Akakite mai no runga ia koe.

Anauia au i te mataiti 1979 i Marike. E toru oku mataiti, kua tatara toku nga metua. Kua utuutu toku mama iaku ki roto i te au peu ngati Iuda e kua tuku iaku ki te yeshivas, e are apii na te tamariki ngati Iuda. E itu oku mataiti, kua neke maua ki Iseraela no tetai mataiti e kua aere au ki tetai apii i tetai oire angaanga tei kapikiia e kibbutz. E oti, kua neke maua ko Mama ki Mexico.

Noatu kare e sunago i te ngai i neke ei maua, kua akono rai au i te au peu ngati Iuda. Ka tutungi kanara au i te au Sabati, ka tatau i te Torah, e ka pure ma te tauturu a te siddur, e puka pure. I te apii, ka akakite ua rai au ki toku au oa apii e naku te akonoanga mua. Kare au i tatau ana i te Koreromotu Ou, tei akakite mai i te angaanga tutu aere e te au apiianga a Iesu Mesia. Te tika, kua akamatakite toku mama iaku auraka e tatau i te reira, ko te taʼero aea toku manako e ta te reira au apiianga.

Eaa te tumu i manako ei koe i te tatau i te Koreromotu Ou?

Te tae anga au ki te 17 mataiti, kua oki au ki Marike no te akaoti i taku apii. I reira, kua akakite mai tetai oa tei karanga e e Kerititiano aia e kare toku oraanga e puapingaia me kare a Iesu.

Pau atu au: “Kua ngaro te manako o te aronga tei irinaki ia Iesu.”

Ui mai aia: “Kua tatau ainei koe i te Koreromotu Ou?”

Pau au: “Kare.”

“Me koia ïa,” i karanga ai aia, “kare ainei e te noo kite kore ua ra koe, no te akakite mai i toou manako no runga i tetai mea kare koe i kite?”

Kua pakia au e tana tuatua no te mea i manako ua ana au e mea neneva i te akakite i toou manako ma te papu kore. No tei akoia au, kua rave au i tana Pipiria, kua oki ki te kainga e kua akamata i te tatau i te Koreromotu Ou.

Eaa tei tupu no taau e tatau ra?

Poitirere tikai au i te kite e kua tataia te Koreromotu Ou e te aronga ngati Iuda. Pera katoa, te maata atu i taku i tatau, kua akamata au i te kite i te tu takinga meitaki e te akaaka o te tangata ngati Iuda ko Iesu e tona inangaro i te tauturu i te tangata, kare i te takinokino ia ratou. Kua aere katoa au ki tetai ngai runanga puka e kua rave mai i te au puka no runga iaia. Inara, kare te reira i akapapu mai kiaku e koia rai te Mesia. Karanga tetai au puka e koia te Atua​—i toku manako, e irinakianga tarevake. Te tika, koai ta Iesu i pure atu​—kiaia uaorai? Pera katoa, kua mate a Iesu. Inara, karanga te Pipiria no runga i te Atua e kare aia e mate. *

Eaa taau i rave?

Kare te tuatua mou e tarevake ana, e kua tauta au kia kimi i te tuatua mou. No reira kua pure akatenga au ki te Atua ma te ngakau tae e ma te roimata—no te taime mua i toku oraanga ma te kore e taangaanga i taku puka pure. Kare i oti ake taku pure, e topapa tetai i te ngutupa. E nga Kite no Iehova. Kua oake mai raua i tetai puka apii Pipiria. Ma te tauturu a teia puka, pera katoa te au uriurianga ki te Au Kite, kua papu iaku e kua akatumuia ta ratou irinakianga ki runga i te Pipiria. Ei akaraanga, kua āriki te Au Kite e kare a Iesu i te tuanga no te Atua Toru Tai, mari ra “ko te Tamaiti [aia] na te Atua” * e “te tumu o te au mea ravarai a te Atua i angaia ra.” *

I muri akera, kua oki au ki Mexico, e kua apii ua atu i te au totou no te Mesia ma te Au Kite. Umere tikai au e manganui ua atu te au totou! Noatu ra, kua tarotokaka rai au. Kua manako au: ‘Ko Iesu anake ua tei akatupu i teia taoonga?’ e ‘Akapeea me e tangata akatutu ua aia tei karape i te akono i teia taoonga?’

Eaa tei taui i toou manako?

Kua akaari mai te Au Kite i te au totou kare e tika i tetai tangata akatutu pikikaa i te akatupu. Ei akaraanga, tere atu i te 700 mataiti i mua atu ana, karanga te peroveta ko Mika e ka anau te Mesia i Betelehema, i Iudea. * Koai ïa ka rauka i te iki e ko teea ngai ka anau ei aia? Tata a Isaia e ka tamateia te Mesia ei tangata kino tei akavaavaaia, noatu te reira, ka tanumia aia ma te aronga apinganui. * Kua akatupu pouroa a Iesu i teia au totou.

Te akapapuanga openga, kua ō mai te papaanga tupuna o Iesu. Akakite mai te Pipiria e ka na roto mai te Mesia i te uanga a te Ariki ko Davida. * No te mea kua akono tamou te iti tangata ngati Iuda o taito i te au papaanga tupuna, tetai na ratou uaorai e tetai na te katoatoa, naringa kare a Iesu no roto mai i te uanga a Davida, ka riro teia ei akaapaanga maata na tona au enemi! Inara kare ratou i akapera no te mea kare e rauka te patoi i te tikaanga e no roto mai a Iesu i te uanga a Davida. Kapiki katoa te urupu tangata iaia e ko “te Tamaiti a Davida.” *

I te mataiti 70 T.N.​—e 37 mataiti i muri ake i to Iesu matenga—kua akapou te au nuku vaeau Roma ia Ierusalema, e kua ngaro takiri me kore kua takoreia te au papaanga tupuna. No reira, e rauka ai te akataka i te Mesia i roto i te au papaanga tupuna, kua anoanoia kia mama mai aia i mua ake i te mataiti 70 T.N.

Akapeea teia kite ou te akakeu anga ia koe?

Ia Deuteronomi 18:18, 19, kua totou te Atua e ka tu mai tetai peroveta no Iseraela mei ia Mose rai te tu. Karanga katoa te Atua: “E te kore e akarongo mai i te tuatua naku, tana e tuatua ra i toku nei ingoa, e akautunga atu ïa au iaia.” Kua riro taku apii oonu i te katoaanga o te Pipiria ei akapapu kiaku e ko Iesu Nazareta taua peroveta ra.