Akataka i te mea puapinga. “Kia timata oki kotou i te au mea e maata ua atu te meitaki.” (Philipi 1:10) E akapapa i te au angaanga taau ka rave, te mea puapinga e te mea rapurapu. E akamaara, tetai angaanga puapinga​—ei akaraanga, te oko kai​—penei kare i te mea rapurapu. E penei tetai angaanga rapurapu​—te akara i te akamataanga o taau porokaramu tivi reka​—penei kare i te mea puapinga. *

Akamanako eaa te ka aru mai. “Te mania ra te auri, e kare i akakinaia te mata ra, kia akamaata aia i te ririnui i reira,” i karanga ai a Koheleta 10:​10. Karanga katoa te irava: “Na te pakari ra e akakite mai i te ravenga.” Te apiianga? E parani meitaki eaa taau ka rave a muri mai kia akapou meitaki i toou taime, mei te mea e te akakina ra koe i taau toki. E akapae me kore e akakore i te au angaanga puapinga kore, e kaimoumou taime ua e te maroiroi. Me maata toou taime no te mea kua oti taau angaanga, e rave i tetai angaanga ke taau i parani. Me akamanako koe eaa te ka aru mai, e maata taau angaanga ka oti, aite rai ki te tangata pakari tei akakina i tana toki.

Akamāmā i toou oraanga. Akakore i te au mea puapinga kore te ka kaimoumou i toou taime. Me maata roa taau angaanga e te au parani, ka akamaata te reira i te taitaia e ka ngere koe i te rekareka.

Tavarevare e te manako ekoko. “Ko tei tiaki i te matangi ra, kare aia e ruru i te ua; e ko tei akara i te tumurangi ra, kare aia e kokoti.” (Koheleta 11:4) Te apiianga? Ka riro te tavarevare ei kaimoumou i te taime e kare e angaanga e raveia. Me tiaki te tangata tanutanu kia tano meitaki te reva, penei kare aia e ruru i te ua me kore e kokoti. Mei te reira katoa, penei ka tuku tatou i te au turanga manako koreia o te oraanga kia akatupu i te manako ekoko. Me kore penei ka manako tatou e ka anoanoia kia rauka i te au akakiteanga pouroa i mua ake ka rave ei i tetai ikianga. E tika, ka anoanoia te kimikimianga e te akamanako meitaki kia rave i te au ikianga puapinga. “Te akara meitaki ra te tangata akono ra i tona takainga,” i karanga ai a Maseli 14:15. Noatu ra, e maata te au ikianga te ō maira te au turanga manako koreia.—Koheleta 11:6.

Inangaro kia apa kore te au mea. Karanga a Iakobo 3:​17: “Kareka te pakari no runga maira [me kore no ko mai i te Atua], e . . . maru.” E tika, e mea meitaki kia akanoo i te au turanga teitei! Inara, i tetai taime penei e teitei roa te au turanga ta tatou ka akanoo e ka tupu te maromaroa e te manako puapinga kore. Ei akaraanga, me apii tetai tangata i te reo ke ka anoanoia aia kia mārama e ka tarevake tana tuatua anga e kia apii aia mei te reira. Kareka te tangata tei inangaro kia apa kore, penei ka mataku aia i te rave i te reira e ka riro teia ei akamarie i tana apii anga i te reo. Mea meitaki kia tau ua ta tatou e tapapa ra. “Tei te aronga akaaka ra te pakari,” i karanga ai a Maseli 11:2. Pera katoa, kare te aronga akaaka e te tau e manako maata roa ia ratou uaorai e ka katakata me tarevake ratou.

Akapou i te taime no te angaanga e te tarekareka. “E ngari ake te rima, okotai kia ki i te manga ma te au i nga rima katoa e rua kia ki ma te pekapeka e te kai i te matangi.” (Koheleta 4:6) Te tangata tei angaanga i te au atianga ravarai, ka ngere aia i te meitaki te ka rauka mei tana angaanga maroiroi no te mea kua pou tona taime e te maroiroi. Kareka te tangata kope, ka iki aia i “nga rima katoa e rua kia ki” i te moe e ka kaimoumou i te taime. Te akamaroiroi maira te Pipiria i te manako tau: E angaanga pakari e kia rekareka i taau angaanga. “E mea o maiia mai ïa e te Atua.”—Koheleta 5:​19.

Kia rava taau moe. “E akāvai rai au ki raro ma te ora,” i karanga ai te tata Pipiria. (Salamo 4:8) Te maataanga o te aronga, ka anoanoia kia moe e varu ora i te po kia rauka mai te puapinga i te pae kopapa e te pae manako. No runga i te puapinga pae manako, me rava taau moe ka tauturu ia koe kia akamou i te manako e kia viviki i te akamaara, e e maata taau ka apii mai. Inara, me kare e rava taau moe, ka marie mai koe e ka tupu te au manamanata, te tarevake e ka viviki koe i te riri.

Akanoo i te au akakoroanga ka taeria e koe. “E ngari ake tei rauka ua mai, i te apeape ke anga o te manako.” (Koheleta 6:9) Te apiianga? Kare te tangata kite pakari e tuku i tona au anoano kia akatere i tona oraanga, te au anoano tikai kare e rauka i te itae atu. No reira, kare aia e vare i te au akakitekiteanga tei timata iaia kia maani viviki i te moni. Mari ra, ka mareka ua aia “tei rauka ua mai” iaia.

Akamanako i taau kaveinga. Ka tauturu te au kaveinga ia koe kia akamanako eaa te mea meitaki e te puapinga, e me ka paunaia te taime. Me akaaite toou oraanga ki te kakao, na te au kaveinga e akatere i tera kakao. No reira, ka tauturu te au kaveinga meitaki ia koe kia akanoo meitaki i te au mea puapinga i roto i te oraanga e kia akapou meitaki tikai toou taime mei tera ora ki tera ora i te au rā ravarai. Ka kiteia teia au kaveinga kiea? E manganui tei akara ki te Pipiria no te mea tei reira te pakari maata.​—Maseli 2:6, 7.

Akariro i te aroa ei kaveinga naau. Ko te aroa “taua tatua apa kore,” i karanga ai a Kolosa 3:​14. Me kare e aroa, kare tatou e mataora e te ngakau ‘au e te tinamou, i roto tikai i te ngutuare tangata. Me kare te tangata e aru i teia kaveinga, penei ka akariro ratou i te apinganui e te ngai angaanga ei mea puapinga roa atu, e kare ratou e mataora. Ae, no reira rai te Pipira i akariro ei i te aroa ei kaveinga maata roa atu, te taiku anga i te reira e anere ua atu taime.—1 Korinetia 13:​1-3; 1 Ioane 4:​8.

Akanoo i te taime no toou anoano pae vaerua. Tetai tangata ko Geoff tona ingoa, e vaine akaperepere tana e nga tamariki mataora, te au oa meitaki e te angaanga puapinga ei tangata rapakau maki. Noatu te reira, no tana angaanga kua kite putuputu aia i te mamae e te mate. “Ko teia ainei te akakoroanga o te oraanga?” i ui ei aia. Tetai rā kua tatau aia i te au puka Pipiria a te Au Kite o Iehova e kua rauka mai te au pauanga meitaki.

Kua akamārama a Geoff i tana e apii ra ki tana vaine e ta raua tamariki, e kua inangaro katoa ratou kia kite. Kua akamata te ngutuare i te apii i te Pipiria tei akapuapinga i to ratou oraanga e te tauturu ia ratou kia akapou meitaki tikai i to ratou taime. Na roto i ta ratou apii, kua rauka mai te manakonakoanga manea no te ora mutukore i roto i tetai ao kare e mamae e te mate.—Apokalupo 21:3, 4

Tauturu te akaraanga o Geoff ia tatou kia akamaara i te tuatua a Iesu Karaiti: “E mataora to te aronga tei manako i to ratou anoano i te pae vaerua.” (Mataio 5:3, NW) Ka akanoo ainei koe i tetai tuatau iti ua no te akono i toou anoano pae vaerua? Mea papu, kare atu e ravenga e rauka mai ei te pakari kia akapou meitaki i toou taime, kare i te au rā ua, mari ra toou oraanga katoa.