatau, kare te iti tangata o te Atua e anoano i te au are pure mekameka, mari ra e au ngai tau ua no te katoatoa kia akaputuputu mai. E au ngai tau ua rai ta te Au Kite o Iehova e taangaanga ana, e kapiki ana ratou e e au Are Uipaanga Patireia. Kare e kore e Are Uipaanga Patireia tetai i toou ngai. E au are tau ua teia, e te mako i te rave anga i te au uipaanga​—tei kapiti mai i te imene, pure, e te uriurianga Pipiria.

E mea akaperepere na te Au Kite o Iehova to ratou tuatau akamori i te Atua. No reira, ka akapou ratou i to ratou taime i te au ra no te pure, ei pamiri me e ko ratou anake ua. “E akavaitata atu ki te Atua, e nana e akavaitata mai kia kotou na,” i karanga ai a Iakobo 4:8.

[Tataanga Rikiriki i Raro]

I MANAKO ANA AINEI KOE?

● E noo ana ainei te Atua i roto i te au are angaia e te rima?​—2 Paraleipomeno 6:18.

● I pure a Iesu kiea i tetai po?​—Luka 6:12.

● Eaa ra te aronga akamori mou i akaputuputu kapiti ei?​—Ebera 10:24, 25.

[Tataanga i te kapi 21]

Ka akarongoia ainei taau au pure i tetai ua atu ngai?